༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། བོད་མི་མང་སྤྱི་འཐུས་དབུ་དཀར་ཚང་གཡུ་སྒྲོན་ལགས་དང་། སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས། སྤྱི་འཐུས་བཀྲ་ཤིས་དོན་གྲུབ་ལགས་བཅས་ནས་རྒྱ་གར་བྱང་ཤར་འབྲས་ལྗོངས་མངའ་སྡེའི་རྒྱལ་ས་སྒང་ཏོག་ཁུལ་དུ་བོད་དོན་ཞུ་སྐུལ་གྱི་ལས་དོན་མུ་མཐུད་སྤེལ་བཞིན་པ་ལྟར།

ཕྱི་ལོ་ ༢༠༢༣ ཟླ་ ༨ ཚེས་ ༢༩ ཉིན་གྱི་ཕྱི་དྲོ་ཆུ་ཚོད་ ༣།༤༥ ནས་ ༤།༥༥ བར་འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་པེ་རམ་སིངྒ་རྟ་མང་གྷོ་ལེ་ (Prem Singh Tamang-Golay, Chief Minister of Sikkim) མཆོག་དང་མཇལ་འཕྲད་ཀྱིས་སྤྱི་འཐུས་ལྷན་ཚོགས་ཀྱི་ཕྱག་རྟགས་དང་། སྤྱི་འཐུས་ཚོགས་གཙོའི་མཚན་རྟགས་འཁོད་པའི་སྙན་ཞུ། བོད་དོན་ཞུ་སྐུལ་གྱི་ཡིག་ཆ་གཞན་རྣམས་བཅས་ཕུལ་ཏེ། ཞུ་སྐུལ་ཡིག་ཆའི་ནང་གསལ་བོད་དོན་ལ་རྒྱབ་སྐྱོར་མུ་མཐུད་ཡོང་ཐབས་དང་། དམིགས་བསལ་རྒྱ་གར་དབུས་གཞུང་ནས་གཏན་ལ་ཕབ་པའི་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ ༢༠༡༤ དགོངས་དོན་ ༢༠༡༨ ལོར་འབྲས་ལྗོངས་གཞུང་ནས་གཏན་ལ་ཕབ་པའི་ཡིག་ཆ་ཁག་གཞིར་བཟུང་རྒྱལ་ས་སྒང་ཏོག་དང་ར་ཝང་ལ་བཅས་སུ་གནས་སྡོད་སྐྱབས་བཅོལ་བོད་མི་རྣམས་ལ་མཐུན་འགྱུར་དང་རོགས་མགོན་གནང་སྐྱོང་ཡོང་བ། ཉེ་ཆར་ལ་དྭགས་སྡེ་དཔོན་མཆོག་ནས་བོད་མི་སྐྱབས་བཅོལ་བའི་འབྲེལ་མཐུད་གནང་ཆེད་མི་སྣ་ཆེད་འཛུགས་གནང་འདུག་པ་ལྟར་འབྲས་ལྗོངས་གཞུང་ནས་དེ་ལུགས་དགོངས་བཞེས་ཡོང་ཐབས་སོགས་ཀྱི་སྙན་གསན་ཞུས་པར། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་དང་མཛད་འཕྲིན་ཁག་དུས་དང་རྣམ་པ་ཀུན་དུ་སྙིང་དབུས་སུ་བཅང་ནས་བོད་དོན་ལ་རྒྱབ་སྐྱོར་སྒོ་ཀུན་ནས་གནང་བཞིན་ཡོད་པ་ལྟར་ལ་འགྱུར་བ་གང་ཡང་མེད་སྐོར་དང་། དམིགས་བསལ་ཧི་མ་ལ་ཡའི་རི་རྒྱུད་དང་འབྲེལ་ཆགས་རྒྱ་གར་གྱི་མངའ་སྡེ་ཨ་རུ་ན་ཅལ་དང་། འབྲས་ལྗོངས། ཧི་མ་ཅལ། ནུབ་བྷེང་གྷལ། ལ་དྭགས་བཅས་ཀྱི་མངའ་སྡེའི་སྤྱི་ཁྱབ་བློན་ཆེན་དང་སྡེ་དཔོན་བཅས་ལྷན་འཛོམས་ཐོག་བོད་དོན་ལ་རྒྱབ་སྐྱོར་གནང་ཕྱོགས་ཀྱི་རྩ་འཛིན་ལྟ་བུའམ། ཡང་ན་མངའ་སྡེ་སོ་སོའི་ནང་གནས་འཁོད་བོད་མི་སྐྱབས་བཅོལ་བ་རྣམས་ལ་རོགས་མགོན་གནང་ཕྱོགས་གཅིག་གྱུར་ཞིག་ཡོང་ཐུབ་ན་དགེ་མཚན་ཆེན་པོ་ཡོད་པས་དེ་ལུགས་ཀྱི་ཚོགས་འདུ་ཞིག་རྒྱལ་ས་ལྡི་ལིའམ་བཞུགས་སྒར་རྡ་རམ་ས་ལ་གང་རུང་ལ་བོད་མིའི་སྒྲིག་འཛུགས་ནས་གོ་སྒྲིག་གནང་ཐུབ་ཚེ་ཁོང་གིས་སྣེ་ཁྲིད་གནང་རྒྱུ་ཡིན་པའི་སྐོར་དང་། འབྲས་ལྗོངས་སུ་གནས་འཁོད་བོད་མི་སྐྱབས་བཅོལ་བ་རྣམས་ཀྱི་ཆེད་གཏན་འབེབས་གནང་བའི་ཡིག་ཆ་ཁག་གི་འབྲུ་དོན་ལག་བསྟར་ངེས་པར་གནང་རྒྱུ་ཡིན་སྐོར་དང་། འབྲེལ་མཐུད་པ་ཞིག་ཀྱང་བསྐོ་འཛུགས་གནང་ཐབས་བྱ་རྒྱུ་ཡིན་པའི་ཞལ་བཞེས་བཟང་པོ་ཐོབ། གཞན་ཡང་བོད་མི་མང་སྤྱི་འཐུས་ལྷན་ཚོགས་ཀྱི་སྒྲོམ་གཞི་སོགས་གནད་དོན་མང་པོའི་སྐོར་ལ་བཀའ་འདྲི་གནང་བ་རྣམས་ལ་གསལ་བཤད་ཞུ་རྒྱུའི་གོ་སྐབས་སོགས་ཕན་ཚུན་ནང་ཚགས་ཀྱི་བཀའ་མོལ་དུ་མ་བྱུང་བ་དང་། མཐར་འབྲས་ལྗོངས་མངའ་སྡེའི་ཆེ་བསྟོད་སྐུ་མགྲོན་གྱི་ངོ་བོའི་ཚུལ་དུ་གསོལ་ཚིགས་དང་ཕྱག་རྟགས་སོགས་དགྱེས་སྩལ་གནང་ཡོད།  སྐབས་དེར་ས་གནས་འགོ་འཛིན་ལྷག་པ་ཚེ་རིང་ལགས་དང་། མདོ་སྨད་ཚོགས་གཙོ་པདྨ་དབང་གྲགས་ལགས་གཉིས་ཀྱང་ལྷན་བཅར་ཞུས་ཡོད་པ་བཅས།།