༄༅། །འདི་གར་བྱང་ཨ་རིའི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། སྦོ་སི་ཊོན་བོད་རིགས་སྤྱི་མཐུན་ཚོགས་པ་ནས་གནས་ཚུལ་འབྱོར་བར་གཞིགས་ན།  ཨ་རིའི་རྒྱལ་ས་ཝ་ཤིང་ཊོན་སྒྲི་སི་རུ་བཅའ་བཞུགས་ཐེ་ཝན་གཞུང་གི་སྐུ་ཚབ་སྦི་ཁིམ་ཤཱའོ་ (Bi-Khim Hsiao) ལགས་བདུན་ཕྲག་སྔོན་མར་སྦོ་སི་ཊོན་དུ་གཞུང་འབྲེལ་ཕྱོགས་ཕེབས་སྐབས།  ས་གནས་བོད་རིགས་སྤྱི་མཐུན་ཚོགས་པའི་ཚོགས་གཙོ་སྐལ་བཟང་ཕུན་ཚོགས་ལགས་ཀྱིས་སྦེ་ཁིམ་ཤཱའོ་ལགས་དང་འཁྱུག་ཙམ་མཇལ་ནས་སྦོ་སི་ཊོན་དུ་ཕེབས་པར་འཚམས་འདྲི་གནང་འདུག

 ཚོགས་གཙོ་སྐལ་བཟང་ཕུན་ཚོགས་ལགས་ནས་ ” སྦི་ཁིམ་ཤཱའོ་ལགས་ནི་ཝ་ཤིང་ཊོན་སྒྲི་སིལ་དུ་བཅའ་བཞུགས་ཐེ་ཝན་གཞུང་གི་སྐུ་ཚབ་གཙོ་བོ་དེ་ཡིན་པ་དང་།  ཁོང་ང་ཚོའི་ས་གནས་སུ་ཕེབས་པ་སོང་ཙང་།  ང་ཚོས་ཁྱུག་ཙམ་མཇལ་ནས་འཚམས་འདྲིའི་མཇལ་དར་དང་།  ཆོས་ལུགས་ཀྱི་མཚམས་ལས་འདས་པ་ (Beyond Religion: Ethics for a Whole World )ཞེས་པའི་༧གོང་ས་མཆོག་གི་ཕྱག་དེབ་གྲགས་ཆེ་བ་འདི་ཕུལ་ཞིང་།  ཞོར་ལ་བོད་སྐོར་དང་།  ས་གནས་ཀྱི་བོད་པའི་གནས་སྟངས་རོབ་ཙམ་ངོ་སྤྲོད་ཞུས་པ་ཡིན། ” ཞེས་གསུང་གི་འདུག  

 ཤེས་རྟོགས་བྱུང་བར་གཞིགས་ན།  སྦི་ཁིམ་ཤཱའོ་ལགས་ལ་འཚམས་འདྲི་ཞུ་བར་བཅར་སྐབས།  བོད་རིགས་སྤྱི་མཐུན་ཚོགས་པའི་འབྲེལ་མཐུད་རྒྱུན་ལས་བཀྲ་ཤིས་སྒྲོལ་མ་ལགས་དང་།  བོད་རིགས་སྤྱི་མཐུན་ཚོགས་པའི་བོད་དོན་ཞུ་གཏུགས་ལས་འགུལ་ལ་ཕྱག་རོགས་གནང་མཁན་ཕྱི་རྒྱལ་གྲོགས་པོ་ཧོ་ཝཊ་ཕ་སི་(Howard Fass)ལགས་མཉམ་དུ་བཅར་ཡོད་པ་དང་། བོད་པའི་དཀར་གཙང་གི་ཁ་བཏགས་ལ་ཕྱི་རྒྱལ་མང་ཆེ་བས་དགའ་མོས་དང་རིན་ཐང་ཡོད་པའི་མཚོན་རྟགས་ལ་བརྩི་གི་ཡོད་པར་བརྟེན།  སྦོ་སི་ཊོན་ས་གནས་ཀྱི་(FAPA Massachusetts Chapter) ཚོགས་པའི་ཚོགས་གཙོ་ལས་ཐོག་སོན་ཡ་ཧུ་ཧང་(Sonya Huang)དང་།  དེ་བཞིན་སྦི་ཁིམ་ཤཱའོ་ལགས་ཀྱི་ཕྱག་རོགས་ལ་ཡང་འཚམས་འདྲིའི་མཇལ་དར་ཕུལ་ཡོད་པ་བཅས།།