༄༅། །ཕྱི་ལོ་ ༢༠༢༣ ཟླ་བ་ ༠༨ ཚེས་ ༡༥ ཉིན་རྒྱ་གར་ལ་རང་བཙན་ཐོབ་སྟེ་ལོ་ངོ་ ༧༧ ཧྲིལ་པོ་འཁོར་བའི་དུས་ཆེན་རྒྱ་གར་རྒྱལ་ཡོངས་སུ་དགའ་སྤྲོའི་ངང་སྲུང་བརྩི་ཞུ་གི་ཡོད་པ་ལྟར། བོད་མིའི་སྒྲིག་འཛུགས་ངོས་ནས་ཀྱང་རྒྱ་གར་གཞུང་དམངས་གཉིས་ལ་ཆེ་མཐོང་གུས་བརྩི་མཚོན་ཕྱིར་གངས་སྐྱིད་སྲི་ཟློག་མཆོད་རྟེན་མདུན་ཐང་དུ་སྔ་དྲོ་ཆུ་ཚོད་ ༩:༣༠ ཐོག་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག དཔལ་ལྡན་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག དཔལ་ལྡན་ཁྲིམས་ཞིབ་པ་གཞན་བསྟན་འཛིན་ལུང་རྟོགས་མཆོག ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག དབུས་འོས་བསྡུ་ལས་ཁུངས་དང་ལས་བྱེད་འདེམས་བསྐོ་ལྷན་ཁང་གི་ཚོགས་གཙོ་དཔེ་ཟུར་དབང་འདུས་ཚེ་རིང་ལགས། བོད་མི་མང་སྤྱི་འཐུས་ཚེ་རིང་དབྱངས་ཅན་ལགས། བོད་མིའི་སྒྲིག་འཛུགས་ཀྱི་ལྷན་ཁང་གི་དྲུང་ཆེ་གཙོས་པའི་དྲུང་ལས་ཡན་གྱི་སྲི་ཞུའི་ལས་བྱེད། གསར་འགོད་པ་བཅས་ཚང་འཛོམས་ཀྱི་ཐོག་མར་རྒྱ་གར་གྱི་རྒྱལ་གླུ་དང་བཅས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་གྱི་རྒྱལ་དར་སྒྲེང་འཛུགས་དང་། དེ་རྗེས་གསར་འགོད་པའི་བཅར་འདྲིར་ཞལ་བཞེས་ཀྱིས་རྒྱ་གར་རང་བཙན་ཉིན་མོར་རྒྱ་གར་གཞུང་དམངས་གཉིས་ལ་འཚམས་འདྲི་དང་། ད་བར་བོད་མི་རྣམས་ལ་རྒྱབ་སྐྱོར་ཕན་གྲོགས་གནང་བར་ཐུགས་རྗེ་ལེགས་འབུལ་ཞུས་ཡོད།
དེ་ཡང་དཔལ་ལྡན་སྲིད་སྐྱོང་མཆོག་གིས་རྒྱ་གར་རང་བཙན་ཐོབ་སྟེ་ལོ་ངོ་ ༧༧ འགྲོ་གི་ཡོད་པ་དང་། ཨིན་གཞུང་འོག་ནས་རང་བཙན་ཐོབ་པའི་རྗེས་སུ་རྒྱ་གར་མང་གཙོའི་ལམ་སྲོལ་ཐོག་བསྐྱོད་པ་དེ་ལ་བརྟེན་ནས་འཛམ་གླིང་སྤྱི་དང་། ཡང་སྒོས་རྒྱ་གར་ལ་ཕན་ཐོགས་ཆེན་པོ་བྱུང་ཡོད་ཅིང་། ད་ལྟའི་ཆར་རྒྱ་གར་དཔལ་འབྱོར་ཐོག་ནས་ཡར་རྒྱས་ཤུགས་ཆེ་འགྲོ་བཞིན་ཡོད་པའི་རྒྱལ་ཁབ་ཅིག་ཏུ་འགྱུར་གྱི་ཡོད་ལ། དེ་ལ་བརྟེན་ནས་རང་བཞིན་གྱིས་རྒྱལ་ཁབ་ཀྱི་བདེ་སྲུང་ཐོག་ཡར་རྒྱས་འགྲོ་ངེས་ཡིན་སྐོར་གསུངས་ཡོད།
དེ་བཞིན་དཔལ་ལྡན་སྲིད་སྐྱོང་མཆོག་གིས་རྒྱ་གར་ད་ལྟའི་ཆར་འཛམ་གླིང་སྟེང་གི་མི་འབོར་མང་ཤོས་ཡིན་པས་ནང་ཁུལ་དཀའ་ངལ་ཕྲན་ཚེགས་རིགས་ཡོད་ནའང་སྤྱི་ཡོངས་ཀྱི་ཆ་ནས་རྒྱ་གར་ནང་ཆོས་ལུགས་དང་། སྐད་ཡིག རིག་གཞུང་མང་པོ་མཐུན་ལམ་ལྡན་པའི་ཐོག་མཉམ་གནས་ཐུབ་པ་དེ་འཛམ་གླིང་ལ་དཔེ་མཚོན་ཆགས་ཡོད་ཅེས་གསུངས་ཡོད།
གཞན་ཡང་རྒྱ་གར་རང་བཙན་ཐོབ་སྟེ་ལོ་ངོ་ ༧༧ འཁོར་བའི་དུས་ཆེན་དང་བསྟུན་བོད་མིའི་སྒྲིག་འཛུགས་ངོས་ནས་རྒྱ་གར་གཞུང་དམངས་གཉིས་ལ་གང་གསུང་རྒྱུ་ཡོད་མེད་ཐད་བཀའ་དྲི་ཞུས་པར་དཔལ་ལྡན་སྲིད་སྐྱོང་མཆོག་གིས། རྒྱ་གར་ལ་རང་བཙན་འཐོབ་པའི་སྐབས་སུ་ང་ཚོ་རང་བཙན་ཡོད་པའི་རྒྱལ་ཁབ་ཅིག་རེད། རྒྱ་གར་ལ་རང་བཙན་ཐོབ་ནས་ལོ་འགའ་ཤས་རྗེས་རྒྱ་ནག་དམར་པོའི་གཞུང་གིས་བཙན་འཛུལ་བྱས་ཏེ་བོད་ས་ཤོར་བ་རེད། འཛམ་གླིང་དམག་ཆེན་གཉིས་པའི་རྗེས་རྒྱལ་ཁབ་མང་པོ་ཞིག་ལ་རང་བཙན་ཐོབ་པའི་སྐབས་རྒྱ་གར་ལའང་རང་བཙན་ཐོབ་སྟེ་དུས་ད་ལྟ་བར་དུ་རྒྱུན་འཁྱོངས་གནས་ཐུབ་པ་མ་ཟད། མང་གཙོའི་འགྲོ་ལུགས་དང་། སྤྱི་ཚོགས་ཀྱི་བཟང་སྤྱོད་སོགས་འགྲོ་ལུགས་ཚང་མ་རྒྱུན་འཛིན་བྱས་ཏེ་འགྲོ་གི་ཡོད་པར་ལེགས་གསོལ་བསྔགས་བརྗོད་ཞུ་རྒྱུ་དང་། དེ་རིང་རྒྱ་གར་རང་བཙན་ཐོབ་སྟེ་ལོ་ངོ་ ༧༧ འཁོར་བའི་ཉིན་མོ་དང་སྟབས་བསྟུན་ཏེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གཙོ་བོར་གྱུར་བའི་བོད་ཕྱི་ནང་གཉིས་ཀྱི་བོད་མི་ཚང་མས་རྒྱ་གར་གཞུང་དམངས་གཉིས་ལ་རང་བཙན་ཉིན་མོར་འཚམས་འདྲི་ཞུ། ང་རང་ཚོ་ལ་ཡིན་ནའང་མ་འོངས་པར་བོད་ལ་སྐྱིད་པའི་ཉི་མ་ཤར་བའི་རེ་བ་ཞུ་གི་ཡོད། རྒྱ་གར་ལ་རང་བཙན་མེད་པའི་སྐབས་དབུ་ཁྲིད་རྣམ་པས་འགན་ཁུར་པའི་ཐོག་གཞན་ཚོས་རོགས་སྐྱོར་གནང་ཡོད་པ་ལྟར། ང་ཚོར་ཡང་བོད་རྒྱའི་དཀའ་རྙོག་མ་སེལ་བར་དུ་རྒྱ་གར་གཞུང་དམངས་གཉིས་ནས་རྒྱབ་སྐྱོར་མུ་མཐུད་གནང་བའི་རེ་བ་ཞུ་གི་ཡོད་ཅེས་གསུངས་ཡོད་པ་རེད།
རྒྱལ་དར་སྒྲེང་འཛུགས་ཀྱི་ལས་རིམ་གྲུབ་རྗེས་དུ་མཛད་གཙོ་རྣམ་པ་གཙོས་པའི་སྲི་ཞུའི་ལས་བྱེད་རྣམས་ནས་གསོལ་ཇ་དང་མངར་ཟས་ལ་རོལ་ཏེ་དུས་ཆེན་སྲུང་བརྩི་ཞུས་ཡོད་པ་བཅས།། 
