༄༅། །ཕྱི་ལོ་ ༢༠༢༣ ཟླ་བ་ ༠༨ ཚེས་ ༠༡ ཉིན་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་འཚེ་བ་མེད་པའི་ཐེབས་རྩ་ཁང་གིས་གོ་སྒྲིག་འོག་རྒྱ་ནག་གཅིག་ཅེས་པའི་སྲིད་བྱུས་ཀྱི་དྲག་རྩུབ་ཅེས་པའི་བརྗོད་གཞི་ལྡན་པའི་ཚོགས་འདུའི་ཐོག་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་ནག་གཅིག་ཅེས་པའི་སྲིད་བྱུས་དེ་བོད་ལ་ནམ་ཡང་འཇུག་ཐབས་མེད་སྐོར་གསུང་བཤད་གནང་ཡོད་པ་རེད།
དེ་ཡང་ཚོགས་ཐུན་དང་པོའི་གཙོ་སྐྱོང་གཞུང་ཚབ་ཆེན་མོ་མེ་རོ་ཏྲ་(L.L Mehrotra)ལགས་ཀྱིས་གཙོ་སྐྱོང་དང་འབྲེལ་དབུ་འབྱེད་གསུང་བཤད་གནང་སྐབས་ད་ཆ་རྒྱ་ནག་སྟོབས་ཆེན་རྒྱལ་ཁབ་ཅིག་ཏུ་གྱུར་ཏེ་འཛམ་བུ་གླིང་གི་ཞི་བདེ་བདེ་འཇགས་ཀྱི་ཉེན་ཁར་གྱུར་ཡོད་པ་མ་ཟད། ལྷག་པར་རྒྱ་ནག་གིས་བོད་བཙན་བཟུང་བྱས་རྗེས་རྒྱ་གར་གྱི་རྒྱལ་མཚམས་བདེ་འཇགས་ལའང་ཉེན་ཚབས་ཆེན་པོ་བཟོས་དང་བཟོ་བཞིན་ཡོད་སྐོར་འགྲེལ་བརྗོད་གནང་ཡོད།
དེ་རྗེས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གསུང་བཤད་གནང་སྐབས་རྒྱ་ནག་གཅིག་ཅེས་པའི་སྲིད་བྱུས་དེ་བོད་དང་འབྲེལ་བ་མེད་ཅེས་གསུངས་ཐོག སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དམིགས་བསལ་སྐུ་ཚབ་རྒྱ་རི་རིན་པོ་ཆེ་མཆོག་གི་ཕྱག་དེབ་ལས་གསུང་དུམ་ལུང་འདྲེན་གནང་སྟེ། རྒྱ་ནག་གཅིག་གི་སྲིད་བྱུས་དེ་བཞིན་རྒྱ་ནག་དང་ཐའི་ཝན་གྱི་འབྲེལ་བར་དམིགས་པའི་སྲིད་བྱུས་ཤིག་ཡིན་ཞིང་། དེ་ཉིད་ཕྱི་ལོ་ ༡༩༧༠ ཙམ་ནས་ཨ་རིས་རྒྱ་ནག་དང་ཐའི་ཝན་གྱི་འབྲེལ་བར་ངོས་འཛིན་བྱེད་ཕྱོགས་ཀྱི་སྲིད་བྱུས་ཤིག་ལས་གྲུབ་ལ། ཕྱིས་སུ་རྒྱ་ནག་གི་འགོ་ཁྲིད་རིམ་པས་རྒྱལ་ཁབ་གཞན་དང་འབྲེལ་བ་བྱེད་སྐབས་རྒྱ་ནག་གཅིག་གི་སྲིད་བྱུས་ལ་ངོས་འཛིན་བྱ་དགོས་པའི་བཙན་སྐུལ་བཏང་ཡོད་པ་མ་ཟད། ལྷག་པར་དུ་རྒྱ་ནག་གཞུང་གིས་རྒྱ་ནག་གཅིག་གི་སྲིད་བྱུས་དེ་བོད་ལ་འཇུག་ཚུལ་རྒྱལ་སྤྱིའི་སྤྱི་ཚོགས་ལ་ལོག་འགྲེལ་བྱས་ཏེ་རྒྱལ་ཁབ་གཞན་ནས་བོད་དང་འབྲེལ་བ་བྱེད་པར་དམ་བསྒྲགས་ཆེ་རུ་བཏང་ཡོད་སྐོར་འགྲེལ་བརྗོད་གནང་ཡོད།
དེ་བཞིན་དཔལ་ལྡན་སྲིད་སྐྱོང་མཆོག་གིས་རྒྱ་ནག་མི་མང་སྤྱི་མཐུན་རྒྱལ་ཁབ་དང་བོད་བར་གྱི་འབྲེལ་བའི་འཕེལ་རིམ་སྤྱི་དང་། ཡང་སྒོས་ཕྱི་ལོ་ ༡༩༥༡ ལོར་བཙན་ཤེད་འོག་བཞག་པའི་ཆིངས་ཡིག་དོན་ཚན་བཅུ་བདུན་གྱི་ནང་དོན་བོད་ཀྱི་ཕྱི་འབྲེལ་དང་བདེ་སྲུང་ཕུད་བོད་ཀྱི་ཆོས་སྲིད་ཀྱི་གནས་བབ་སྔར་ཡོད་རང་གནས་འཇོག་རྒྱུའི་ཁས་ལེན་བྱས་ཏེ། ཐོག་མར་བོད་མི་དང་བསྟུན་མཁས་བྱས་ཀྱང་རིམ་པས་རྒྱ་ནག་གིས་ཆིངས་ཡིག་གི་ནང་དོན་ལ་བརྩིས་མེད་རྡོག་རོལ་བཏང་ཡོད་སྐོར་གསུངས། དེ་བཞིན་ཁོང་གིས་རྒྱ་དཀར་ནག་དང་། ཨ་རི་དང་རྒྱ་ནག་གི་འབྲེལ་བའི་འཕེལ་རིམ་ངོ་སྤྲོད་དང་། རྒྱལ་སྤྱིའི་ཁྲིམས་ཡིག་ཁག་བོད་ལ་གཅིག་མཚུངས་ལག་བསྟར་བྱས་ཐོག་རྒྱལ་སྤྱིའི་སྤྱི་ཚོགས་ནས་བོད་དེ་ལོ་རྒྱུས་ཐོག་རང་བཙན་རྒྱལ་ཁབ་ཅིག་ཏུ་ངོས་འཛིན་གནང་དགོས་སྐོར་གསུངས་ཡོད་པ་བཅས།།
