༄༅། །ཕྱི་ལོ་ ༢༠༢༣ ཟླ་བ་ ༠༨ ཚེས་ ༡༧ ཉིན་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ན་གཞོན་རོགས་སྐྱོར་ཚན་པས་གོ་སྒྲིག་ཞུས་པའི་ཨེ་མ་ཛོན་དྲྭ་ཐོག་བརྡ་འཕྲུལ་ཞབས་ཞུའི་ལས་རིགས་སྦྱོང་བརྡར་ཐེངས་གསུམ་པ་རྡ་ས་འཛིན་སྐྱོང་སྦྱོང་བརྡར་བསྟི་གནས་ཁང་དུ་དབུ་འཛུགས་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩:༣༠ ཐོག་ཟབ་སྦྱོང་དབུ་འབྱེད་ཀྱི་མཛད་སྒོའི་སྐུ་མགྲོན་གཙོ་བོར་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་དང་། དྲུང་འཕར་བསྟན་འཛིན་ནོར་བུ་ལགས། དྲུང་འཕར་བྱམས་པ་ཕུན་ཚོགས་ལགས། སློབ་སྟོན་པ་ས་ཝན་ཤ་ཇེན་ལགས། ནང་སྲིད་ལས་ཁུངས་ཀྱི་འབྲེལ་ལས་རྣམ་པ། ཟབ་སྦྱོང་བ་བཅས་ཚང་འཛོམས་ཀྱི་ཐོག་མར་ཟབ་སྦྱོང་གི་འབྲེལ་མཐུད་པ་བསོད་ནམས་བཀྲ་ཤིས་ལགས་ནས་ཟབ་སྦྱོང་གི་དམིགས་ཡུལ་དང་དགོས་པ་རྒྱུ་མཚན་ངོ་སྤྲོད་གནང་རྗེས་ཟབ་སྦྱོང་བ་རེ་རེ་ནས་ངོ་སྤྲོད་གནང་ཞིང་། དེ་རྗེས་སྐུ་མགྲོན་གཙོ་བོ་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་ནས་ཟབ་སྦྱོང་དང་འབྲེལ་ཏེ། ཏོག་དབྱིབས་གཉན་རིམས་ཀྱི་དུས་ཚོད་རྗེས་འཛམ་བུ་གླིང་སྤྱི་ཡོངས་ཀྱི་ལས་ཀའི་རྣམ་པར་འགྱུར་བ་ཕྱིན་ཏེ་དྲྭ་ཐོག་ལས་ཀའི་སྲོལ་རྒྱུན་དར་ཡོད་སྟབས། དེ་དང་མཐུན་པའི་ལས་རིགས་སྦྱོང་བརྡར་བྱ་རྒྱུ་དུས་ཀྱི་དགོས་མཁོ་ཡིན་གཤིས། ནང་སྲིད་ལས་ཁུངས་ནས་དེ་འབྲེལ་ཨེ་མ་ཛོན་དྲྭ་ཐོག་བརྡ་འཕྲུལ་ཞབས་ཞུ་གནང་ཕྱོགས་ཀྱི་སྦྱོང་བརྡར་གནང་བཞིན་ཡོད་སྐོར་དང་། དེ་ལས་འཕྲོས་ཏེ་ཁོང་གིས་བོད་རིགས་གཞོན་སྐྱེས་རྣམས་ནས་འགན་ཁུར་ཏེ་སྤྱི་ཚོགས་ལ་ཕན་པའི་ལས་ཀ་བྱེད་དགོས་པ་མ་ཟད། བོད་མི་རིགས་ཀྱི་འགན་ཁུར་ཐུབ་པ་དགོས་ཞེས་གསུངས།
དེ་བཞིན་ཁོང་གིས་གླ་ཕོགས་ཆེ་བའི་ལས་རིགས་ཐོབ་ནའང་དངུལ་སྒོར་ཁོ་ནས་མི་ཚེར་བདེ་སྐྱིད་བསྐྲུན་མི་ཐུབ་པས་འདོད་ཆུང་ཆོག་ཤེས་དགོས་གལ་དང་། བོད་ཕྲུག་རྣམས་ལ་སློབ་སྦྱོང་བྱ་རྒྱུའི་གོ་སྐབས་ཐོབ་པ་ནི་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། བོད་མིའི་སྒྲིག་འཛུགས། རང་ཉིད་ཀྱི་ཕ་མའི་བཀའ་དྲིན་ལ་བརྟེན་ཡོད་པས་བཀའ་དྲིན་བསམ་ཤེས་དགོས་རྒྱུ་གལ་གནད་ཆེན་པོ་ཡིན་ཞེས་དང་། ཕྱོགས་མཚུངས་ཟབ་སྦྱོང་བ་རྣམས་ནས་ཟབ་ཁྲིད་རིང་རིག་པ་འགྲིམས་ཏེ་ཧུར་བརྩོན་བྱས་ན་མ་འོངས་པར་ལས་ཀ་ཡག་པོ་རག་པའི་རེ་བ་ཆེན་པོ་ཡོད་སྐོར་གསུངས་ཡོད་པ་རེད།
སྤྱིར་ནང་སྲིད་ལས་ཁུངས་ཀྱི་ན་གཞོན་རོགས་སྐྱོར་ཚན་པས་གོ་སྒྲིག་ཞུས་པའི་ཐེངས་འདིའི་ཨེ་མ་ཛོན་བརྡ་འཕྲུལ་ཞབས་ཞུའི་ལས་རིགས་སྦྱོང་བརྡར་ནང་མི་གྲངས་ ༡༣ མཉམ་ཞུགས་གནང་ཡོད་ཅིང་། ཟབ་སྦྱོང་འདི་བཞིན་ཕྱི་ལོ་ ༢༠༢༣ ཟླ་བ་ ༠༨ ཚེས་ ༡༧ ནས་ཟླ་བ་ ༠༨ ཚེས་ ༣༠ བར་འཚོག་གི་ཡོད་ལ། དེ་འཕྲོས་དྲྭ་ལམ་བརྒྱུད་སློབ་ཁྲིད་གནང་གི་ཡོད་པ་བཅས།། 
