༄༅། །ཕྱི་ལོ་ ༢༠༢༣ ཟླ་བ་ ༠༨ ཚེས་ ༠༣ ཉིན་སིམ་སྤྱི་ལས་ཁུངས་ཀྱི་གོ་སྒྲིག་འོག་སིམ་ལ་ཡན་ལག་སྨན་རྩིས་ཁང་གི་སྨན་པ་བྱམས་པ་དབང་མོ་ལགས་ཀྱིས་བོད་ཀྱི་གསོ་བ་རིག་པའི་ལུགས་ལྟར་ཧི་མ་ཅལ་མངའ་སྡེའི་སྲིད་སྐྱོང་སྐུ་ཞབས་ཤིབ་པྲ་ཏབ་ཤུཀ་ལ་(Shiv Pratap Shukla)མཆོག་གི་སྐུ་གཟུགས་འཕྲོད་བཞེས་ལ་བརྟག་དཔྱད་གནང་ཡོད། དེ་མཚུངས་ཀྱི་རྟག་དཔྱད་ཅིག་འདི་ལོའི་ཕྱི་ཟླ་ ༠༥ ཚེས་ ༠༩ ཉིན་ཡང་གནང་ཡོད།

དུས་སྐབས་དེ་དང་སྟབས་བསྟུན་སིམ་སྤྱི་ཚེ་དབང་ཕུན་ཚོགས་ཀྱིས་ཧི་མ་ཅལ་མངའ་སྡེའི་ནང་གི་བོད་མིའི་ས་ཆ་བོགས་གཏོང་དུས་འགྱངས་ཞུ་སྒོ་དང་དང་འབྲེལ་བའི་དཀའ་རྙོག་སོགས་ཀྱི་སྐོར་སྙན་སེང་དང་དཀའ་སེལ་ལམ་སྟོན་ཞུས། དེ་བཞིན་ཁོང་གིས་ཉེ་ལམ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ས་གནས་ཆེད་ཕེབས་སྐབས་ལམ་སྟོན་གནང་དོན་བཞིན་བསྐོ་འཛུགས་གནང་བའི་ཞུ་གཏུག་ཚོགས་ཆུང་གི་གྲུབ་ཆའི་སྐོར་ཡང་སྙན་སེང་ཞུས་ཡོད་པ་རེད།

སྐབས་དེར་སྲིད་སྐྱོང་ཤིབ་པྲ་ཏབ་མཆོག་ནས་གནད་དོན་དེ་རིགས་དྲུང་ཆེར་ངོ་སྤྲོད་བཀོད་བསྔགས་གནང་སྟེ་གསལ་ཐབས་དགོས་པའི་ལམ་སྟོན་གནང་ཡོད་པ་བཅས།།