༄༅། །འདི་གར་བྱང་ཨ་རི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན།   ཨ་རིའི་གྲོང་ཁྱེར་ནིའུ་ཡོག་ནང་ཆགས་པའི་བོད་རིགས་སྤྱི་མཐུན་ཚོགས་པའི་ཕུན་ཚོགས་སྡེ་བཞི་ཚོགས་ཁང་དུ་བདུན་ཕྲག་འདིའི་ནང་།  ཨོ་རྒྱན་གྱི་སློབ་དཔོན་ཆེན་པོ་སངས་རྒྱས་གཉིས་པ་གུ་རུ་པདྨ་འབྱུང་གནས་མཆོག་གི་འཁྲུངས་སྐར་རྗེས་དྲན་དང་སྤྲེལ་ཟླ་ཚེས་བཅུའི་མཛད་སྒོ་ཟབ་རྒྱས་ཤིག་གོ་སྒྲིག་གནང་ཡོད།

ཆེས་དམིགས་བསལ་གྱི་དོན་སྙིང་ཟབ་མོ་ལྡན་ལ།  དེང་གི་དུས་སུ་དགོས་མཁོ་ཡང་ཆེ་བའི་མཛད་སྒོ་འདི།   བྱང་ཨ་རིའི་སྔ་འགྱུར་རྙིང་མའི་ཚོགས་པས་གྲ་སྒྲིག་གནང་ཞིང་།  རྒྱ་གར་ལྷོ་ཕྱོགས་ནས་ཐེག་མཆོག་རྣམ་གྲོལ་བཤད་སྒྲུབ་དར་རྒྱས་གླིང་གི་དབུ་འཛིན་༧སྐྱབས་རྗེ་གྱང་ཁང་མཁན་སྤྲུལ་རིན་པོ་ཆེ་མཆོག་ཆེད་དུ་མགྲོན་གྱི་གཙོ་བོ་གནང་སྟེ།  ཚོགས་མགོན་དུ་ངོ་ཕེབས་གནང་པ་མ་ཟད།  ཨོ་རྒྱན་གྱི་སློབ་དཔོན་ཆེན་པོ་གུ་རུ་པདྨ་འབྱུང་གནས་མཆོག་གི་རྗེས་དྲན་དང་སྤྲེལ་ཟླ་ཚེས་བཅུའི་གལ་གནད་སྐོར་གསུང་བཤད་ཀྱང་གནང་།

ནིའུ་ཡོག་གྲོང་ཁྱེར་སྤྱི་ཁྱབ་ལས་ཁུངས་ཀྱི་ཕྱི་མི་གཞིས་ཆགས་ཚན་པའི་འབྲེལ་ཡོད་དཔོན་རིགས་ (Manuel Castro) ལགས་དང་།  བྱང་ཨ་རིའི་སྐུ་ཚབ་དོན་གཅོད་ཀྱི་སྐུ་ཚབ་བོད་རིགས་འབྲེལ་མཐུད་པ་དྲུང་ཟུར་ཀུན་དགའ་བཀྲ་ཤིས་ལགས།  འབྲུག་གཞུང་གི་སྐུ་ཚབ་བསོད་ནམས་སྟོབས་རྒྱལ་ལགས།  བལ་ཡུལ་གྱི་སྐུ་ཚབ།   རྫ་མཁན་པོ་ཚེ་རིང་བཀྲ་ཤིས་ལགས་བཅས་དམིགས་བསལ་སྐུ་མགྲོན་དུ་གདན་ཞུ་གནང་ཡོད་པ་དང་།  དེ་བཞིན་རིས་མེད་ཆོས་བརྒྱུད་ཁག་དང་།  བོད་རིགས་སྤྱི་མཐུན་ཚོགས་པ།  འབྲུག་སྤྱི་མཐུན་ཚོགས་པ།  ཤར་པ་སྐྱིད་སྡུག་སོགས་ཚོགས་སྐྱིད་ཁག་གི་སྐུ་ཚབ་ཀྱང་སྐུ་མགྲོན་དུ་གདན་ཞུ་གནང་འདུག 

བྱང་ཨ་རིའི་སྔ་འགྱུར་རྙིང་མའི་ཚོགས་པའི་ཚོགས་གཙོ་ཌོག་ཊར་ཡུལ་ལ་ཤར་པ་མཁན་པོ་མལགས་ཀྱིས་ཐོག་མར་མཛད་སྒོར་ཕེབས་པའི་སྐུ་མགྲོན་དང་།  མང་ཚོགས་བཅས་སེར་སྐྱ་ཡོངས་ལ་མཛད་སྒོ་ངོ་སྤྲོད་ཀྱི་གསུང་བཤད་དང་འཚམས་འདྲི་གནང་བ་ཆབས་ཅིག  བྱང་ཨ་རིའི་སྔ་འགྱུར་རྙིང་མའི་ཚོགས་པའི་ལས་བསྡོམས་སྙིང་བསྡུས་ངོ་སྤྲོད་གནང་།

སྐུ་ཚབ་དོན་གཅོད་སྐུ་ཚབ་ནས་གསུང་བཤད་གནང་སྐབས།  བོད་གངས་ཅན་ལྗོངས་ཀྱི་ཆོས་སྲིད་གཉིས་ཀར་བཀའ་དྲིན་བླ་ལྷག་ཏུ་ཆེ་བ་མཁན་སློབ་ཆོས་གསུམ་གྱི་ཡ་གྱལ་སློབ་དཔོན་པད་མ་འབྱུང་གནས་མཆོག་ལ་བཀའ་དྲིན་རྗེས་དྲན་གྱི་འདུ་འཛོམས་འདི་འདྲ་ཞིག་གྲོང་ཁྱེར་ནིའུ་ཡོག་ནང་གོ་སྒྲིག་གནང་ཐུབ་པ་དང་།  རྒྱ་གར་ནས་ཐེག་མཆོག་རྣམ་གྲོལ་བཤད་སྒྲུབ་དར་རྒྱས་གླིང་གི་དབུ་འཛིན་༧སྐྱབས་རྗེ་གྱང་ཁང་མཁན་སྤྲུལ་རིན་པོ་ཆེ་མཆོག་ཆེད་དུ་ཚོགས་མགོན་ལ་ཕེབས་ཐུབ་པར་བཀྲ་ཤིས་བདེ་ལེགས་ཀྱི་འཚམས་འདྲི་གནང་བ་དང་བསྟུན།  མཛད་སྒོ་གོ་སྒྲིག་གནང་མཁན་ཡོངས་ལ་ཐུགས་རྗེ་ཆེ་ཞུས་པ་སོགས་དུས་ཆེན་དང་འབྲེལ་བའི་སྐོར་གསུང་པ་མ་ཟད། གྱང་ཁང་མཁན་སྤྲུལ་རིན་པོ་ཆེ་མཆོག་གིས་༧སྐྱབས་རྗེ་གྲུབ་དབང་པད་ནོར་རིན་པོ་ཆེ་སྐུ་གོང་མའི་རྗེས་སུ་སྙེག་པ་གནང་སྟེ།  བསྟན་པ་སྤྱི་དང་། བྱེ་བྲག་སྔ་འགྱུར་རྙིང་མའི་བསྟན་པ་འཛིན་སྐྱོང་སྤེལ་གསུམ་ལ་ཐུགས་ཁུར་ཆེ་བཞེས་གནང་དང་གནང་བཞིན་པ་མ་ཟད།  བཙན་བྱོལ་བོད་མིའི་སྤྱི་ཚོགས་ལ་ཡང་བཀའ་དྲིན་ཆེན་པོའི་བྱ་བ་མཛད་བཞིན་པར་ཐུགས་རྗེ་ཆེ་ཞུས།

རྫ་མཁན་པོ་ཚེ་རིང་བཀྲ་ཤིས་སོགས་སྐུ་མགྲོན་གཞན་ཚོས་ཀྱང་དུས་ཆེན་དང་འབྲེལ་བའི་འཚམས་འདྲི་དང་གསུང་བཤད་གནང་ཡོད་པ་དང་།  དེ་མིན་སྒེར།  ཚོགས་པ།  འབྲུག་དང་།  ཤར་པ་སོགས་ཧི་མ་ཡ་ལ་རི་རྒྱུད་ཡུལ་ལུང་ཁག་གིས་རང་ལུགས་ཀྱི་ཁྱད་ཆོས་ལྡན་པའི་གླུ་དབྱངས་ཀྱི་མཆོད་པ་སྣ་ཚོགས་ཕུལ་བ་དང་།  གར་འཆམ་གཟིགས་འབུལ་གྱི་ལམ་ནས་ཨོ་རྒྱན་སངས་རྒྱས་གཉིས་པ་སློབ་དཔོན་པདྨ་འབྱུང་གནས་མཆོག་གི་བཀའ་དྲིན་རྗེས་སུ་དྲན་པ་གནང་།  

མཇུག་ཏུ།  སྐུ་མགྲོན་གཙོ་བོ་༧སྐྱབས་རྗེ་གྱང་ཁང་མཁན་སྤྲུལ་རིན་པོ་མཆོག་གིས་སློབ་དཔོན་པདྨ་འབྱུང་གནས་མཆོག་གི་འགྲན་བྲལ་བཀའ་དྲིན་སྐོར་གསུང་བཤད་གྲུབ་མཚམས་བོད་གངས་ཅན་པ་རྣམས་ཀྱི་ལྟ་བའི་མིག་དང་།  ཁོག་པའི་སྙིང་སྤྱི་ནོར་༧གོང་ས་༧སྐྱབས་མགོན་པོ་མཆོག་གིས་དབུས་རིས་མེད་ཆོས་བརྒྱུད་ཁག་གི་སྐྱེས་ཆེན་ཐམས་ཅད་སྐུ་ཚེ་ཡུན་རིང་དུ་བརྟན་པའི་སྨོན་ལམ་གནང་རྗེས།  བྱང་ཨ་རིའི་སྔ་འགྱུར་རྙིང་མའི་ཚོགས་པའི་ཚོགས་གཞོན་བླ་མ་རབ་རྒྱས་ལགས་ནས་ཐུགས་རྗེ་ཆེ་ཞུའི་གསུང་བཤད་གནང་སྟེ།  ཉིན་དང་པོའི་མཛད་སྒོ་ལེགས་གྲུབ་པ་བཅས། །