༄༅། །འཛམ་གླིང་མཉམ་འབྲེལ་རྒྱལ་ཚོགས་ཀྱི་རང་དབང་ཅན་གྱི་ཆེད་མཁས་པ་གསུམ་གྱིས་རྒྱ་ནག་གཞུང་ནས་བོད་མི་ཁོར་ཡུག་སྲུང་སྐྱོབ་པ་དགུ་འཛིན་བཟུང་གིས་ལོ་མང་རིང་བཙོན་འཇུག་ཁྲིམས་ཐག་བཅད་པའི་སྐོར་དྲི་རྩད་དང་། རྒྱ་གཞུང་གིས་གནམ་གཤིས་འགྱུར་ལྡོག་ལ་གདོང་ལེན་བྱ་རྩིས་ཡོད་ན་ཁོང་རྣམས་འཕྲལ་དུ་བཙོན་གྲོལ་གཏོང་དགོས་པའི་རེ་སྐུལ་གནང་ཡོད།
དེ་ཡང་ཕྱི་ལོ་ ༢༠༢༣ ཟླ་བ་ ༠༨ ཚེས་ ༡༠ ཉིན་སྤེལ་བའི་བསྒྲགས་གཏམ་ནང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་སྲུང་སྐྱོབ་པའི་གནས་སྟངས་རྟོགས་ཞིབ་གནང་མཁན་དམིགས་བསལ་ཆེད་མཁས་པ་ལྕམ་མེ་རི་ལའུ་ལོར་ (Mary Lawlor) ལགས་དང་། ཞི་བའི་འདུ་འཛོམས་ཀྱི་རང་དབང་སྐོར་རྟོགས་ཞིབ་གནང་མཁན་དམིགས་བསལ་ཆེད་མཁས་པ་སྐུ་ཞབས་ཀེ་ལེ་མན་ནེ་ལེ་ཚོ་རི་ཝོ་ལུ་ (Clément Nyaletsossi Voule) ལགས། ཉེན་ཁ་མེད་ཅིང་འཕྲོད་བསྟེན་ལྡན་པའི་ཁོར་ཡུག་ལོངས་སུ་སྤྱོད་རྒྱུའི་རང་དབང་སྐོར་རྟོགས་ཞིབ་གནང་མཁན་དམིགས་བསལ་ཆེད་མཁས་པ་ཊེ་ཝིཊ་བྷོ་ཡོཊ་ (David Boyd) ལགས་ཐུན་མོང་ནས་རྒྱ་ནག་གཞུང་གིས་བོད་མི་ཁོར་ཡུག་སྲུང་སྐྱོབ་པ་ཁག་གཅིག་འཛིན་བཟུང་བཙོན་འཇུག་བྱས་དོན་ཇི་ཡིན་གསལ་བཤད་མེད་པར་ཐུགས་འཚབ་ཤུགས་ཆེ་བསྟན་ཡོད།
རྒྱ་ནག་གཞུང་གི་དྲང་བདེན་མེད་པའི་གྱོད་ཞིབ་གནས་སྟངས་ལ་གཞིགས་ཏེ་རྒྱལ་ཚོགས་ཀྱི་ཆེད་མཁས་པ་རྣམས་ནས་རྒྱ་ནག་གཞུང་གིས་བོད་མི་ཁོར་ཡུག་སྲུང་སྐྱོབ་པ་རྣམས་འཛིན་བཟུང་བཙོན་འཇུག་བྱེད་དོན་གང་ཡིན་གསལ་བཤད་བྱས་མེད་པ་མ་ཟད། བཙོན་པ་རྣམས་ལ་ཁྲིམས་རྩོད་པའི་སློབ་སྟོན་ཞུ་རྒྱུ་དང་། སྨན་བཅོས་མཐུན་རྐྱེན་སྦྱར་ཡོད་པའི་ཡིད་ཆེས་མེད་ཅེས་གསུངས།
བཙོན་འཇུག་བྱས་པའི་བོད་མི་ཁོར་ཡུག་ལས་འགུལ་བ་དགུ་ནི། ཨ་ཉ་སེང་སྒྲ་དང་། སྐལ་བཟང་མཆོག་གླིང་། རྡོ་རྗེ་འབྲུག་གྲ། དོན་རྒྱས། རིན་ཆེན་རྣམ་གྲོལ། ཚུལ་ཁྲིམས་མགོན་པོ། བྱང་ཆུབ་དངོས་གྲུབ། སོག་རུ་ཨ་བྷོ། རྣམ་སྲས་བཅས་ཡིན་ཞིང་། ཁོང་ཚོས་རྒྱ་ནག་གཞུང་ནས་ཁྲིམས་འགལ་གཏེར་ཁ་སྔོག་འདོན་དང་། བོད་མདོ་སྟོད་སྨད་ཁུལ་དུ་སྟོང་ཉེན་ཆེ་བའི་སེམས་ཅན་རྔོན་པའི་གནས་ཚུལ་ཕྱིར་གྱར་བཏང་ཡོད་པ་རེད།
བོད་མི་ཁོར་ཡུག་སྲུང་སྐྱོབ་པ་རྣམས་བཙོན་འཇུག་ཁྲིམས་ཐག་གཅོད་པའི་གནས་སྟངས་དང་། ད་ལྟ་གང་དུ་ཡོད་མེད། བཙོན་པ་རྣམས་ཀྱི་བདེ་དོན་དང་འབྲེལ་ཏེ་ཆེད་མཁས་པ་རྣམས་ནས་རྒྱ་ནག་གཞུང་ངོས་ནས་ཁོང་ཚོ་འཛིན་བཟུང་བྱ་དགོས་དོན་དང་། ད་ལྟ་གང་དུ་བཙོན་འཇུག་བྱས་ཡོད་པ། ཁོང་ཚོའི་གཟུགས་གཞིའི་གནས་བབ་སྐོར་གསལ་བཤད་དང་། བཙོན་པ་རྣམས་ལ་ནང་མི་སྤུན་མཆེད་ཐུག་འཕྲད་བྱེད་འཇུག་དགོས་པའི་རེ་སྐུལ་གནང་བ་མ་ཟད། བོད་མི་ཁོར་ཡུག་སྲུང་སྐྱོབ་པ་རྣམས་འཛིན་བཟུང་བཙུན་འཇུག་བྱས་པ་དེ་ལ་བརྟེན་ནས་རྒྱ་ནག་གཞུང་གིས་གནམ་གཤིས་འགྱུར་ལྡོག་གི་དཀའ་ངལ་ལ་གདོང་ལེན་བྱེད་ཕྱོགས་ཐད་དོགས་གཞི་ཡོད་ཅེས་གསུངས།
དེ་ལྟར་རྒྱལ་ཚོགས་ཀྱི་ཆེད་མཁས་པ་རྣམས་ནས་རྒྱ་ནག་གཞུང་གིས་བོད་ཀྱི་རང་བྱུང་ཁོར་ཡུག་སྲུང་སྐྱོབ་པ་དགུ་ཁྲིམས་འགལ་ཐོག་འཛིན་བཟུང་བྱས་པ་རྣམས་འཕྲལ་དུ་བཙོན་གྲོལ་གཏོང་དགོས་པའི་འབོད་སྐུལ་གནང་ཡོད།
བོད་མིའི་སྒྲིག་འཛུགས་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་རྒྱལ་ཚོགས་ཀྱི་ཆེད་མཁས་པ་ཐུན་མོང་གི་བསྒྲགས་གཏམ་ལ་དགའ་བསུ་དང་སྦྲགས། འདས་པའི་ལོ་ངོ་བཅུ་ཕྲག་རིང་རྒྱལ་ཚོགས་ཀྱི་ཆེད་མཁས་པ་རྣམས་ནས་རྒྱ་ནག་གཞུང་གིས་བོད་མིའི་ཐོབ་ཐང་འཐབ་རྩོད་པ་རྣམས་ལ་དྲག་གནོན་བྱེད་བཞིན་པའི་གནས་སྟངས་ལ་ཞིབ་འཇུག་གནང་བར་ཐུགས་རྗེ་ཆེ་ཞུས་པ་དང་ཆབས་ཅིག བོད་ཀྱི་ཆོས་དང་རིག་གཞུང་། སྐད་ཡིག ཁོར་ཡུག་སྲུང་སྐྱོབ་ཆེད་ཐོབ་ཐང་འཐབ་རྩོད་བྱས་པར་རྒྱ་གཞུང་གིས་བཙོན་འཇུག་བྱས་པའི་བོད་མི་ཆབ་སྲིད་བཙོན་པ་རྣམས་གྲོད་བཀྲོལ་གཏོང་དགོས་པའི་རེ་སྐུལ་གནང་ཡོད་པ་བཅས།།
