༄༅། །ཕྱི་ལོ་ ༢༠༢༣ ཟླ་ ༠༨ ཚེས་ ༡༡ རེས་གཟའ་པ་སངས་ཉིན་བཞུགས་སྒར་རྡ་སར་རྟེན་གཞི་བྱས་པའི་བོད་ཀྱི་ཟློས་གར་ཚོགས་པའི་ཚོགས་ཁང་དུ་བོད་ཀྱི་ཟློས་གར་ཚོགས་པ་དབུ་བརྙེས་ནས་མི་ལོ་ ༦༤ འཁོར་བའི་དུས་དྲན་དང་བསྟུན་རྒྱ་ལུ་རུ་ཁག་དང་རྔོན་པ་རུ་ཁག་གཉིས་དབར་རྐང་བྲོ་གླུ་གཞས་འགྲན་བསྡུར་གནང་སྟེ་རྔོན་པ་རུ་ཁག་ལ་ཐེངས་འདིའི་རྐང་བྲོ་གླུ་གཞས་ཀྱི་རྒྱལ་ཁ་ཐོབ་ཡོད།
དེ་ཡང་གོང་ཚེས་ཉིན་གྱི་ཕྱི་དྲོ་ཆུ་ཚོད་ ༢ ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། དམིགས་བསལ་སྐུ་མགྲོན་ཧིན་བོད་མཛའ་འབྲེལ་ཚོགས་པའི་ཚོགས་གཙོ་ཨ་ཇིཊ་ནེ་རི་ཡ་མཆོག ཁྲིམས་ཞིབ་པ་གཞན་བསྟན་འཛིན་ལུང་རྟོགས་མཆོག ལས་བྱེད་འདེམས་ལྷན་དང་དབུས་འོས་བསྡུ་ལས་ཁུངས་ཀྱི་ཚོགས་གཙོ་དཔེ་ཟུར་དབང་འདུས་ཚེ་རིང་ལགས། བོད་མི་མང་སྤྱི་འཐུས་ཁག་ཅིག ལྷན་ཁང་ཁག་གི་དྲུང་ཆེ་རྣམ་པ། བཞུགས་སྒར་ཁུལ་གྱི་ཚོགས་སྡེ་ཁག་གི་འགན་འཛིན་རྣམ་པ། ཟློས་ཟུར་ཚོགས་མི་རྣམ་པ། གཟུ་དཔང་སོགས་ལྷན་འཛོམས་ཀྱིས་ཐོག་མར་བོད་ཀྱི་ཟློས་གར་ཚོགས་པའི་འགན་འཛིན་དོན་གྲུབ་ཚེ་རིང་ལགས་ཀྱིས་དུས་དྲན་ངོ་སྤྲོད་ཀྱི་གསུང་བཤད་དང་། སྒྱུ་རྩལ་སློབ་ཁྲིད་འགན་འཛིན་ལས་རོགས་བསྟན་འཛིན་ཕུན་ཚོགས་ལགས་ཀྱིས་རུ་ཁག་གཉིས་དབར་རྐང་བྲོ་གླུ་གཞས་འགྲན་བསྡུར་གྱི་གཟུ་དཔང་རྣམས་ངོ་སྤྲོད་གནང་རྗེས་རྒྱ་ལུ་རུ་ཁག་དང་རྔོན་པ་རུ་ཁག་གཉིས་དབར་རྐྱང་གཞས་དང་། འཁྲབ་གཞས། འབྲས་དཀར། དགོད་བྲོའི་གཏམ་གླེང་བཅས་འགྲན་བསྡུར་གནང་མཐར་རྔོན་པ་རུ་ཁག་གིས་རྒྱལ་ཁ་བླངས་སོང་།
དེ་ནས་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་མཆོག་གིས་ལོ་ངོ་ཉི་ཤུ་ཧྲིལ་པོ་འཁོར་བའི་ལས་བྱེད་གཅིག་དང་། བོད་ཀྱི་ཟློས་གར་ཚོགས་པར་ལོ་ངོ་ཉི་ཤུའི་རིང་གཞས་ཚིག་རྩོམ་བྲི་སོགས་ལ་རྒྱབ་སྐྱོར་གནང་མཁན་གཉིས་ལ་ལེགས་གསོལ་ཕྱག་རྟགས། བསླབ་པ་མཐར་སོན་པའི་བྲོ་པ་གཞོན་པ་རྣམས་ལ་ཕྱག་འཁྱེར་གནང་རྗེས་དུས་ཆེན་དང་འབྲེལ་བའི་གསུང་བཤད་གནང་ཡོད། སྐབས་དེར་དཔལ་ལྡན་སྲིད་སྐྱོང་མཆོག་གིས་བོད་ཀྱི་ཟློས་གར་ཚོགས་པ་དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་དུ་བཙན་བྱོལ་ལ་ཕེབས་རྗེས་བོད་ཀྱི་སྲོལ་རྒྱུན་རིག་གཞུང་སྤྱི་དང་། ཡང་སྒོས་ཟློས་གར་རིག་པ་མི་ཉམས་རྒྱུན་འཛིན་གནང་སླད་གསར་འཛུགས་གནང་ཞིང་། དེ་རྗེས་མི་རབས་རྒན་པ་རིམ་བྱོན་གྱིས་བོད་ཀྱི་ཟློས་གར་ཚོགས་པ་ཡར་རྒྱས་གོང་འཕེལ་གཏོང་བར་ཞབས་འདེགས་ཞུས་ཡོད་པས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུས་པའི་མི་རབས་རྒན་པ་རྣམས་ཀྱི་བཀའ་དྲིན་རྗེས་སུ་དྲན་དགོས་པའི་སྐོར་གཞེན་སྐུལ་དང་སྦྲགས། བོད་ཀྱི་ཟློས་གར་ཚོགས་པའི་ནང་བོད་ཀྱི་རྐང་བྲོ་གླུ་གཞས་ཐོག་སྦྱངས་རྩོན་གནང་རྗེས་འཛམ་གླིང་ས་ཕྱོགས་གང་སར་བཞུགས་པའི་ཟློས་ཟུར་རྣམ་པས་གནས་ཡུལ་ས་གནས་སོ་སོར་བོད་ཀྱི་ཟློས་གར་རིག་གཞུང་སློབ་ཁྲིད་ཀྱིས་རྒྱུན་འཛིན་གནང་བཞིན་པར་བསྔགས་བརྗོད་དང་། ཟློས་ཟུར་རྣམས་ནས་ཀྱང་བོད་ཀྱི་ཟློས་གར་ཚོགས་པར་གང་ཐུབ་ཀྱིས་རྒྱབ་སྐྱོར་གནང་དགོས་པའི་འབོད་སྐུལ་གནང་ཡོད།
དེ་བཞིན་དཔལ་ལྡན་སྲིད་སྐྱོང་མཆོག་གིས་འདི་ལོ་ཕྱི་རྒྱལ་ནས་སློབ་མ་བརྒྱད་དབྱར་དུས་ཀྱི་གུང་སེང་དང་བསྟུན་བོད་ཀྱི་ཟློས་གར་ཚོགས་པར་རྐང་བྲོ་གླུ་གཞས་སྦྱོང་བར་ཕེབས་པ་རྣམས་ལ་ལེགས་གསོལ་བསྔགས་བརྗོད་གནང་བ་དང་ཆབས་ཅིག ཕྱི་རྒྱལ་ནང་ཡོད་པའི་བོད་ཕྲུག་རྣམས་ནས་བོད་ཀྱི་རྐང་བྲོ་གླུ་གཞས་སློབ་སྦྱོང་བྱ་རྒྱུའི་གོ་སྐབས་ཡོད་པས་གོ་སྐབས་དམ་འཛིན་གནང་གལ་ཆེ་བ་མ་ཟད། འདི་ལོར་དབྱར་དུས་ཕྱི་རྒྱལ་ནང་གི་བོད་ཕྲུག་མང་དག་ཅིག་བཞུགས་སྒར་རྡ་རམ་ས་ལར་ཕེབས་ཏེ་བོད་ཀྱི་རིག་གཞུང་དང་། བོད་དོན་འཐབ་རྩོད་སྐོར་ཉམས་མྱོང་རྒྱུས་ལོན་གང་ལེགས་ལེན་ཐུབ་པ་བྱུང་ཡོད་ལ། ལྷག་པར་དུ་ཕྱི་དྲིལ་ལས་ཁུངས་ཀྱི་གོ་སྒྲིག་འོག་རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་ཞིག་བསྐོང་ཚོགས་གནང་སྟེ་བོད་མི་གཞོན་སྐྱེས་བརྒྱ་ལྷག་མཉམ་ཞུགས་ཀྱིས་བོད་དོན་ཞུ་གཏུག་གནང་ཕྱོགས་སྐོར་གྲོས་བསྡུར་གནང་ཡོད་སྐོར་གསུངས། དེ་དང་འབྲེལ་ཏེ་དཔལ་ལྡན་སྲིད་སྐྱོང་མཆོག་གིས་བཀའ་ཤག་སྐབས་བཅུ་དྲུག་པའི་ངོས་ནས་མི་རབས་གཞོན་པ་རྣམས་བོད་ཀྱི་མ་འོངས་འཐབ་རྩོད་རྒྱུན་སྐྱོང་བྱེད་མཁན་ཡིན་སྟབས་འགན་ཁུར་ཐུབ་མཁན་གྱི་གཞོན་སྐྱེས་གསོ་སྐྱོང་བྱ་རྒྱུ་དེ་འགན་ཁྲི་ཆེན་པོར་བརྩིས་ཏེ་ལོ་ལྟར་གཞོན་སྐྱེས་བརྒྱ་ལྷག་མཉམ་ཞུགས་ཀྱིས་ཚོགས་བསྡུ་བསྐོང་ཚོགས་གནང་འཆར་ཡོད་ལ། དེ་བརྒྱུད་ལོ་བཅུའི་ནང་གཞོན་སྐྱེས་སྟོང་ཕྲག་གཅིག་ཙམ་བོད་ཀྱི་འཐབ་རྩོད་ཐོག་འགན་ཁུར་ཐུབ་མཁན་ཆགས་རེ་ཡོད་སྐོར་གསུངས།
གཞན་ཡང་སྲིད་སྐྱོང་མཆོག་གིས་བཀའ་ཤག་ངོས་ནས་ཆབ་སྲིད་ཁོ་ན་མིན་པར་རིག་གཞུང་དང་། རྩེད་རིགས། སྒྱུ་རྩལ་སོགས་བརྒྱུད་བོད་དོན་གོ་རྟོགས་སྤེལ་རྒྱུར་གལ་གནད་ཆེན་པོ་བརྩི་བཞིན་ཡོད་སྐོར་གསུངས་རྗེས་མཐར་བོད་ཀྱི་ཟློས་གར་ཚོགས་པའི་འགོ་ལས་ཡོངས་ནས་བོད་ཀྱི་རིག་གཞུང་རྒྱུན་འཛིན་ཐད་ཞབས་འདེགས་སྒྲུབ་པར་ཐུགས་རྗེ་ཆེ་ཞུས་ཡོད་པ་བཅས།། 
