༄༅། །ཕྱི་ལོ་ ༢༠༢༣ ཟླ་བ་ ༠༨ ཚེས་ ༣༡ ཉིན་ཉི་འོང་ནང་གི་རེ་བའི་མེ་ལྕེ་ཞེས་པའི་གཞུང་ཁོངས་མིན་པའི་ཚོགས་པས་རྒྱ་ནག་གཞུང་གིས་བོད་ཀྱི་བླ་སྤྲུལ་ཡང་སྲིད་ངོས་འཛིན་གནང་སྒོ་གཙོས་པའི་ཆོས་ཕྱོགས་ཀྱི་བྱེད་སྒོ་ཁག་ལ་ཐེ་བྱུས་དམ་བསྒྲགས་བྱེད་བཞིན་པར་སྐྱོན་བརྗོད་ཀྱི་བསྒྲགས་གཏམ་ཞིག་སྤེལ་བ་དང་སྦྲགས། རྒྱ་གཞུང་གིས་བོད་ནང་བོད་མིའི་འགྲོ་བ་མིའི་ཐོབ་ཐང་དང་ཆོས་དད་རང་དབང་རྡོག་རོལ་གཏོང་མཚམས་འཇོག་དགོས་པའི་འབོད་སྐུལ་གནང་ཡོད་པ་རེད།

དེ་ཡང་རྒྱལ་སྤྱིའི་རེ་བའི་མེ་ལྕེ་ཚོགས་པའི་ཚོགས་གཙོ་རུ་ཀྱོ་ཨིན་ཊོ་ (Ryoko Endo) ལགས་དང་། རེ་བའི་མེ་ལྕེ་ཚོགས་པའི་ཀྲོག་ཡོའི་ལས་ཁུངས་ཀྱི་འགན་འཛིན་ཨ་མི་ན་ར་ (Ami Nara) ལགས་ཉི་འོང་སྐུ་ཚབ་དོན་ཁང་དུ་ཆེད་ཕེབས་ཀྱིས་བསྒྲགས་གཏམ་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་སུ་ཕུལ་ཏེ། རྒྱ་ནག་གཞུང་གིས་བོད་ཀྱི་ཆོས་དད་རང་དབང་ལ་ཐེ་བྱུས་དམ་བསྒྲགས་བྱེད་སྟངས་དེ་ཧང་སང་དགོས་པའི་གནད་དོན་ཞིག་ཡིན་ཞིང་། གནད་དོན་དེ་རིགས་རྒྱལ་སྤྱིའི་སྡིངས་ཆའི་སྟེང་གསལ་སྟོན་གནང་དགོས་སྐོར་གསུངས། བསྒྲགས་གཏམ་ནང་རྒྱ་ནག་གཞུང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུས་པའི་བོད་ཀྱི་བླ་སྤྲུལ་རྣམ་པའི་ཡང་སྲིད་ངོས་འཛིན་གནང་སྒོར་ཐེ་བྱུས་བྱེད་བཞིན་པ་ནི་རྒྱལ་སྤྱིའི་སྤྱི་ཚོགས་ཀྱིས་ངོས་ལེན་གནང་ཐབས་མེད་ཅིང་། གལ་ཏེ་རྒྱལ་སྤྱིའི་སྤྱི་ཚོགས་ནས་རྒྱ་ནག་གཞུང་ལ་བོད་ནང་འགྲོ་བ་མིའི་ཐོབ་ཐང་དང་ཆོས་དད་རང་དབང་མུ་མཐུད་རྡོག་རོལ་གཏོང་དུ་འཇུག་ཚེ་བོད་མི་རྣམས་ཀྱི་རང་དབང་དང་། ཞི་བདེ་ལྷིང་འཇགས་ཀྱི་མི་ཚེ་མེད་པར་འགྱུར་ངེས་རེད། ཅེས་དང་།

མཐར་བསྒྲགས་གཏམ་དུ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། ༸ཀུན་གཟིགས་པཎ་ཆེན་རིན་པོ་ཆེ་སྐུ་ཕྲེང་བཅུ་གཅིག་པའི་ཡང་སྲིད་ངོས་འཛིན་གནང་སྒོར་རྒྱ་ནག་གཞུང་གི་ཐེ་བྱུས་བྱེད་བཞིན་པར་ང་ཚོས་མཐའ་གཅིག་ཏུ་ངོ་རྒོལ་བྱ་རྒྱུ་ཡིན་ཞེས་འཁོད་ཡོད། སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་རེ་བའི་མེ་ལྕེའི་འཐུས་མི་སྐུ་ཚབ་རྣམས་ལ་ཐུགས་རྗེ་ཆེ་ཞུས་པ་དང་སྦྲགས། བོད་ནང་གི་ཛ་དྲག་གནས་སྟངས་དང་། བཙན་བྱོལ་བོད་མིའི་གནས་བབ་སྐོར་ངོ་སྤྲོད་གནང་རྗེས་དཀར་གཙང་མཇལ་དར་སྒྲོན་ཏེ་ཚོགས་པའི་ལས་དོན་མཐའ་དག་བཀྲ་ཤིས་ལམ་ལྷོངས་ཡོང་བའི་སྨོན་འདུན་ཞུས།

རེ་བའི་མེ་ལྕེ་ནི་འཛམ་གླིང་ཞི་བའི་ལས་འགུལ་ (Earth Caravan) ཞེས་པའི་ཆ་ཤས་ཡིན་ཞིང་། སྔ་ལོ་རེ་བའི་མེ་ལྕེའི་ཚོགས་མི་ཁག་ཅིག་རྒྱ་གར་རྡོ་རྗེ་གདན་དུ་ཕེབས་ཏེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གསུང་ཆོས་ཞུས་ཡོད་པ་བཅས།།