༄༅། །རྒྱ་ནག་གཞུང་གིས་བཙོན་འཇུག་བྱས་པའི་བོད་མི་ཚོང་པ་རྡོ་རྗེ་བཀྲ་ཤིས་ལགས་ཀྱིས་གཅེན་མོ་མགོན་པོ་སྐྱིད་ལགས་སུ་རྒྱ་གཞུང་གི་ཉེན་རྟོག་པས་སླར་ཡང་གཅར་རྡུང་བཏང་འདུག
དེ་ཡང་ཉེ་ཁ་སྔོན་མགོན་པོ་སྐྱིད་ལགས་ཀྱིས་གསར་དུ་སྤེལ་བའི་བརྙན་ཐུང་ནང་། ཕྱི་ལོ་ ༢༠༢༣ ཟླ་བ་ ༠༨ ཚེས་ ༠༡ ཉིན་ཁོང་མོ་གྲྭ་བཞི་བཙོན་ཁང་ཉེ་འགྲམ་གྱི་ཉེན་རྟོག་ཁང་དུ་བསྐྱོད་དེ་ཁོང་མོའི་གཅུང་པོ་དང་ཐུག་འཕྲད་འཇུག་རྒྱུའི་འབོད་སྐུལ་དང་སྦྲགས། དབང་འཛིན་པའི་མདུན་དུ་རྐྱང་ཕྱག་འཚལ་ཡང་། ཉེན་རྟོག་པས་རེ་སྐུལ་ལ་སྣང་མེད་ཀྱིས་ཁོང་མོར་ཁྲིམས་འགལ་ཉེས་འཛུགས་བྱས་ཐོག་ས་ལ་དྲུད་དེ་རྡུང་རྡེག་དྲག་པོ་བཏང་ཡོད་སྐོར་འགྲེལ་བརྗོད་གནང་འདུག་པ་མ་ཟད། བརྙན་ཐུང་ནང་དུ་ཁོང་མོས་རྨ་རྗེས་བཏོན་ཏེ། ཉེན་རྟོག་པ་བཞིས་གཅར་རྡུང་བཏང་པའི་དཔང་རྟགས་གསལ་པོ་བསྟན་འདུག
སྤྱིར་རྒྱ་ནག་གཞུང་གི་རྡོ་རྗེ་བཀྲ་ཤིས་ལགས་འདས་པའི་ལོ་ངོ་བཅོ་ལྔའི་རིང་བཙོན་འཇུག་བྱས་ཡོད་པ་དང་། དུས་ཡུན་དེ་དག་རིང་རྡོ་རྗེ་བཀྲ་ཤིས་ལགས་ཀྱི་ལྟོས་བཅས་ནང་མི་རྣམས་ནས་རྒྱ་གཞུང་གི་དྲག་རྩུབ་འོག་ཁོང་གི་གཟུགས་གཞིའི་འཕྲོད་བསྟེན་ལ་བློ་འཚབ་ཆེན་པོ་བསྟན་པ་མ་ཟད། ཁོང་གི་ནང་མི་རྣམས་ནས་མཐོ་རིམ་དཔོན་རིགས་ཁག་ལ་ཞུ་གཏུག་ལན་མང་བྱས་ཀྱང་རྡོ་རྗེ་བཀྲ་ཤིས་ལགས་དང་ཐུག་འཕྲད་བྱ་འཇུག་མེད་པའི་ཁར། མུ་མཐུད་བཙོན་འཇུག་བཀག་ཉར་འོག་བཞག་ཡོད།
ཕྱི་ལོ་ ༢༠༠༨ ལོར་རྒྱ་ནག་གཞུང་གིས་རྡོ་རྗེ་བཀྲ་ཤིས་ལགས་ནས་བཙན་བྱོལ་བོད་མི་དང་བོད་མི་ཞི་རྒོལ་བར་དཔལ་འབྱོར་མཐུན་རྐྱེན་སྦྱར་བའི་ཉེས་འཛུགས་འོག་བཙོན་འཇུག་བྱས་ཡོད་པ་དང་། ཕྱི་ལོ་ ༢༠༡༠ ཟླ་བ་ ༠༥ ཚེས་ ༡༧ ཉིན་ཁྲིམས་ཁང་ནས་ཁོང་ལ་ཚེ་བཙོན་དཔྱད་ཁྲ་བཏང་ཡོད་པ་བཅས།།
