༄༅། །ཕྱི་ལོ་ ༢༠༢༣ ཟླ་བ་ ༠༨ ཚེས་ ༣༡ ཉིན་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་གོ་སྒྲིག་འོག་གངས་སྐྱིད་ལས་བྱེད་གསོལ་ཐབ་ཁང་གི་ཚོགས་ཁང་དུ་བོད་མིའི་སྒྲིག་འཛུགས་ཀྱི་རོགས་ཚོགས་ཚོགས་ཆེན་བསྐོང་ཚོགས་གནང་ཡོད་པ་རེད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩:༣༠ ཐོག་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག བདེ་སྲུང་བཀའ་བློན་རྒྱ་རི་སྒྲོལ་མ་མཆོག ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་དྲུང་ཆེ་རྣམ་པ། རོགས་ཚོགས་ཁག་གི་སྐུ་ཚབ་འཐུས་མི་རྣམ་པ། བོད་མིའི་སྒྲིག་འཛུགས་ཀྱི་ལས་ཁུངས་ཁག་གི་ལས་འཆར་འགན་འཛིན་རྣམ་པ་བཅས་ཚང་འཛོམས་ཐོག་ཚོགས་འདུ་དངོས་སུ་དབུ་འཛུགས་བསྐྱངས་ཡོད།
ཚོགས་འདུའི་ཐོག་མར་སྤྱི་ཚོགས་ཡར་རྒྱས་ཐེབས་རྩའི་འགན་འཛིན་བློ་བཟང་བསྟན་འཛིན་ལགས་ཀྱིས་ཕེབས་བསུའི་གསུང་བཤད་གནང་རྗེས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བོད་མིའི་སྒྲིག་འཛུགས་བཀའ་ཤག་སྐབས་བཅུ་དྲུག་པའི་ཕུགས་དམིགས་ཡིག་ཆ་དང་འབྲེལ་ཏེ། རོགས་ཚོགས་ཁག་ནས་བཙན་བྱོལ་བོད་མིའི་སྤྱི་ཚོགས་བདེ་དོན་ལྟ་སྐྱོང་ཐད་རོགས་ཕན་གནང་ཕྱོགས་ཇི་དགེའི་ཐད་གསུང་བཤད་གནང་ཡོད།
སྐབས་དེར་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བོད་མིའི་རང་དབང་འཐབ་རྩོད་ད་བར་རྒྱུན་གནས་ཐུབ་པ་ནི་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་དག་པའི་དབུ་ཁྲིད་ལམ་སྟོན་དང་ཐུགས་རྗེ་བཀའ་དྲིན་ལ་བརྟེན་ནས་བྱུང་ཞིང་། བོད་ནང་གི་གཞུས་ལུས་རྒྱ་ཆེ་མི་མང་གིས་བཙན་བྱོལ་ནང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། བོད་མིའི་སྒྲིག་འཛུགས་གཉིས་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་དང་བོད་མིའི་རང་དབང་འཐབ་རྩོད་རྒྱུན་གནས་ཀྱི་ཕུགས་རེར་བཅངས་ཏེ་སེམས་ཤུགས་སྐྱེད་བཞིན་ཡོད་པ་དང་། བཙན་བྱོལ་བོད་མི་རྣམས་ནས་ཀྱང་བོད་ནང་གི་གཞིས་ལུས་མི་མང་གི་སེམས་ཤུགས་དང་ལྷག་བསམ་ལས་སེམས་འགུལ་ལེན་གྱི་ཡོད་སྐོར་གསུངས།
དེ་མཚུངས་དཔལ་ལྡན་སྲིད་སྐྱོང་མཆོག་གིས་བོད་ཀྱི་རང་དབང་འཐབ་རྩོད་རྒྱུན་གནས་ཆེད་དཔལ་འབྱོར་གྱི་རྒྱབ་རྟེན་མེད་ན་ལམ་ལྷོངས་མི་ཡོང་བས་དེའི་ཆེད་རྒྱ་གར་གཞུང་ནས་རྒྱབ་སྐྱོར་མཐུན་འགྱུར་རླབས་ཆེ་གནང་བའི་ཐོག་རྒྱ་གར་ནང་དུ་བོད་མིའི་སྒྲིག་འཛུགས་དང་བཙན་བྱོལ་བོད་མིའི་གཞིས་ཆགས་ཁག་གསར་འཛུགས་གནང་ཐུབ་པ་བྱུང་ཡོད་ལ། དེ་བཞིན་ཨ་རིའི་གཞུང་ཐེ་བའི་རྒྱལ་ཁབ་མང་དག་ནས་རྒྱུད་ལམ་འདྲ་མིན་བརྒྱུད་བོད་མིའི་སྒྲིག་འཛུགས་དང་བཙན་བྱོལ་བོད་མིའི་བདེ་དོན་ཆེད་རྒྱབ་སྐྱོར་དང་གཟིགས་སྐྱོང་གནང་དང་གནང་མུས་ལྟར་ཕན་ཐོགས་རླབས་ཆེ་བྱུང་ཡོད་ཅེས་གསུངས་ཡོད་པ་རེད། 
དེ་དང་འབྲེལ་ཏེ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཉེ་ལམ་བོད་མིའི་སྒྲིག་འཛུགས་བཀའ་ཤག་སྐབས་བཅུ་དྲུག་པས་བཏོན་པའི་བོད་ཀྱི་མ་འོངས་འགན་སྲུང་ཞེས་པའི་ཕུགས་དམིགས་ཡིག་ཆའི་ནང་དོན་དང་འབྲེལ་ཏེ། རྩ་བའི་དམ་བཅའ་གསུམ་སྟེ། སྤྱི་སྙོམས་དྲང་བདེན། ནུས་པ་མཉམ་སྤུངས། གོམ་པ་མདུན་སྤོ་གཞི་ལ་བཞག་ཐོག་བོད་ཀྱི་གལ་གནད་སྐོར་དང་། བོད་དོན་བདེན་མཐའ་གསལ་ཐབས། བཙན་བྱོལ་བོད་མིའི་སྤྱི་ཚོགས་བདེ་དོན། བོད་མིའི་སྒྲིག་འཛུགས་ཀྱི་ནུས་ཤུགས་གོང་སྤེལ་གཏོང་ཕྱོགས་སྐོར་ངོ་སྤྲོད་བ་མ་ཟད། རོགས་ཚོགས་ཁག་ནས་བཙན་བྱོལ་བོད་མིར་རོགས་སྐྱོར་གནང་སྐབས་མཚམས་རེ་རོགས་ཚོགས་ཀྱི་དམིགས་ཡུལ་དང་བཙན་བྱོལ་བོད་མིའི་དགོས་མཁོ་གཉིས་མཐུན་གྱི་མེད་པའི་དཀའ་ངལ་རིགས་འཕྲད་བཞིན་ཡོད་སྟབས། ད་ཐེངས་ཚོགས་འདུ་འདི་བརྒྱུད་རོགས་ཚོགས་ཀྱི་དམིགས་ཡུལ་དང་བོད་མིའི་དགོས་མཁོ་གཉིས་མཐུན་ཐབས་ཇི་དགེའི་ཐད་གྲོས་མོལ་གནང་གལ་ཆེ་བའི་སྐོར་གསུང་བཤད་གནང་ཡོད།
ཉིན་གྲངས་གཉིས་རིང་གི་བོད་མིའི་རོགས་ཚོགས་ཀྱི་ཚོགས་འདུའི་དམིགས་ཡུལ་གཙོ་བོ་ནི། བོད་མིའི་སྒྲིག་འཛུགས་སྤྱི་ཚོགས་དང་། དཔལ་འབྱོར། ཤེས་རིག རིག་གཞུང་སོགས་ཀྱི་མ་འོངས་ཕུགས་དམིགས་གསལ་བཤད་གནང་རྒྱུ་དང་། བོད་མིའི་སྒྲིག་འཛུགས་ལ་རྒྱབ་སྐྱོར་གནང་མཁན་རོགས་ཚོགས་ཁག་གི་དམིགས་ཡུལ་དང་། དོ་སྣང་བྱ་ཡུལ། མ་འོངས་འཆར་གཞི་རྒྱུས་ལོན་ཞུ་རྒྱུ། དེ་བཞིན་བོད་མིའི་སྒྲིག་འཛུགས་དང་རོགས་ཚོགས་ཕན་ཚུན་མཐུན་ལམ་གོང་འཕེལ་གཏང་རྒྱུ། བོད་མིའི་སྒྲིག་འཛུགས་ཀྱི་ཕུགས་དམིགས་དང་རོགས་ཚོགས་ཁག་གི་མོས་པ་དང་གལ་གནད་བཟུང་ཕྱོགས་གཉིས་མཐུན་ཐབས་ཇི་དགེའི་ཐད་གྲོས་མོལ་གནང་རྒྱུ་ཡིན་པ་བཅས།། 
