༄༅། །ཕྱི་ལོ་ ༢༠༢༣ ཟླ་བ་ ༠༧ ཚེས་ ༡༢ ཉིན་བོད་ཀྱི་ཆབ་སྲིད་བཙོན་པ་རྡོ་རྗེ་བཀྲ་ཤིས་ལགས་དང་ཁོང་གི་གཅེན་མོ་མགོན་པོ་སྐྱིད་ལགས་སུ་སྤུལ་སྐུ་བསྟན་འཛིན་བདེ་ལེགས་རིན་པོ་ཆེའི་སྙིང་སྟོབས་གཟེངས་རྟགས་གནང་ཡོད།
དེ་ཡང་གོང་ཚེས་ཉིན་རྡ་ས་ནོར་བུ་གསོལ་མགྲོན་ཁང་གི་ཞི་བདེ་ཚོགས་ཁང་དུ་རྒྱལ་སྤྱིའི་བོད་དོན་འབྲེལ་མཐུད་ལས་ཁང་དང་། རྒྱ་གར་ནང་ཡོད་པའི་བོད་རང་བཙན་སློབ་ཕྲུག་ཚོགས་པ། དབུས་བོད་ཀྱི་བུད་མེད་ལྷན་ཚོགས། བོད་རྒྱལ་ཡོངས་མང་གཙོ་ཚོགས་པ་བཅས་ཀྱི་གོ་སྒྲིག་འོག་ཕྱི་ལོ་ ༢༠༢༣ ལོའི་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་སྙིང་སྟོབས་གཟེངས་རྟགས་དབུལ་རྒྱུའི་མཛད་སྒོ་ཞིག་ཚོགས་ཡོད་པ་ལྟར། མཛད་སྒོའི་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། ཆེ་བསྟོད་སྐུ་མགྲོན་བོད་ཀྱི་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས། སྤྲུལ་སྐུ་བསྟན་འཛིན་བདེ་ལེགས་ཀྱི་སློབ་མ་ཚེ་རིང་རྡོ་རྗེ་ལགས། དེ་བཞིན་བཞུགས་སྒར་ཁུལ་གྱི་གཞུང་ཁོངས་མིན་པའི་ཚོགས་སྡེ་ཁག་གི་སྐུ་ཚབ། གསར་འགོད་པ་སོགས་ཚང་འཛོམས་ཐོག་སྲིད་སྐྱོང་སྤེན་པ་ཚེ་རིང་མཆོག་གིས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་སྙིང་སྟོབས་གཟེངས་རྟགས་དེ་བཞིན་བོད་ཀྱི་ཆབ་སྲིད་བཙོན་པ་རྡོ་རྗེ་བཀྲ་ཤིས་ལགས་དང་ཁོང་གི་གཅེན་མོ་མགོན་པོ་སྐྱིད་ལགས་སུ་གནང་ཡོད་པ་རེད།
སྐབས་དེར་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བོད་ཀྱི་ཆོབ་སྲིད་བཙོན་པ་རྡོ་རྗེ་བཀྲ་ཤིས་ལགས་དང་ཁོང་གི་གཅེན་མོ་མགོན་པོ་སྐྱིད་ལགས་ཐེ་བའི་བོད་ནང་གི་ཆབ་སྲིད་བཙོན་པ་རྣམས་ཀྱི་སྙིང་སྟོབས་དང་ལྷག་བསམ་ལ་བསྔགས་བརྗོད་ཞུས་པ་དང་འབྲེལ། ད་ལྟའི་ཆར་རྒྱ་ནག་གཞུང་གིས་བོད་ནང་དྲག་གནོན་བྱེད་སྟངས་དེ་ཨིན་ཇིའི་རྩོམ་པ་པོ་ཇོར་ཇི་ཨོལ་ཝལ་གྱིས་བྲིས་པའི་བརྩམས་སྒྲུང་ ༡༩༨༤ ཞེས་པའི་ནང་དོན་དང་ཧ་ཅང་མཚུངས་ཤིང་། རྒྱ་ནག་གཞུང་གིས་འཕྲུལ་རིག་ལ་བརྟེན་ནས་བོད་མིའི་འགྲོ་ཆག་ཉལ་འདུག་ཐད་བྱ་ར་གསོ་ཉུལ་བྱེད་པ་དང་། བོད་མིར་ཉེས་མེད་ཉེས་འཛུགས་བྱེད་པ་སོགས་ཀྱིས་དམ་བསྒྲགས་ཤུགས་ཆེ་བྱེད་བཞིན་པའི་སྐོར་འགྲེལ་བརྗོད་དང་། དེ་བཞིན་དེ་སྔོན་ཨ་རི་གཙོས་པའི་ནུབ་ཕྱོགས་རྒྱལ་ཁབ་ཚོས་རྒྱ་ནག་ལ་རེ་བ་བཟང་པོ་ཞིག་བརྒྱབ་སྟེ་འབྲེལ་ལམ་བཙུགས་པ་མ་ཟད། རྒྱབ་སྐྱོར་གང་ཡོང་བྱས་རྐྱེན་རྒྱ་ནག་སྟོབས་ཆེན་རྒྱལ་ཁབ་ཅིག་ཏུ་གྱུར་ཡོད་ནའང་། ད་ལྟ་རྒྱ་ནག་གི་བྱེད་ཕྱོགས་ལ་བལྟས་ན་ནུབ་ཕྱོགས་རྒྱལ་ཁབ་ཀྱི་རེ་བའི་དོན་འབྲས་སོན་མེད་སྟབས། ད་ལྟའི་ཆར་ཨ་རི་གཙོས་པའི་ནུབ་ཕྱོགས་རྒྱལ་ཁབ་ཚོས་རྒྱ་ནག་ལ་ལྟ་སྟངས་འགྱུར་བ་འགྲོ་གི་ཡོད་ཅིང་། ལྷག་པར་དུ་ཡུག་རེན་གྱི་དམག་ལ་བརྟེན་ནས་ཡུ་རོབ་ཀྱི་བདེ་འཇགས་དང་ཐོབ་ཐང་སོགས་ཀྱི་ཐད་ཡུ་རོབ་གཉིད་ལས་སད་པ་ལྟ་བུར་གྱུར་ཡོད་སྐོར་འགྲེལ་བརྗོད་གནང་བ་མ་ཟད། ད་ལྟ་རྒྱ་ནག་ལ་ཨ་རི་གཅིག་པུས་ཁ་གཏད་གཅོག་མི་ཐུབ་པས་ནུབ་ཕྱོགས་རྒྱལ་ཁབ་མཉམ་རུབ་ཀྱིས་ནུས་པ་སྤུངས་དགོས་རྒྱུ་གལ་གནད་ཆེན་པོ་ཡིན་ཞེས་གསུངས། དེ་དང་འབྲེལ་ཏེ་དཔལ་ལྡན་སྲིད་སྐྱོང་མཆོག་གིས་བོད་མིའི་སྒྲིག་འཛུགས་ངོས་ནས་ཨ་རི་དང་། དམིགས་བསལ་ཡུ་རོབ་ནང་དུ་བོད་དོན་ཞུ་གཏུག་གོང་འཕེལ་གཏོང་སླད་འབད་རྩོལ་ཅི་ཐུབ་གནང་གི་ཡོད་སྐོར་གསུངས་ཡོད།
གཞན་ཡང་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་ནག་གཞུང་ནས་རྒྱ་ནག་གོང་བུ་ཆིག་སྒྲིལ་ཞིག་དགོས་ན་རྒྱ་ནག་ནང་ཡོད་པའི་མི་རིགས་སོ་སོའི་སེམས་ཁམས་དང་། རེ་བ། མངོན་འདོད། བདེ་སྡུག་དང་མཐུན་པའི་ལས་གཞི་སྤེལ་ཏེ་མི་མང་གི་ཡིད་ཆེས་རྙེད་པ་བཟོ་དགོས་པ་ལས་ཕྱི་དངོས་པོའི་ཡར་རྒྱས་ཁོ་ནས་མི་མང་གི་འདོད་བློ་བསྐོང་མི་ཐུབ་ལ། ལྷག་པར་བོད་མི་རྣམས་ལ་མཚོན་ན་ལོ་ངོ་སྟོང་གི་ལོ་རྒྱུས་ཡོད་པའི་རིག་གཞུང་ཡོད་པ་དེ་དག་མི་ཉམས་རྒྱུན་འཛིན་བྱ་རྒྱུའི་རང་དབང་སྤྲོད་དགོས་ངེས་ཡིན་ཞིང་། དེང་གི་འཕྲུལ་རིག་ཡར་རྒྱས་ཚད་མཐོ་ཕྱིན་པའི་དུས་སྐབས་སུ་མི་མང་མུན་པའི་ནང་དུ་འཇོག་ཐུབ་ཐབས་མེད་སྐོར་གསལ་བཤད་གནང་ཡོད།
མཐར་དཔལ་ལྡན་སྲིད་སྐྱོང་མཆོག་གིས་འཛམ་བུ་གླིང་གི་ཆབ་སྲིད་ཀྱི་འཕོ་འགྱུར་ཁྲོད་བོད་མི་རྣམས་ཀྱིས་ནང་ཁུལ་གྱི་གནད་དོན་ཆུང་ཙག་རིགས་ལ་མགོ་མ་འཁོར་བར་བསམ་བློ་རྒྱ་ཆེ་ས་ནས་བཏང་སྟེ་ནུས་པ་མཉམ་སྤུངས་ཀྱིས་བོད་དོན་དངོས་ཡོད་གནས་ཚུལ་རྒྱལ་སྤྱིར་མཁོ་སྤྲོད་གནང་སྟེ་བོད་དོན་ཞུ་གཏུག་གནང་དགོས་སྐོར་ལམ་སྟོན་གནང་ཡོད།
སྤྱིར་གོ་སྒྲིག་ཚོགས་ཆུང་གིས་སྤེལ་བའི་གསར་འགོད་བསྒྲགས་གཏམ་ལྟར་ན། ལོ་འདིའི་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་སྙིང་སྟོབས་གཟེངས་རྟགས་དེ་བཞིན་རྡོ་རྗེ་བཀྲ་ཤིས་ལགས་དང་མགོན་པོ་སྐྱིད་ལགས་སུ་ཕུལ་དགོས་པའི་རྒྱུ་མཚན་ནི། རྡོ་རྗེ་བཀྲ་ཤིས་ལགས་ཀྱིས་བོད་དང་བོད་མི་ཚོར་རང་ནུས་གང་ཡོད་ཀྱིས་སྤྱི་ཚོགས་ཞབས་ཞུ་བསྒྲུབས་པའི་ཆོད་སེམས་དང་། མགོན་པོ་སྐྱིད་ལགས་ནས་རང་གི་གཅུང་པོ་རྡོ་རྗེ་བཀྲ་ཤིས་ལ་དྲང་བདེན་འཐོབ་རྒྱུར་རྒྱ་ནག་གཞུང་གི་བཀག་རྒྱ་ལ་མ་འཛེམས་པར་མུ་མཐུད་འཚེ་མེད་ཞི་བའི་ལས་འགུལ་སྤེལ་བཞིན་པའི་སྙིང་སྟོབས་གཉིས་ལ་རྗེས་སུ་ཡི་རངས་དང་ཆེ་བསྟོད་མཚོན་ཆེད་དུ་ཡིན་སྐོར་གསལ་འདུག་པ་བཅས།། 
