༄༅། །འདི་གར་ཀུལ་ལུ་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། ནང་སྲིད་ལས་ཁུངས་ནས་ཐུགས་འཚབ་ཀྱིས་བཀོད་མངགས་ཕེབས་པ་བཞིན་ནང་སྲིད་ལས་ཁུངས་ཀྱི་དྲུང་འཕར་བསྟན་འཛིན་ནོར་བུ་ལགས་དང་ཨར་བཟོ་ཁྱད་ལས་པ་བསྟན་འཛིན་དབང་རྒྱལ་རྣམ་པ་གཉིས་ཕྱི་ལོ་ ༢༠༢༣ ཟླ་ ༠༨ ཚེས་ ༠༣ ནས་ཚེས་ ༠༥ བར་ཁྱོན་ཉིན་གྲངས་ ༣ རིང་འདི་ག་ཀུ་ལུ་རྫོང་ཁོངས་བོད་མི་འདུ་སྡོད་ཁག་ཏུ་ཉེ་འཆར་ཆར་ཞོད་རྐྱེན་པས་བྱུང་བའི་གོད་ཆགས་ཀྱི་གནོད་སྐྱོན་བྱུང་བ་རྟོགས་ཞིབ་སླད་ས་གནས་ས་ཐོག་ཏུ་ཕེབས་ཡོད།

དེ་ཡང་རྟོགས་ཞིབ་གཟིགས་སྐོར་གྱི་ཉིན་དང་པོ་སྟེ་ཕྱི་ལོ་ ༢༠༢༣ ཟླ་བ་ ༠༨ ཚེས་ ༠༣ ཉིན་རྡོ་སྦི་དཔལ་རབ་གླིང་གཞིས་ཆགས་སུ་ཆར་ཞོད་རྐྱེན་པས་ཆུ་ལོག་གི་གོད་ཆགས་ཤུགས་རྐྱེན་ཇི་བྱུང་ལ་རྟོགས་ཞིབ་དང་། ས་གནས་སུ་ཆུ་ལོག་གི་དཀའ་ངལ་འགོག་ཐབས་སུ་ཆུ་འགོའི་སར་གཟིགས་སྐོར་གནང་ཡོད་པ་མ་ཟད། ཀུ་ལུ་རྫོང་ཁོངས་སུ་གནས་སྡོད་བོད་མི་དང་བྱུང་བའི་གོད་ཆགས་ཕོག་མཁན་དཔལ་རབ་གླིང་མི་མང་ཁག་ཅིག་དང་ལྷན་གོ་བསྡུར་གནང་ཡོད། ཉིན་རྒྱབ་ནས་མ་ན་ལི་བདེ་སྐྱིད་གླིང་དུ་ཆར་ཞོད་རྐྱེན་པས་བོད་མི་སྡོད་ཁང་གི་རྒྱབ་ངོས་ནས་བྲག་རྡོ་ལྷུང་ཉེན་ཡོད་སར་གཟིགས་ཞིབ་གནང་ཡོད་ལ་དེ་གའི་མི་མང་ལྷན་དུའང་གྲོས་བསྡུར་གནང་ཡོད།

ཕྱི་ལོ་ ༢༠༢༣ ཟླ་བ་ ༠༨ ཚེས་ ༠༥ སྟེ་གཟིགས་སྐོར་ཉིན་གསུམ་པར་ཀུ་ལུ་གཡུ་ལོ་བཀོད་བོད་མི་འདུ་སྡོད་ས་གནས་ཁག་ཏུ་ཉེ་འཆར་ཆར་ཞོད་རྐྱེན་པས་ཆུ་ལོག་གིས་གོད་ཆགས་བྱུང་བའི་ས་གནས་སྤྱི་ཡོངས་ཀྱི་ས་བབ་གནས་སྟངས་དང་སྒོས་སུ་ཆུ་ལོག་རྐྱེན་པས་གཞིས་མི་འགའ་ཞིག་གི་སྡོད་ཁང་རྨང་རྩིགས་ཆག་འཇིག་སོང་བ་ཁག་ལ་རྟོགས་ཞིབ་མཐིལ་ཕྱིན་གནང་ཡོད་པ་དང་། སྒོས་སུ་དེ་གའི་མི་མང་དང་ལྷན་གྲོར་བསྡུར་གནང་རྗེས་ཉིན་རྒྱབ་ནས་བྷུན་ཏར་ཕུན་ཚོགས་རབ་བརྟན་གླིང་དུ་ཆུ་ལོག་གི་བྱུང་བའི་གོད་ཆགས་བྱུང་མེད་རུང་དེ་གའི་བརྒྱ་དཔོན་དང་མི་མང་ནས་གཟིགས་སྐོར་ཕེབས་གནང་ཡོང་བ་ཞུས་དོན་ལྟར་དེ་གའི་ས་གནས་སུའང་ཆེད་ཕེབས་ཀྱིས་དེ་གའི་གནད་ཡོད་རྣམས་ནས་ལས་འཆར་ཁག་ཅིག་ཐད་ནང་སྲིད་ལས་ཁུངས་དང་འཕྲོད་བསྟེན་ལས་ཁུངས་ནས་མཐུན་གྱུར་ཡོང་བའི་ལམ་སྟོན་ཞུས་པ་བཞིན་འཐུས་མིན་གྲོས་བསྡུར་གནང་ཞོར་དུ་ས་ཐོག་ཏུའང་གཟིགས་ཞིབ་གནང་ཡོད།

མཐའ་དོན་ནང་སྲིད་ལས་ཁུངས་ཀྱི་དྲུང་འཕར་བསྟན་འཛིན་ནོར་བུ་ལགས་དང་ཨར་བཟོ་ཁྱད་ལས་པ་བསྟན་འཛིན་དབང་རྒྱལ་རྣམ་པ་གཉིས་འདི་ག་ས་གནས་སུ་ཉེ་འཆར་ཆུ་ལོག་གི་གོད་ཆགས་ཇི་བྱུང་ཁག་རྟོགས་ཞིབ་སླད་ཕེབས་ཡོད་རུང་། འདི་གར་གོད་ཆགས་བྱུང་བའི་ཁ་ཐོར་མི་མང་རྣམས་ཀྱིས་དེ་འདྲའི་ཆུ་ལོག་གི་དཀའ་ངལ་གཏན་དུ་སེལ་སླད་ད་ཡོད་དཔལ་ལྡན་བཀའ་ཤག་གི་དགོངས་དོན་ལྟར་གཞིས་སྤོས་ལས་གཞི་ནང་མཉམ་ཞུགས་བྱ་དགོས་པའི་དགེ་ཚན་དང་དེའི་རྒྱབ་ལྗོངས་ཀྱི་དགོས་དམིགས་ཇི་ཡིན་སྐོར་འདི་ག་མི་མང་རྣམས་ལ་ལམ་སྟོན་དང་གོ་རྟོགས་གང་ལེགས་སྤེལ་གནང་ཡོད་པ་བཅས།།