༄༅། །ཕྱི་ལོ་ ༢༠༢༣ ཟླ་བ་ ༠༨ ཚེས་ ༢༢ ཉིན་བཞུགས་སྒར་ཉེ་འདབས་སུ་ཆགས་པའི་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་འོག་བོད་ཀྱི་ན་གཞོན་ཉམས་ཞིབ་པའི་ཚོགས་འདུ་ཐེངས་དགུ་པ་དབུ་འཛུགས་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩:༣༠ ཐོག་ཚོགས་འདུ་དབུ་འབྱེད་ཀྱི་མཛད་སྒོའི་སྐུ་མགྲོན་གཙོ་བོར་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། དམིགས་བསལ་སྐུ་མགྲོན་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས། ས་རཱ་བོད་ཀྱི་མཐོ་རིམ་སློབ་གཉེར་ཁང་གི་སློབ་སྤྱི་པ་སངས་ཚེ་རིང་ལགས། ཕྱོགས་མཐའ་ཁག་ནས་ཕེབས་པའི་ན་གཞོན་ཉམས་ཞིབ་པ་རྣམ་པ། གསར་འགོད་པ་བཅས་ཚང་འཛོམས་ཀྱི་ཐོག་མར་སྐུ་མགྲོན་གཙོ་བོ་མཆོག་ནས་སྣང་གསལ་མར་མེ་ཞལ་འབྱེད་དང་། དེ་རྗེས་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་ནས་ཕེབས་བསུའི་གསུང་བཤད་དང་སྦྲགས། རྒྱ་ནག་གཞུང་གིས་ཞི་དྲག་ཐབས་ལམ་སྣ་ཚོགས་བརྒྱུད་བོད་ཀྱི་ཆོས་དང་རིག་གཞུང་རྩ་གཏོར་གཏོང་ཞིང་། བོད་ཀྱི་དངོས་བྱུང་ལོ་རྒྱུས་ལ་འཁྱོག་བཤད་སྣ་ཚོགས་བྱེད་བཞིན་པར་བོད་རིགས་ན་གཞོན་ཉམས་ཞིབ་པ་རྣམས་ནས་ཁ་གཏད་གཅོག་དགོས་པའི་འབོད་སྐུལ་གནང་ཡོད།
དམིགས་བསལ་སྐུ་མགྲོན་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་ནས་བོད་ཀྱི་ན་གཞོན་ཉམས་ཞིབ་པའི་ཚོགས་འདུ་དང་འབྲེལ་ཏེ་རྒྱ་ནག་གཞུང་གིས་བོད་ཀྱི་ཆོས་དང་རིག་གཞུང་། ངོ་བོ་བཅས་པ་ཤུལ་མེད་ནག་བསུབ་གཏོང་བྱུས་བྱེད་བཞིན་པའི་དུས་སྐབས་སུ་བཙན་བྱོལ་བོད་མི་རྣམས་ནས་ཕ་མེས་ནས་བརྒྱུད་པའི་བོད་ཀྱི་ཆོས་རིག་གོམས་སྲོལ་བཟང་པོ་དང་། བོད་མི་རིགས་ཀྱི་ངོ་བོ་མི་ཉམས་རྒྱུན་འཛིན་གནང་རྒྱུ་གལ་གནད་ཆེན་པོ་ཡིན་པ་མ་ཟད། ལྷག་པར་དུ་ཉམས་ཞིབ་པ་རྣམས་ནས་བོད་ནང་རྒྱ་ནག་གཞུང་གིས་ལག་བསྟར་བྱེད་བཞིན་པའི་སྲིད་བྱུས་ཁག་དང་། དེའི་རྗེས་འབྲས་ཇི་བྱུང་སོགས་ཀྱི་སྐོར་དོ་སྣང་དང་ཉམས་ཞིབ་གནང་གལ་ཆེན་པོ་ཡིན་སྐོར་གསུངས་ཡོད།
གཞན་ཡང་ཁོང་གིས་བོད་ཡིག་ཐོག་བྲིས་པའི་དཔྱད་རྩོམ་རྣམས་ཁྱབ་སྤེལ་ཆེ་བ་ཡོང་སླད་སྐད་ཡིག་གཞན་དུ་བསྒྱུར་ཐུབ་ན་དགེ་མཚན་ཆེན་པོ་ཡོད་སྐོར་དང་། དེ་བཞིན་ཚོགས་འདུའི་ཐོག་ཧི་མ་ལ་ཡའི་མངའ་ཁུལ་ནས་ཚོགས་བཅར་བ་ཁ་ཤས་ཕེབས་ཡོད་པའི་སྐོར་དང་འབྲེལ་ཏེ། བོད་དང་ཧི་མ་ལ་ཡའི་མི་རིགས་གཉིས་ཆབ་སྲིད་ཐོག་ནས་ལོགས་སུ་གྱར་ཡོད་ནའང་ཆོས་དང་རིག་གཞུང་གཅིག་མཚུངས་ཡིན་ཞིང་། གལ་ཏེ་བོད་ཀྱི་ཆོས་དང་རིག་གཞུང་ཉམས་ན་རང་བཞིན་གྱིས་ཧི་མ་ལ་ཡའི་མི་རིགས་ལའང་གྱོང་གུན་རག་གི་ཡོད་སྟབས། ཧི་མ་ལ་ཡའི་མི་རིགས་ཐེ་བའི་བོད་རིགས་ཡོངས་ནས་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་བྱེད་པར་ཕྱར་གྲུ་མཉམ་འདེགས་གནང་དགོས་པའི་འབོད་སྐུལ་གནང་ཡོད།
དེ་རྗེས་སྐུ་མགྲོན་གཙོ་བོ་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་ནས་ཉམས་ཞིབ་གནས་ཚད་གོང་འཕེལ་གཏོང་ཕྱོགས་དང་། བོད་ཀྱི་ལོ་རྒྱུས་གནས་བབ་ལ་ཉམས་ཞིབ་གནང་རྒྱུའི་གལ་གནད། བོད་ཀྱི་དཔལ་ཡོན་དར་འཕེལ་དང་ལོ་རྒྱུས་ཀྱི་འཕེལ་རིམ་སོགས་ཀྱི་སྐོར་གསུང་བཤད་ཞིབ་རྒྱས་གནང་ཡོད་པ་རེད།
སྤྱིར་བོད་ཀྱི་སྲིད་བྱུས་ཉམས་ཞིབ་ཁང་གིས་གོ་སྒྲིག་ཞུས་པའི་བོད་ཀྱི་ན་གཞོན་ཉམས་ཞིབ་པའི་ཚོགས་འདུ་ཐེངས་དགུ་པ་དེ་བཞིན་ཕྱི་ལོ་ ༢༠༢༣ ཟླ་བ་ ༠༨ ཚེས་ ༢༢ ནས་ ༢༤ བར་ཉིན་གྲངས་གསུམ་རིང་འཚོག་གི་ཡོད་པ་དང་། སྐབས་དེར་ཉམས་ཞིབ་པ་རྣམས་ནས་བོད་ཀྱི་ལོ་རྒྱུས་དང་། ནང་དོན་རིག་པ། བོད་ཀྱི་སྐད་ཡིག རྩོམ་རིག བོད་ནང་གི་ཛ་དྲག་གནས་སྟངས། བཙན་བྱོལ་བོད་མིའི་གནས་བབ་སོགས་ཀྱི་སྐོར་དཔྱད་རྩོམ་སྒྲོག་སྦྱངས་དང་གྲོས་བསྡུར་གནང་གི་ཡོད་ལ། ཚོགས་འདུའི་ཐོག་རྒྱ་བལ་གཉིས་ནས་ཚོགས་བཅར་བ་ ༣༠ མཉམ་ཞུགས་གནང་ཡོད་པ་བཅས།།
