༄༅། །ཕྱི་ལོ་ ༢༠༢༣ ཟླ་བ་ ༠༨ ཚེས་ ༢༦ ཉིན་བྱང་ཨ་རིའི་སྐུ་ཚབ་དོན་གཅོད་ཁང་དང་རྒྱ་རིགས་མང་གཙོ་འདུ་འཛོམས་ཟུང་སྦྲེལ་ཐོག་བོད་རྒྱའི་གཞོན་སྐྱེས་འབྲེལ་མོལ་ལེ་ཚན་གྱི་ཆ་ཤས་སུ་པདྨ་ཚེ་བརྟན་ལགས་ཀྱིས་བཟོ་སྐྲུན་གནང་བའི་ཐར་ལོ་ཞེས་པའི་གློག་བརྙན་གཟིགས་འབུལ་དང་བགྲོ་གླེང་འདུ་འཛོམས་ཤིག་གོ་སྒྲིག་ཞུས་ཡོད།
གློག་བརྙན་འདུ་འཛོམས་ཐོག་ནིའུ་ཡོག་ཉེ་འགྲམ་དུ་གནས་སྡོད་བོད་རིགས་དང་རྒྱ་རིགས་གཞོན་སྐྱེས་ལྔ་བཅུ་ལྷག་མཉམ་ཞུགས་ཀྱིས་གློག་བརྙན་མཉམ་བལྟས་ཐོག་བགྲོ་གླེང་གནང་ཡོད་པ་མ་ཟད། རྒྱ་རིགས་མང་གཙོ་འདུ་འཛོམས་ཞེས་པའི་ཚོགས་པའི་ངོས་ནས་ཤོག་བུ་དཀར་པོའི་གསར་བརྗེ་དང་། བོད་དོན་གློག་བརྙན་བགྲོ་གླེང་སྐོར་བསམ་ཚུལ་བཏོན་གནང་ཡོད།
སྐབས་དེར་བྱང་ཨ་རིའི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་ནས་བོད་དོན་གློག་བརྙན་བགྲོ་གླེང་ཐོག་མཉམ་ཞུགས་གནང་མཁན་རྣམས་ལ་བསྔགས་བརྗོད་དང་སྦྲགས། བོད་རིགས་གློག་བརྙན་བཟོ་སྐྲུན་པ་པདྨ་ཚེ་བརྟན་ལགས་ཀྱི་མཛད་རྗེས་དང་། དམིགས་བསལ་ཁོང་གིས་བོད་ནང་གི་དེང་རབས་ཀྱིས་འཚོ་བ་དང་དཀའ་ངལ་མཚོན་པའི་གློག་བརྙན་མང་དག་བཟོ་སྐྲུན་གནང་ཡོད་ནའང་། བོད་ནང་གི་བོད་མིའི་འཚོ་བ་དང་དཀའ་ངལ་མང་པོ་ཞིག་རྒྱ་གཞུང་གི་དམ་བསྒྲགས་འོག་གློག་བརྙན་ནང་བསྟན་ཐུབ་མེད་སྐོར་འགྲེལ་བརྗོད་གནང་། དེ་བཞིན་རྒྱ་རིགས་འབྲེལ་མཐུད་པས་ཚོགས་བཅར་བ་རྣམས་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་སྐྱེད་དམ་བཅའ་བཞི་དང་། བོད་ནང་གི་ཛ་དྲག་གནས་སྟངས། ཕྱི་ལོ་ ༢༠༠༩ ནས་བཟུང་བོད་མི་ ༡༥༧ ལྷག་གིས་བོད་དོན་ཆེད་རང་ལུས་མེར་སྲེག་བཏང་ཡོད་པའི་སྐོར། ཉེ་ལམ་རྒྱ་ནག་གཞུང་གིས་རྒྱ་སྒྱུར་སྲིད་བྱུས་ནང་དོན་ལྟར་བོད་ཕྲུག་ས་ཡ་གཅིག་ལྷག་མི་སེར་སྤེལ་ཡུལ་གཏན་འཇགས་སློབ་གྲྭ་ཁག་ཏུ་བཙན་འཇུག་བྱས་ཡོད་པའི་སྐོར་སོགས་ངོ་སྤྲོད་གནང་ཡོད།
གློག་བརྙན་གཟིགས་འབུལ་གྲུབ་མཚམས་ཚོགས་བཅར་བ་རྣམས་སྡེ་ཚན་གསུམ་དུ་ཆ་བགོས་ཀྱིས་རིག་གཞུང་མཚོན་དོན། ངོ་བོ་དང་འབྲེལ་གཏུག། གཞན་ཚོར་ནུས་ཤེས་དང་བསམ་ཤེས་ཞེས་པའི་བརྗོད་གཞིའི་ཐོག་བགྲོ་གླེང་གནང་ཡོད་ཅིང་། རྒྱ་རིགས་གཞོན་སྐྱེས་མཉམ་ཞུགས་པ་ཕལ་མོ་ཆེ་རྒྱ་ནག་སྐམ་ས་ཆེན་པོ་ནས་ཕེབས་ཡོད་པ་དང་། ཁོང་ཚོས་བོད་དོན་གློག་བརྙན་དང་། དེ་བཞིན་རང་ཉིད་བོད་ཀྱི་ས་གནས་ཁག་ཏུ་ཕེབས་པའི་མྱོང་ཚོར་གསུངས་ཡོད།
དེ་བཞིན་བོད་རིགས་ཚོགས་བཅར་བ་རྣམས་ནས་ཀྱང་གློག་བརྙན་གྱི་རྒྱབ་ལྗོངས་བརྗོད་སྙིང་དང་། རྒྱ་ནག་གཞུང་གི་དྲག་གནོན་ཆེ་བའི་སྲིད་བྱུས་འོག་གི་བོད་མིའི་གནས་སྟངས་སྐོར་དགོངས་ཚུལ་གསུངས་རྗེས་སླད་མར་ཕྱོགས་གཉིས་བར་ཕན་ཚུན་མཉམ་ལས་གནང་ཕྱོགས་སྐོར་བསམ་ཚུལ་ཤུགས་ཆེ་བཏོན་གནང་ཡོད་པ་བཅས།།
