༄༅། །ཕྱི་ལོ་ ༢༠༢༣ ཟླ་བ་ ༠༨ ཚེས་ ༠༧ ཉིན་ཕྱི་དྲིལ་བོད་ཀྱི་འགྲེམས་སྟོན་ཁང་གི་གོ་སྒྲིག་འོག་གངས་སྐྱིད་བོད་ཀྱི་འགྲེམས་སྟོན་ཁང་དུ་བོད་ཀྱི་ས་ཁྲའི་དུས་ཐུང་འགྲེམས་སྟོན་ཞིག་དབུ་འཛུགས་གནང་ཡོད་པ་རེད།
དེ་ཡང་དུས་ཐུང་འགྲེམས་སྟོན་གྱི་དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་། དམིགས་བསལ་སྐུ་མགྲོན་ས་ཁྲ་རིག་པའི་ཆེད་མཁས་པ་ཚེ་རིང་དབང་རྒྱལ་ཤར་བ་ལགས། ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས། ནང་སྲིད་དྲུང་ཆེ་དཔལ་ལྡན་དོན་གྲུབ་ལགས། ཕྱི་དྲིལ་དྲུང་འཕར་བསྟན་འཛིན་ལེགས་བཤད་ལགས། ཕྱི་དྲིལ་དྲུང་འཕར་རྣམ་རྒྱལ་ཚེ་དབང་ལགས། བོད་ཀྱི་འགྲེམས་སྟོན་ཁང་གི་འགན་འཛིན་བསྟན་འཛིན་སྟོབས་ལྡན་ལགས། བཞུགས་སྒར་ཁུལ་གྱི་ཚོགས་སྡེ་ཁག་གི་སྐུ་ཚབ། གསར་འགོད་པ་རྣམ་པ། བོད་ཀྱི་ས་ཁྲའི་ཟབ་སྦྱོང་གི་ཚོགས་བཅར་བ་བཅས་མཉམ་ཞུགས་གནང་ཡོད།
དབུ་འབྱེད་མཛད་སྒོའི་ཐོག་མར་བོད་ཀྱི་འགྲེམས་སྟོན་ཁང་གི་འགན་འཛིན་བསྟན་འཛིན་སྟོབས་ལྡན་ལགས་ནས་ཕེབས་བསུའི་གསུང་བཤད་དང་བོད་ཀྱི་ས་ཁྲའི་དུས་ཐུང་འགྲེམས་སྟོན་སྐོར་ངོ་སྤྲོད་གནང་རྗེས་དམིགས་བསལ་སྐུ་མགྲོན་ཚེ་རིང་དབང་རྒྱལ་ཤར་བ་ལགས་ཀྱིས་ཕྱི་ལོའི་དུས་རབས་བཅུ་བདུན་པའི་སྨད་ཙམ་ནས་ཡེ་ཤུའི་ཆོས་ལུགས་སྤེལ་མཁན་གཙོས་པའི་ཕྱི་གླིང་བ་ཚོས་བོད་ཀྱི་ས་ཁྲ་བཀོད་བྲིས་ཀྱི་ལས་གཞི་དབུ་འཛུགས་ཀྱིས་དུས་ཀྱི་བརྒྱུད་རིམ་ཁྲོད་བོད་ཀྱི་ས་ཁྲའི་འཕེལ་རིམ་འགྱུར་ལྡོག་དང་ངོས་འཛིན་བྱ་ཕྱོགས་སྐོར་ངོ་སྤྲོད་གསལ་བཤད་དང་། ས་ཁྲ་འགོད་ལས་ལ་ཡར་རྒྱས་གཏོང་ཕྱོགས་སྐོར་དགོངས་ཚུལ་གསུངས་ཡོད།
སྐུ་མགྲོན་གཙོ་བོ་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་བོད་ཀྱི་ས་ཁྲའི་དུས་ཐུང་འགྲེམས་སྟོན་དང་འབྲེལ་ཏེ། ཐེངས་འདིའི་ས་ཁྲའི་འགྲེམས་སྟོན་དེ་བཞིན་ས་ཁྲ་རིག་པའི་རྣམ་གཞག་དང་མཐུན་པའི་སྒོ་ནས་བརྗོད་གཞི་བདམས་ཏེ་འགྲེམས་སྟོན་ཞུས་པ་ཞིག་ཡིན་སྐོར་དང་། དེ་ལས་འཕྲོས་ཏེ་ཁོང་མོས་གདོད་མའི་དུས་ཀྱི་ས་མཚམས་སྟོན་པའི་ས་ཁྲའི་རི་མོ་ནས་འགོ་འཛུགས་ཀྱིས་དེང་རབས་ས་ཁྲའི་འགོད་ལས་བར་དུ་ས་ཁྲ་བཀོད་བྲིས་བྱེད་ཕྱོགས་ལ་འགྱུར་བ་ཧ་ཅང་ཆེན་པོ་ཕྱིན་ཡོད་ཅིང་། སྔ་མོ་ཡིན་ན་ཚོང་དང་དམག་དོན་ཆེད་ས་ཁྲ་འབྲི་བཀོད་བྱེད་མོད། རིམ་བཞིན་ཆབ་སྲིད་དང་། མི་འབོར། ས་ཁྱོན་དབང་འཛིན་བྱ་རྒྱུའི་དགོས་མཁོའི་སླད་ས་ཁྲ་འབྲི་འགོ་བཙུགས་ཡོད་ལ། ལྷག་པར་དུ་ཆབ་སྲིད་ཀྱི་དགོས་མཁོའི་སླད་རྒྱལ་ཁབ་ཀྱི་ས་མཚམས་གཏན་འབེབས་ཀྱིས་རྒྱལ་ཁབ་ཅིག་གི་ངོ་བོ་མཚོན་ཕྱིར་ས་ཁྲ་གལ་གནད་ཆེན་པོ་ཆགས་ཡོད་ཅེས་གསུངས་ཡོད།
དེ་བཞིན་ཁོང་མོས་མུ་མཐུད་འཛམ་བུ་གླིང་སྤྱི་དང་། རྒྱལ་ཁབ་བྱེ་བྲག་པ་སོ་སོའི་ལོ་རྒྱུས་ཀྱི་འཕེལ་རིམ་དང་། ད་ལྟའི་གནས་བབ། མ་འོངས་ཁ་ཕྱོགས་གང་དུ་འགྱུར་མིན་ཐད་ས་ཁྲའི་རིག་པའི་ཐོག་ནས་གོ་རྟོགས་སྤེལ་ན་ནུས་པ་ཆེན་པོ་ཐོན་ངེས་ཡིན་པ་མ་ཟད། གཞིས་བྱེས་གཉིས་ཀྱི་བོད་མི་རྣམས་ལ་ས་ཁྲའི་རིག་པའི་སྐོར་གོ་རྟོགས་སྤེལ་ཐུབ་ན། དེང་རབས་འཕྲུལ་རིག་གི་དུས་སུ་དགེ་མཚན་ཆེན་པོ་ཡོད་སྐོར་ངོ་སྤྲོད་གནང་ཡོད་པ་རེད།
སྤྱིར་བོད་ཀྱི་ས་ཁྲའི་དུས་ཐུང་འགྲེམས་སྟོན་དེ་བཞིན་ནང་གསེས་སྡེ་ཚན་བཞིར་ཕྱེས་ཏེ་འགྲེམས་སྟོན་གནང་བཞིན་ཡོད་ཅིང་། དེའི་ནང་ནས་སྡེ་ཚན་དང་པོར་དུས་རབས་བཅུ་བདུན་པའི་སྨད་ནས་དུས་རབས་བཅུ་དགུ་པའི་སྨད་བར་གྱི་བོད་ཀྱི་ས་ཁྲ་དང་། སྡེ་ཚན་གཉིས་པར་ཕྱི་ལོ་ ༡༩༠༤ ནས་ཕྱི་ལོ་ ༡༩༡༨ བར་གྱི་བོད་ཀྱི་ས་ཁྲ། སྡེ་ཚན་གསུམ་པར་ཕྱི་ལོ་ ༡༩༥༠ རྗེས་ནས་ཕྱི་ལོ་ ༡༩༨༡ བར་གྱི་བོད་ཀྱི་ས་ཁྲ། སྡེ་ཚན་བཞི་པར་ལྷ་སའི་ས་ཁྲ་བཅས་ཡིན་ལ། འགྲེམས་སྟོན་ནང་ཁྱོན་ས་ཁྲ་གྲངས་ ༤༢ འགྲེམས་གཤོམ་གནང་ཡོད་པ་བཅས།། 
