༄༅། །ཕྱི་ལོ་ ༢༠༢༣ ཟླ་བ་ ༨ ཚེས་ ༢༨ ཉིན་བོད་མིའི་སྒྲིག་འཛུགས་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་བོད་མིའི་གཞི་རིམ་མཉམ་འབྲེལ་ཁག་བཅོ་ལྔའི་འཛིན་སྐྱོང་ཚོགས་ཆེན་ཐེངས་ ༢༢ དབུ་འབྱེད་མཛད་སྒོར་སྐུ་མགྲོན་གཙོ་བོར་མགྲོན་འབོད་གནང་དོན་བཞིན་དྲུང་ཆེ་ལྷན་དུ་ནང་སྲིད་དྲུང་འཕར་བྱམས་པ་ཕུན་ཚོགས་ལགས་ཕེབས་བཅར་ཞུས་ཡོད།

དེ་ཡང་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་གོང་ཚོས་ཉིན་གྱི་སྔ་དྲོ་ཚུ་ཚོད་ ༩།༣༠ ཐོག་ལུགས་བསམ་མཉམ་འབྲེལ་ཚོགས་ཁང་དུ་བོད་མིའི་གཞི་རིམ་མཉམ་འབྲེལ་ཁག་བཅོ་ལྔའི་འཛིན་སྐྱོང་ཚོགས་ཆེན་ཐེངས་ ༢༢ དབུ་འབྱེད་མཛད་སྒོར་སྐུ་མགྲོན་གཙོ་བོར་མགྲོན་འབོད་གནང་དོན་བཞིན་དྲུང་ཆེ་དཔལ་ལྡན་དོན་གྲུབ་ལགས་ལགས་མཛད་སྒོར་ཆེད་ཕེབས་ཀྱིས་གསུང་བཤད་གནང་།མཛད་སྒོ་གྲུབ་མཚམས་ནང་སྲིད་དྲུང་ཆེ་དང་དྲུང་འཕར་རྣམ་གཉིས་ལོ་ཆུང་བྱིས་པའི་སློབ་གསོ་དང་། གསོ་སྐྱོང་ལས་གཞི། ༼Early Child Care and Education (ECCE)༽ ལས་འཆར་འོག་ཡོད་པའི་ལུགས་བདེ་གཉིས་ཀྱི་ཁྱབ་ཁོངས་བུ་བཅོལ་ཁང་དུ་འཚམས་གཟིགས་གནང་། དང་ཐོག་བདེ་སླར་ཁྱབ་ཁོངས་བུ་བཅོལ་ཁང་དུ་འཚམས་གཟིགས་དང་། དེ་རྗེས་ལུགས་བསམ་ཁྱབ་ཁོངས་ཀེ་ལཤ་སྤུ་ར་དང་ཨར་ལི་ཀུ་མ་རི་བུ་བཅོལ་ཁང་གཉིས་སོ་སོར་གཟིགས་རྟོགས་གནང་།

ཉིན་རྒྱབ་ཚུ་ཚོད་ ༢ ཐོག་ནང་སྲིད་དྲུང་ཆེ་དང་དྲུང་འཕར་རྣམ་གཉིས་ཀྱིས་གཙོས་ལུགས་བདེ་གཉིས་ཀྱི་ས་གནས་འགོ་འཛིན་བཅས་ལུགས་བསམ་ཁྱབ་ཁོངས་ཚེ་རིང་དགེ་འཕེལ་གླིང་བགྲེས་ཤག་ཏུ་ཚོགས་ཁང་གསར་རྒྱག་གི་ལས་གཞི་འགྲོ་མུས་ཡིན་པར་གཟིགས་རྟོགས་གནང་སྐབས་མ་འོངས་ལས་དོན་བྱེད་ཕྱོགས་ཐོག་བཀའ་སྡུར་དང་ལམ་སྟོན་གནང་ཡོད་པ་བཅས།།