༄༅། །ཨོསྟྲེ་ལི་ཡར་གནས་སྡོད་བོད་མི་རྣམས་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༨ ལ་ཕེབས་པའི་༸སྐུའི་འཁྲུངས་སྐར་སྲུང་བརྩི་གཟབ་རྒྱས་ངང་ཞུས་ཡོད།

དེ་ཡང་ཁེན་བྷེ་ར་རུ་ཨོསྟྲེ་ལི་ཡཱའི་སྐུ་ཚབ་དོན་ཁང་དང་ཁེན་བྷེ་ར་བོད་རིགས་ཚོགས་པ་ཟུང་སྦྲེལ་གྱིས་ཕྱི་ལོ་ ༢༠༢༣ ཟླ་བ་ ༠༧ ཚེས་ ༠༦ ཉིན་ (Southern Cross Club) ཞེས་པར་༸སྐུའི་འཁྲུངས་སྐར་སྲུང་བརྩི་ཞུས་ཐོག་ ACT མངའ་གཞུང་གི་སྤྱི་ཁྱབ་བློན་ཆེན་དང་རིག་གཞུང་སྣ་མང་བློན་ཆེན་གྱི་སྐུ་ཚབ་ཀྱི་མངའ་སྡེ་གྲོས་ཚོགས་འཐུས་མི་ལྕམ་སྐུ་མ་རི་ས་པི་ཊར་སོན་(Marisa Paterson) མཆོག་གིས་གཅོས་པའི་མངའ་སྡེའི་་གྲོས་ཚོགས་འཐུས་མི་ཨེམ་མ་ཊེ་ཝིཊ་སོན་ (Emma Davidson) ལགས་དང་། མངའ་སྡེའི་གྲོས་ཚོགས་འཐུས་མི་པི་ཊར་ཀེན་ (Peter Cain) ལགས། ཕྱི་འབྲེལ་མི་སྣ་ཁག བོད་དོན་རྒྱབ་སྐྱོར་བ། ས་གནས་བོད་མི་བཅས་ཚང་འཛོམས་གནང་ཡོད། ༸སྐུའི་འཁྲུངས་སྐར་སྲུང་བརྩི་ཞུ་སླད་ཁེན་བྷེ་ར་ས་གནས་བོད་མི་རྣམས་ནས་ཧོན་སུར་རབ་རྒྱས་གླིང་བོད་མིའི་གཞིས་ཆགས་ཀྱི་རྒས་གསོ་ཁང་གི་རྒན་རྒོན་རྣམས་ལ་ལག་རྟགས་དང་། ལ་དྭགས་བསོད་ནམས་གླིང་བོད་མིའི་གཞིས་ཆགས་ཀྱི་མང་ཚོགས་དཔེ་མཛོད་ཁང་དུ་དཔེ་དེབ་མཁོ་ཉོའི་སླད་ཞལ་འདེབས་གནང་ཡོད།

དེ་བཞིན་ཝི་རུ་པ་དབེན་གནས་སུ་ཁེན་བྷེ་ར་བོད་བརྒྱུད་ནང་བསྟན་ཆོས་ཚོགས་ཀྱི་གོ་སྒྲིག་འོག་༸སྐུའི་འཁྲུངས་སྐར་སྲུང་བརྩི་ཞུས་ཡོད་པ་ལྟར། སྐུ་མགྲོན་གཙོ་བོར་སྐུ་ཚབ་དོན་གཅོད་ཀརྨ་སེངྒེ་ལགས་ཆེད་ཕེབས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་བཞིའི་སྐོར་ངོ་སྤྲོད་གནང་། མཛད་སྒོའི་ཐོག་གཞན་ཡང་གནས་བརྟན་ཐིག་ཁུ་ཧང་བྷ་ (Thich Quang Ba) ལགས་གཙོས་པའི་ནང་པའི་དགེ་འདུན་པ་ཁག་གཅིག་ལྷན་ཞུགས་གནང་ཡོད་པ་རེད། ཕྱོགས་མཚུངས་ཟླ་འདིའི་ཕྱི་ཚེས་ ༠༨ ཉིན་སིཊ་ནིར་བོད་མི་དང་བོད་དོན་རྒྱབ་སྐྱོར་བ་གྲངས་ ༨༠༠ ལྷག་མེག་ཀི་ལར་བུ་མོའི་སློབ་གྲྭར་ཚང་འཛོམས་ཀྱིས་༸སྐུའི་འཁྲུངས་སྐར་སྲུང་བརྩི་ཞུས་ཐོག་སྐུ་མགྲོན་གཙོ་བོར་ཨོསྟྲེ་ལི་ཡཱའི་གྲོས་ཚོགས་འཐུས་མི་སོ་ཕི་ཨི་སི་ཀེམ་ (Sophie Scamps) ལགས་གདན་ཞུ་གནང་ཡོད་པ་དང་། ཁོང་མོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༨ ལ་ཕེབས་པའི་༸སྐུའི་འཁྲུངས་སྐར་ལ་འཚམས་འདྲི་དང་འབྲེལ། ཉེ་ལམ་ཁོང་ཉིད་ཨོསྟྲེ་ལི་ཡཱའི་གྲོས་ཚོགས་ཀྱི་སྐུ་ཚབ་ཚོགས་ཆུང་དང་ལྷན་བཞུགས་སྒར་དུ་ཕེབས་པའི་མྱོང་ཚོར་དྲན་གསོ་གནང་། སྐབས་དེར་ཨོསྟྲེ་ལི་ཡཱའི་སྐུ་ཚབ་དོན་གཅོད་ཀརྨ་སེངྒེ་ལགས་ཀྱིས་གྲོས་ཚོགས་འཐུས་མི་སོ་ཕི་ཨི་སི་ཀེམ་ལགས་ཀྱིས་ཉེ་ལམ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཨོསྟྲེ་ལི་ཡཱའི་གྲོས་ཚོགས་སུ་ཕེབས་བསུ་ངོས་འཛིན་དང་། བོད་དོན་སྐོར་གླེང་སློང་ཤུགས་ཆེ་གནང་བར་ཐུགས་རྗེ་ལེགས་འབུལ་ཞུས། ༸སྐུའི་འཁྲུངས་སྐར་གྱི་སྐལ་བཟང་དུས་ཆེན་དང་སྟབས་བསྟུན་གྲོས་ཚོགས་འཐུས་མི་སོ་ཕི་ལགས་ཀྱིས་བོད་དོན་ལ་རྒྱབ་སྐྱོར་གཡོ་མེད་གནང་དང་གནང་མུས་ལ་བཀའ་དྲིན་རྗེས་དྲན་དང་བསྔགས་བརྗོད་དུ་སིཊ་ནིར་གནས་སྡོད་མི་རྣམས་ནས་ཁོང་མོར་ཐུགས་རྗེ་ཆེ་ཞུའི་གཟེངས་རྟགས་ཤིག་ཕུལ་ཡོད།

གཞན་ཡང་མཛད་སྒོའི་ཐོག་ (Northern Beaches) གྲོང་སྡེའི་སྤྱི་ཁྱབ་སུ་ཧེན་ (Sue Heins) ལགས་དང་། ཨོསྟྲེ་ལི་ཡཱ་བོད་དོན་ལྷན་ཚོགས་ཀྱི་འགན་འཛིན་ཛོ་བྷེ་ཕོཊ་ (Zoe Bedford) ལགས། ནིའི་ཛི་ལེནྚ་དང་ཨོསྟྲེ་ལི་ཡཱའི་རྒྱ་ནག་དམར་ཤོག་ཚོགས་པའི་སྡུག་སྦྱོང་མྱོང་མཁན་མཐུན་ཚོགས་ཀྱི་ཚོགས་གཙོ་ཆོ་གི་ཕེང་ (Choegyi Feng) ལགས་སོགས་ལྷན་ཞུགས་གནང་ཡོད། དེ་མཚུངས་གནས་མཁར་གསར་དུ་ཨོསྟྲེ་ལི་ཡཱའི་གྲོས་ཚོགས་འོག་མའི་ཚོགས་གཞོན་ཤེ་རོན་ཀེ་ལི་ཊོན་ (Sharon Claydon) ལགས་དང་། གྲོང་སྡེ་ལྷན་ཚོགས་ཀྱི་འཐུས་མི་ཨི་ལི་ཛི་བེཊ་ (Elizabeth Adamczyk) ལགས་སོགས་ལྷན་ཞུགས་གནང་ཡོད། སྐབས་དེར་ཨོསྟྲེ་ལི་ཡཱའི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཟླ་བ་བཟང་མོ་ལགས་ལྷན་བཅར་གྱིས་བཀའ་ཤག་གི་གསུང་འཕྲིན་སྒྲོགས་སྦྱང་གནང་ཡོད་པ་རེད།

༸སྐུའི་འཁྲུངས་སྐར་གྱི་དུས་ཆེན་དང་སྟབས་བསྟུན་ས་གནས་བོད་མི་རྣམས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མཛད་པའི་ཆོས་ལུགས་ཀྱི་མཚམས་ལས་འདས་པ་དང་། བདེ་སྐྱིད་ཀྱི་བསྟན་ཆོས་སོགས་དཔེ་དེབ་སྟོང་ཕྲག་གཅིག་ལྷག་རིན་མེད་བགོ་འགྲེམས་ཀྱིས་མགོན་པོ་མཆོག་གི་བྱམས་སྙིང་རྗེ་དང་། འཚེ་བ་མེད་པ། ཆོས་ལུགས་མཐུན་འབྲེལ་གྱི་བསླབ་བྱའི་གོ་རྟོགས་སྤེལ་ཡོད། རི་སྔོན་པོ་ས་ཁུལ་དུ་ཨོསྟྲེ་ལི་ཡཱའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཟུང་སྦྲེལ་ཚོགས་གཙོ་སུ་སན་ཀྲེམ་པལ་མན་ (Susan Templeman) ལགས་དང་། གྲོང་སྡེ་ལྷན་ཚོགས་ཀྱི་འཐུས་མི་སུ་ཛི་ཝན་ཨོབ་ཊོར་བ་ (Suzie Van Opdorp) ལགས་གཙོ་བཞུགས་ཐོག་༸སྐུའི་འཁྲུངས་སྐར་སྲུང་བརྩི་ཞུས་ཡོད་པ་དང་། སྐབས་དེར་གནད་ཡོད་སྐུ་མགྲོན་རྣམས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་༸སྐུའི་འཁྲུངས་སྐར་གྱི་འཚམས་འདྲི་ཞུས་ཡོད།

དེ་མཚུངས་ཨོསྟྲེ་ལི་ཡཱའི་ས་གནས་མེལ་བྷོ་ནེ་ (Melbourne) དང་། ནའུ་ར། (Nowra) བྷི་རི་བ་ནི་ (Brisbane) སོགས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་འཁྲུངས་སྐར་སྲུང་བརྩི་ཞུས་ཡོད་པ་བཅས།།