༄༅། །ཕྱི་ལོ་ ༢༠༢༣ ཟླ་བ་ ༠༨ ཚེས་ ༡༤ ནས་ ༡༨ བར་བོད་མིའི་སྒྲིག་འཛུགས་ཀྱི་ནང་སྲིད་ལས་ཁུངས་དང་འཕྲོད་བསྟེན་ལས་ཁུངས་ནས་བདེ་སྐྱིད་གླིང་བོད་མིའི་གཞིས་ཆགས་སུ་བོད་མི་ལོ་ན་བགྲེས་སོང་རྣམས་ལ་ལྟ་སྐྱོང་བྱེད་ཕྱོགས་ཀྱི་ཟབ་སྦྱོང་གོ་སྒྲིག་གནང་ཡོད།
དེ་ཡང་ཟབ་སྦྱོང་གི་དབུ་འབྱེད་མཛད་སྒོའི་སྐུ་མགྲོན་གཙོ་བོར་བདེ་སྐྱིད་གླིང་བོད་མིའི་གཞིས་ཆགས་ཀྱི་ས་གནས་འགོ་འཛིན་དོན་གྲུབ་རྒྱལ་པོ་ལགས་ཆེད་ཕེབས་ཀྱིས་སྤྱི་ཚོགས་ནང་འཕྲོད་བསྟེན་གྱི་གལ་གནད་དང་། བོད་མི་ལོ་ན་བགྲེས་སོང་རྣམས་ལ་ལྟ་སྐྱོང་བྱེད་ཕྱོགས་ཀྱི་ཟབ་སྦྱོང་འདི་ལྟ་བུ་ནི་རྒས་གསོ་ཁང་དུ་བཞུགས་པའི་ལོ་བགྲེས་པ་རྣམས་ཀྱི་དགོས་མཁོ་དང་དཀའ་སེལ་སླད་གལ་གནད་ཆེན་པོ་ཡིན་པ་མ་ཟད། ཟབ་སྦྱོང་བ་རྣམས་ནས་བགྲེས་སོང་ལྟ་སྐྱོང་བྱེད་ཕྱོགས་སྐོར་སློབ་སྟོན་གང་ལེགས་ཞུ་དགོས་སྐོར་གསུངས་ཡོད།
ཐེངས་འདིའི་ཟབ་སྦྱོང་ནང་རྒྱ་བལ་གཉིས་ཀྱི་བོད་མིའི་གཞིས་ཆགས་གྲངས་ ༥༢ ནས་སྨན་ཞབས་མ་དང་། འཕྲོད་ལས་པ། རྒས་གསོ་ཁང་གི་ལྟ་རྟོག་པ་མཉམ་ཞུགས་ཀྱིས་སྨན་པ་བློ་བཟང་ཚེ་རིང་ལགས་ཀྱི་སློབ་སྟོན་འོག་བགྲེས་སོང་རྣམས་དང་འབྲེལ་བའི་ནད་གཞི། ཉེན་ཁ་ངོས་འཛིན་སོགས་ཀྱི་སློབ་སྟོན་ཞུ་གི་ཡོད་པ་བཅས།། 
