༄༅། །རྒྱ་གར་བྱང་ཤར་གྱི་མངའ་སྡེ་འབྲས་ལྗོངས་དང་། བྱང་བྷེང་གྷལ་ཁུལ་དུ་བོད་དོན་རྒྱབ་སྐྱོར་ཚོགས་པ་སྲ་བརྟན་གཏོང་སླད་འཕགས་བོད་འབྲེལ་མཐུད་ལས་ཁུངས་དང་། ཧི་མ་ལ་ཡའི་བོད་དོན་ལས་འགུལ་ཁང་ (Himalayan Committee for Action on Tibet) ཟུང་སྦྲེལ་ཐོག་ཕྱི་ལོ་ ༢༠༢༣ ཟླ་བ་ ༠༨ ཚེས་ ༢༨ ཉིན་ནུབ་བྷང་གྷལ་མངའ་སྡེའི་ས་ལུ་གྷ་ར་རུ་བོད་དོན་རྒྱབ་སྐྱོར་ཚོགས་པའི་ཚོགས་འདུ་ཞིག་བསྐོང་ཚོགས་གནང་ཡོད།
ཚོགས་འདུའི་སྐུ་མགྲོན་གཙོ་བོར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མའི་ཟུང་སྦྲེལ་ཚོགས་གཙོ་སུ་རེནྡྲ་ཀུ་མཱར་ (Surendra Kumar) ལགས་དང་། དམིགས་བསལ་སྐུ་མགྲོན་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མའི་ས་གནས་ཡན་ལག་ཚོགས་པའི་ཚོགས་གཙོ་སོམ་ཡ་དིབ་དུཏྟ་ (Soumyadeep Dutta) ལགས་གཙོས་པའི་ས་གནས་ཀྱི་གཞུང་ཁོངས་མིན་པའི་ཚོགས་སྡེ་ཁག་དང་། ས་གནས་མི་མང་། སློབ་ཕྲུག་སོགས་ཚོགས་ཞུགས་གནང་ཡོད་པ་རེད།
ཚོགས་འདུའི་ཐོག་མར་ཧི་མ་ལ་ཡའི་བོད་དོན་ལས་འགུལ་ཁང་གི་དྲུང་ཆེ་བསོད་ནམས་ལྷུན་གྲུབ་ལགས་ཀྱིས་ཚོགས་བཅར་བ་རྣམས་ལ་ཕེབས་བསུ་དང་སྦྲགས། ཧི་མ་ལ་ཡའི་བོད་དོན་ལས་འགུལ་ཁང་དང་ཧི་མ་ལ་ཡའི་ནང་པའི་རིག་གཞུང་སློབ་གྲྭའི་སྐོར་ངོ་སྤྲོད་དང་། ས་ལུ་གྷ་ར་རུ་ནང་ཡོད་པའི་བོད་དོན་རྒྱབ་སྐྱོར་ཚོགས་པ་ཁག་དང་། ས་གནས་བོད་མི། གཞུང་ཁོངས་མིན་པའི་ཚོགས་སྡེ་ཕན་ཚུན་མཉམ་འབྲེལ་གྱིས་མཉམ་ལས་གནང་རྒྱུའི་གལ་གནད་སྐོར་འགྲེལ་བརྗོད་གནང་རྗེས་དམིགས་བསལ་སྐུ་མགྲོན་སོམ་ཡ་དིབ་དུཏྟ་ལགས་ཀྱིས་བོད་དོན་འཐབ་རྩོད་དང་རྒྱ་གར་གྱི་བདེ་འཇགས་ཀྱི་འབྲེལ་བའི་སྐོར་དང་། ལྷག་པར་བོད་ས་རྒྱ་ནག་གཞུང་གིས་བཙན་བཟུང་བྱས་རྗེས་རྒྱ་གར་གྱི་བདེ་འཇགས་ལ་ཉེན་ཁ་སླེབས་སྐོར། དེ་བཞིན་ཧིནྡུའི་གནས་ཆེན་ལ་དམ་བསྒྲགས། ཡར་ཀླུང་གཙང་པོ་སྦག་བཙོག་ཅན་དུ་བསྒྱུར་གྱི་ཡོད་སྐོར་གསུངས།
འཕགས་བོད་འབྲེལ་མཐུད་ལས་ཁུངས་ཀྱི་འབྲེལ་མཐུད་པ་ཐུབ་བསྟན་རིག་འཛིན་ལགས་ཀྱིས་འཕགས་བོད་འབྲེལ་མཐུད་ལས་ཁུངས་ངོ་སྤྲོད་དང་འབྲེལ། ཉེ་ལམ་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེད་མཁས་པའི་སྙན་ཐོ་ནང་གསལ་བོད་ནང་རྒྱ་གཞུང་གིས་བོད་ཕྲུག་ས་ཡ་གཅིག་ལྷག་མི་སེར་སྤེལ་ཡུལ་གཏན་འཇགས་སློབ་གྲྭ་ཁག་ཏུ་བཙན་འཇུག་གིས་བོད་ཀྱི་ཆོས་དང་རིག་གཞུང་། སྐད་ཡིག་བཅས་པ་རྩ་མེད་གཏང་རྒྱུའི་སྲིད་བྱུས་འཛིན་བཞིན་པའི་ཛ་དྲག་གནས་སྟངས་གསལ་སྟོན་གནང་བ་མ་ཟད། ཛ་དྲག་པའི་གནས་སྟངས་འདི་ལྟ་བུའི་སྐབས་ཧི་མ་ལ་ཡའི་མི་རིགས་ཚོར་བོད་དོན་ལ་རྒྱབ་སྐྱོར་གནང་རྒྱུའི་ལས་འགན་འཕར་མ་ཡོད་ཅེས་གསུངས་ཡོད་པ་རེད།
སྐུ་མགྲོན་གཙོ་བོ་སྐུ་ཞབས་སུ་རེནྡྲ་ཀུ་མཱར་ལགས་ཀྱིས་ལོ་རྒྱུས་ཐོག་རྒྱ་གར་གྱིས་བོད་དོན་ལ་རྒྱབ་སྐྱོར་ཇི་བྱས་གསལ་བཤད་དང་ཆབས་ཅིག བོད་དོན་གོ་རྟོགས་སྤེལ་རྒྱུ་དང་། དམིགས་བསལ་ཆབ་སྲིད་ཚོགས་པ་ཁག་གི་དམ་བཅའི་རྩ་ཚིག་ནང་དུ་བོད་དོན་འཚུད་ཐབས་དང་། བོད་དོན་ལ་རྒྱབ་སྐྱོར་བྱེད་མཁན་ཆབ་སྲིད་མི་སྣ་གདམ་རྒྱུ་གལ་གནད་ཆེན་པོ་ཡིན་སྐོར་གསུངས། གཞན་ཡང་ཁོང་གིས་བོད་དང་རྒྱ་གར་གྱི་ལོ་རྒྱུས་ཀྱི་འབྲེལ་བ་དང་། བོད་བཙན་བཟུང་བྱས་རྗེས་རྒྱ་གར་གྱི་བདེ་འཇགས་ལ་ཉེན་སླེབས་སྐོར། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་དག་པའི་དབུ་ཁྲིད་ལམ་སྟོན། ས་གནས་མི་མང་ནས་བོད་དོན་ལ་རྒྱབ་སྐྱོར་གནང་གལ་ཆེ་བའི་སྐོར་གསུང་བཤད་གནང་ཡོད་པ་རེད།
ཐེངས་འདིའི་ཚོགས་འདུའི་ཐོག་ཧི་མ་ལ་ཡའི་བོད་དོན་ལས་འགུལ་ཁང་གི་རྒྱུན་ལས་ཚོགས་མི་གསར་འདེམས་གནང་ཐུབ་པ་བྱུང་ཡོད་པ་དང་། ཚོགས་འདུ་གྲུབ་རྗེས་ཚོགས་བཅར་བ་རྣམས་རྡོ་རྗེ་གླིང་དུ་ཕེབས་ཐོན་གནང་ཡོད་པ་བཅས།།
