༄༅། །ཕྱི་ལོ་ ༢༠༢༣ ཟླ་བ་ ༨ ཚེས་ ༡༨ ནས་ ༢༠ བར་ཉིན་གསུམ་རིང་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་དང་ཐའེ་སྡོད་བོད་རིགས་ཚོགས་པ་ཐའེ་ཝན་ཤར་ལྷོ་ཕྱོགས་སུ་ཡོད་པའི། ཕིང་སྟོང་སྒོ་གསོག་ཀུན་ཕན་གླིང་དགོན་པ། ཡུན་གླིང་སྒོ་གསོག་བྱང་ཆུབ་གླིང་དགོན་པ་ཐུན་མོང་ནས་ཐའེ་ཝན་གནས་བཞུགས་བོད་ཕྲུག་ལོ་ན་ ༣ ནས་ ༡༨ བར་ལ་དབྱར་ཁའི་གུང་གསེང་རིང་བོད་ཀྱི་ཆོས་དང་རིག་གཞུང་ངོ་སྤྲོད་སྐོར་སྐྱོད་ཀྱི་གླིང་ཀ་ཞིག་གོ་སྒྲིག་ཞུས་ཡོད་པ་རེད།
ལས་གཞི་དེར་མཉམ་བཞུགས་གནང་མཁན་ཐའེ་ཝན་གནས་བཞུགས་བོད་ཕྲུག་ཆུང་ཤོས་ལོ་ན་ ༤ དང་ཆེ་ཤོས་ལོ་ན་ ༡༦ ཡིན་པ་བུ་གྲངས་ ༡༢ དང་བོུ་གྲངས་ ༩ བཅས་ཁྱོན་བསྡོམས་ཕྲུ་གུ་གྲངས་ ༢༡ བྱུང་ཡོད་ཅིང་། ཐའེ་ཝན་དོན་གཅོད་ལས་ཁུངས་ཀྱི་ལྟ་སྒྲུབ་རྒན་བསྟན་འཛིན་རྣམ་གྲོལ་རིན་པོ་ཆེ་དང་སྒོ་གསོག་ཀུན་ཕན་གླིང་དགོན་པའི་ཕྱུག་པོ་རིན་པོ་ཆེ་རྣམ་གཉིས་ནས་བོད་ཕྲུག་རྣམས་ལ་ནང་ཆོས་ཀྱི་རྨང་གཞི་ཉིན་ལྟར་དཀོན་མཆོག་གསུམ་ལ་ཡོན་ཆབ་དང་། སྤོས། མར་མེ་སོགས་འབུལ་སྟངས་དང་ཕྱག་འཚལ་སྟངས་སོགས་ཀྱི་དགོས་པ་རྒྱུ་མཚན་དང་བསམ་བློ་གཏོང་སྟངས་བཅས་འགྲེལ་བརྗོད་གནང་ཡོད་པ་མ་ཟད། ཕྲུ་གུའི་ཕ་མ་དང་ལས་བྱེད་རྣམས་ཀྱི་བོད་ཟས་མོག་མོག་བཟོ་སྟངས་ཕྲུ་གུ་ཚོར་དངོས་སུ་སློབ་པ་དང་ལག་བསྟར་བྱས་བཅུག་པ་དགའ་ཚོར་ཆེན་པོ་བྱུང་ཡོད།
ཉིན་གཉིས་པའི་མཛད་རིམ་དུ་སྔ་དྲོ་ཕྲུ་གུ་རང་ཉིད་ནས་ཡོན་ཆབ་དང་སྤོས་སོགས་འབུལ་དུ་བཅུག་ནས་དགོན་པའི་ནང་མཆོད་མཇལ་ཞུས་པ་དང་ཆབས་ཅིག་སྐུ་བརྙན་ཁག་ངོ་སྤྲོད་ཞུས་པ་དང་། ཞོག་ཟས་མཆོད་རྗེས་ཕིང་སྟོང་སྒོ་གསོག་ཀུན་ཕན་གླིང་དགོན་པ་ནས་ཡུན་གླིང་སྒོ་གསོག་བྱང་ཆུབ་དགོན་པར་འབྱོར་བ་དེ་བཞུགས་དགེ་བཤེས་རྣམ་པས་ཕེབས་བསུ་དང་ཉིང་གུང་ཞལ་ལག་གྲ་སྒྲིག་ཞུས་སོང་། དེ་ནས་ཉིན་རྒྱབ་ཆུ་ཚོད་ ༣།༠༠ པའི་བར་ངལ་གསོ་བརྒྱབ་རྗེས་ཕ་མ་ཕྲུ་གུ་དང་བཅས་པ་དགོན་པའི་འདུ་ཁང་ནང་འཛོམས་ཏེ་དེ་བཞུགས་དགེ་བཤེས་བློ་བསྟན་འཛིན་ལགས་ནས་བོད་ཀྱི་ཆོས་དང་རིག་གཞུང་རྒྱུན་འཛིན་གྱི་གལ་ཆེའི་རང་བཞིན་ངོ་སྤྲོད་ཞུས་པ་དང་། སྐུ་ཚབ་དོན་གཅོད་ནས་ལས་གཞི་འདི་འདྲ་ཞིག་སྤེལ་བར་དགོན་པ་གཙོས་ཕྱོགས་ཚང་མས་རྒྱབ་སྐྱོར་ཚད་ལས་འདས་པ་གནང་བར་ཐུགས་རྗེ་ཆེ་ཞུས།
དེ་རྗེས་དོན་ཁང་གི་ལྟ་གྲུབ་སློབ་དཔོན་བསྟན་འཛིན་རྣམ་གྲོལ་རིན་པོ་ཆེ་དང་ཕྱུག་པོ་རིན་པོ་ཆེ་གཉིས་ནས་མུ་མཐུད་ཕྲུ་གུ་ཚོར་ཆོས་མཇལ་འཁྲིད་པ་དང་མཉམ་དུ་དགོན་པའི་ནང་གི་སྐུ་བརྙན་དང་མཆོད་རྟེན། དཀྱིལ་འཁོར་སོགས་རྒྱ་སྐད་ཐོག་ངོ་སྤྲོད་ཞུས་པ་དང་། དགོན་པའི་རྒྱབ་ལོགས་སུ་རྩེ་ཕོ་བྲང་པོ་ཏཱ་ལ་ཆེན་པོ་ཞིག་ཡོད་པ་ཕྲུ་གུ་ཚོར་དྲི་བ་དང་བཅས་ངོ་སྤྲོད་ཞིབ་ཚགས་ཞུས།
དེ་ནས་དགོན་ཟས་བོད་ལུགས་འཐེན་ཐུག་མཆོད་རྗེས་སྒོར་གཞས་ཁག་ཅིག་འཁྲབ་པ་དང་། དམིགས་བསལ་ཉིན་གསུམ་པར་བྱང་ཆུབ་ཆོས་གླིང་དགོན་པར་སྦྱིན་བསྲེགས་ཆོས་ཚོགས་ཀྱི་མཛད་རིམ་ཞིག་སྒྲིག་ཡོད་པར་ཚུ་ཚོད་ཕྱེད་ཙམ་རིང་ཕྱུག་པོ་རིན་པོ་ཆེ་ནས་ནང་པའི་ལྟ་སྒྲུབ་སྐོར་གསུང་བཤད་གནང་བར་ཕྲུ་གུ་ཚོས་དོ་སྣང་ཆེན་པོས་ཉན་འཇོག་བྱས་ཡོད།
ད་ཐེངས་མཛད་རིམ་དེ་འདྲ་ཞིག་གོ་སྒྲིག་ཞུ་དགོས་པའི་དམིགས་ཡུལ་གཙོ་བོ་ནི་བོད་ཕྲུག་ཚོར་བོད་ཀྱི་ཆོས་དང་། རིག་གཞུང་། སྐད་ཡིག་གི་བག་ཆགས་ཤིག་འཇག་ཆེད་ཡིན་ཅིང་། སྤྱི་སྤྱོད་རླངས་འཁོར་དུ་ཉིན་གང་བོད་ཕྲུག་ཚོས་དགའ་མོས་བྱེད་པའི་ཀ་མེད་གསུམ་བཅུ་གཙོས་པའི་གླུ་གཞས་མཉམ་གཏོང་བྱས་པ་དང་། ཕ་མ་ཚོས་ཀྱང་དེ་འདྲ་བའི་ལས་འགུལ་མུ་མཐུད་སྤེལ་གནང་ཡོང་བའི་རེ་བ་ཤུགས་དྲག་བཏོན་ཡོད་པ་བཅས།
