༄༅། །ཕྱི་ལོ་ ༢༠༢༣ ཟླ་ ༧ ཚེས་ ༣༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཞི་བའི་ཚལ་གྱི་དུས་འཁོར་སྒྲུབ་མཆོད་ཀྱི་ཚོགས་མགོན་དུ་ཆིབས་བསྒྱུར་དང་། དབུས་གཙང་ཆོལ་ཁའི་འགན་ལྷན་ཐེངས་བཅུ་དྲུག་པའི་ཚོགས་བཅར་བ་རྣམས་ལ་བཀའ་སློབ། དེ་བཞིན་ལ་དྭགས་ཏོག་ཡུལ་གྱི་སྟོན་པའི་སྐུ་བརྙན་ཆེན་མོར་མཆོད་མཇལ་དང་། མི་མང་ལ་བཀའ་སློབ་སྩལ་རྗེས་ཏོག་རྒྱལ་པོ་ཚང་གིས་གདན་ཞུས་ལྟར་ཆིབས་བསྒྱུར་བསྐྱངས་ཡོད་པ་རེད།
དེ་ཡང་སྔ་དྲོ་ཆུ་ཚོད་ ༧།༣༠ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཞི་བའི་ཚལ་གྱི་ཕོ་བྲང་དགེ་འཕེལ་གླིང་ནས་གསུང་ཆོས་ར་བའི་དུས་འཁོར་ལྷ་ཁང་དུ་ཆིབས་བསྒྱུར་གྱིས་དུས་འཁོར་སྒྲུབ་མཆོད་ཆེན་མོར་དབུ་བཞུགས་མཛད་པ་དང་། དེ་རྗེས་དབུས་གཙང་ཆོལ་ཁའི་འགན་ལྷན་ཐེངས་བཅུ་དྲུག་པའི་ཚོགས་བཅར་བ་རྣམས་ལ་བཀའ་སློབ་དང་སྐུ་པར་ལྷན་སྒྲོན་མཛད་ཡོད། དེ་ཡང་སྐབས་དེར་མགོན་པོ་གང་ཉིད་མཆོག་གིས། བོད་ཀྱི་ཆོས་དང་རིག་གཞུང་རྒྱུན་འཛིན་བྱ་རྒྱུ་གལ་ཆེན་པོ་ཡིན་པ་དང་། དེ་ཡིས་འཛམ་གླིང་མི་མང་ལ་ཞབས་འདེགས་སྒྲུབ་ཐུབ་པའི་སྐོར་སོགས་བཀའ་སློབ་སྩལ་རྗེས། ཞི་བའི་ཚལ་ནས་ཕེབས་འཁོར་ལ་བཞུགས་སྟེ་ཏོག་གྲོང་གསེབ་ཏུ་བཞེངས་ཡོད་པའི་ཕི་ཊི་ ༧༡ ཅན་གྱི་སྟོན་པ་བཅོམ་ལྡན་འདས་ཀྱི་སྐུ་བརྙན་དྲུང་དུ་ཆིབས་སྒྱུར་གྱིས་ཐུབ་པའི་སྐུ་བརྙན་ལ་མཆོད་མཇལ་དང་། ལ་དྭགས་ཏོག་དམག་ཟུར་ལྷག་བསམ་ཚོགས་པ་དང་ཏོག་མི་མང་ཡོངས་ལ་བཀའ་སློབ་བཀའ་དྲིན་སྩལ་ཡོད།
སྐབས་དེར་ཕེབས་ལམ་གཡས་གཡོན་དུ་ལ་དྭགས་ཡུལ་མི་རྣམས་ཀྱིས་རང་ལུགས་མནབ་བཟའ་ལེགས་པར་སྤྲས་ཤིང་། མེ་ཏོག་གི་མཆོད་པ་བཏེགས་ཏེ་ཕེབས་བསུ་ཞུས་པ་དང་། ཐུབ་དབང་སྐུ་བརྙན་མདུན་དུ་༸ཞབས་སོར་འཁོད་མཚམས་མཆོད་མཇལ་དང་། ཏོག་རྒྱལ་སྲས་མཆོག་གིས་མཎྜལ་རྟེན་གསུམ་འདེགས་འབུལ་དང་མཉམ་རྟེན་འབྲེལ་བསྟོད་པ་གསུང་འདོད་མཛད་རྗེས་ཏོག་པ་ཡུལ་མིའི་སྐུ་ཚབ་ནས་ཕྱི་ལོ་༢༠༡༦ ལོར་ཐུབ་དབང་སྐུ་བརྙན་བཞེངས་པ་ནས་ད་བར་ལས་དོན་ཅི་བྱས་ཀྱི་ལས་བསྡོམས་སྙིང་བསྡུས་སྙན་སྒྲོན་དང་། ཡུལ་བ་ཕོ་མོ་བཅུ་གྲངས་ཀྱིས་བསྟོད་གཞས་གཟིགས་འབུལ་ཞུས་མཚམས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན།
ཐུབ་དབང་སྐུ་འདི་མཇལ་དུས་འདིའི་སྐུ་མདུན་དུ་འགྲོ་བསམ་པའི་འདུན་པ་ཞིག་ལོ་མང་པོའི་གོང་ནས་ཡོད། དེ་རིང་འདིར་དངོས་སུ་སྟོན་པ་ཐུབ་པའི་དབང་པོའི་སྣང་བརྙན་དྲུང་དུ་སླེབས་ཐུབ་པ་རེད། སྟོན་པ་ཐུབ་པའི་དབང་པོ་ནི་འཛམ་གླིང་འདིར་སྟོན་པ་མང་པོ་ཡོད་པའི་ནང་ནས་རྟེན་ཅིང་འབྲེལ་བར་འབྱུང་བ་གསུང་མཁན་གཅིག་པུ་རེད། རྟེན་འབྱུང་གི་དེ་ཁོ་ན་ཉིད་འཛམ་གླིང་ལ་གསལ་བར་མཛད་མཁན་སྟོན་པ་ཤཱཀྱ་ཐུབ་པ་ཆགས་ཡོད། རྟེན་ཅིང་འབྲེལ་བར་འབྱུང་བ་ཟེར་བ་ནི་ཧ་ཅང་ཟབ་མོ་རེད། ངོས་རང་གིས་ཉིན་རེ་བཞིན་དུ་རྟེན་ཅིང་འབྲེལ་བར་འབྱུང་བ་ཡིན་པས་ངོ་བོ་ཉིད་ཀྱིས་གྲུབ་པ་ཡོད་པ་མ་རེད་ཅེས་པའི་སྟོང་ཉིད་སྒོམ་གྱི་ཡོད། དེ་ལྟ་བུའི་སྟོང་ཉིད་སྒོམ་པའི་རྒྱུ་མཚན་ནི། ང་ཚོར་ཆགས་སྡང་སྐྱེ་སའི་ཡུལ་དེ་ཤར་ཡོང་སྐབས་དོན་སྟེང་ནས་ཡོད་པ་ཞིག་ཤར་བ་དང་། དེ་བཞིན་རང་མཚན་པར་ཡོད་པ་ཞིག་ལ་བསམ་བློ་འཁོར་ཡོང་བས་ཆགས་སྡང་གི་བློ་སྐྱེས་ཀྱི་ཡོད། སྣང་བ་ལྟར་དུ་གྲུབ་ཡོད་པ་མ་རེད་ཟེར་བའི་རྟེན་འབྱུང་གི་དེ་ཁོ་ན་ཉིད་ལ་བསམ་བློ་འཁོར་སྐབས་དེ་དག་སྒྱུ་མ་ལྟ་བུ་དང་། རྨི་ལམ་ལྟ་བུ་རེད་མ་གཏོགས་དོན་གྱི་ངོས་ནས་གྲུབ་པ་གཏན་ནས་མེད་ཅེས་སྟོང་ཉིད་ཀྱི་ལྟ་བར་བསམ་བློ་འཁོར་དུས་ཧ་ཅང་ཕན་ཐོགས་འདུག
མགོན་པོ་ཀླུ་སྒྲུབ་ཀྱིས། ལས་དང་ཉོན་མོངས་ཟད་པས་ཐར།། ལས་དང་ཉོན་མོངས་རྣམ་རྟོག་ལས།། དེ་དག་སྤྲོས་ལས་སྤྲོས་པ་ནི།། སྟོང་པ་ཉིད་ཀྱིས་འགག་པར་འགྱུར།། ཞེས་གསུངས་པ་འདི་ནི་དངོས་གནས་རིགས་པ་དང་ལྡན་པ། རྣམ་དཔྱོད་དང་ལྡན་པ་རེད། དགོས་པ་ནི་ཆགས་སྡང་གི་བློ་ཉུང་དུ་བཏང་ནས་གཏན་དུ་བདེ་བ་སྒྲུབ་པའི་དམིགས་ཡུལ་འདི་རེད། ཧ་ཅང་རྩ་ཆེན་པོ་རེད། ངོས་རང་གིས་ཉིན་རེ་བཞིན་དུ་སྟོང་པ་ཉིད་ཀྱི་དོན་ལ་ག་ཚོད་ཐུབ་ཐུབ་ཀྱིས་བསམ་བློ་གཏོང་གི་ཡོད། དེ་དང་ཆབས་ཅིག་སྟོང་ཉིད་སྒོམ་ནས་རང་དོན་ཞི་བདེ་དོན་གཉེར་གྱི་བསམ་བློ་བཏང་ན་བསམ་བློ་རྒྱ་ཆུང་དྲགས་པ་རེད། སྟོང་ཉིད་སྒོམ་པའི་དམིགས་ཡུལ་ནི། རང་དང་རང་འདྲ་བའི་སེམས་ཅན་བདེན་འཛིན་གྱི་གཞན་དབང་དུ་སོང་ནས་ཆགས་སྡང་གིས་ལས་བསགས་ཏེ། འཛམ་གླིང་འདི་འཁྲུག་སྡོད་མཁན་ཞིག་ཡོང་བ་དེ་དག་གིས། ཆོས་རྣམས་བདེན་པའི་རང་བཞིན་ཞིག་ལ་མཐོང་ནས་རང་ཕྱོགས་ལ་ཆགས། གཞན་ཕྱོགས་ལ་སྡང་སྟེ་ཧ་ཅང་འཁྲུག་ཆ་ཆེན་པོ་བྱུང་ཞིང་། མི་ཧ་ཅང་མང་པོ་དམག་འཁྲུག་གི་ཐོག་ནས་བསད་ཡོད། བསད་རྨས་བཏང་ཡོད་པ་རེད། བདག་བདེ་གཞན་གྱི་སྡུག་བསྔལ་དག། ཡང་དག་བརྗེ་བར་མ་བྱས་ན།། སངས་རྒྱས་ཉིད་དུ་མི་འགྲུབ་ཅིང་།། འཁོར་བ་ན་ཡང་བདེ་བ་མེད།། ཅེས་གསུང་གི་ཡོད། དེ་དངོས་གནས་བདེན་པ་བདེན་རྐྱང་རེད། ང་ཚོ་ཚང་མས་ག་ཚོད་ཐུབ་ཐུབ་ཀྱིས་སེམས་པ་བཟང་པོ་བྱེད་པ་དང་། ང་གཅིག་པུར་བསམ་པ་མ་ཡིན་པར་འཛམ་གླིང་འདིར་མི་དུང་ཕྱུར་བདུན་ཅུ་ལྷག་ཡོད་པ་ཚང་མ་བདེ་བ་འདོད་པ་དང་། སྡུག་བསྔལ་མི་འདོད་པ་གཅིག་མཚུངས་ཡིན་པས་ཐམས་ཅད་ལ་བདེ་བ་ཞིག་བྱུང་ན་བསམ་པའི་བསམ་བློ་གཏོང་དགོས།
འདིར་སྟོན་པ་ཐུབ་པའི་དབང་པོའི་སྐུ་བརྙན་ཐག་རིང་པོ་ནས་མཐོང་ཐུབ་པའི་ཆེན་པོ་ཞིག་བཞེངས་ཡོད་པ་རེད། དེ་རིང་འདིར་དངོས་སུ་སླེབས་ནས་སྟོན་པ་བཀའ་དྲིན་ཅན་གྱི་གསུང་རྗེས་དྲན་གྱི་ཆོ་འཕྲུལ་སེམས་ལ་ཤར་བའི་ཐོག་ནས་སྟོན་པ་ལ་བཀའ་དྲིན་ཆེ་ཞེས་བསམ་བཞིན་ཡོད། ལ་དྭགས་གླེ་ནས་ཧི་མ་ལ་ཡའི་རི་རྒྱུད་ཡོངས་རྫོགས་སུ་སྟོན་པ་བཅོམ་ལྡན་འདས་ལ་སྐྱབས་བཅོལ་མཁན། ཡང་སྒོས་འཕགས་པ་སྤྱན་རས་གཟིགས་ལ་སྐྱབས་བཅོལ་མཁན་ཆགས་ཡོད་པ་དེ་ལྟར་རེད། དེ་ནི་ལམ་དང་ལུགས་སྲོལ་གྱི་སྐད་ཆ་མིན་པར་སེམས་ལ་ཞི་བདེ་ཡོང་བའི་ཆེད་དུ་རེད། འཕགས་མཆོག་ཐུགས་རྗེ་ཆེན་པོ་གཟུངས་སྔགས་ཡིག་དྲུག་དང་། སྙིང་རྗེ་ཆེན་པོར་བསམ་བློ་བཏང་ཡོང་དུས་སེམས་ཀྱི་ཞི་བདེ་ཡོང་བ་ནི་ང་ཚོའི་མཐོང་ཆོས་སུ་ཡོད་པ་ཞིག་རེད། ངོས་རང་ལ་མཚོན་ན་ཞོགས་པ་ཡར་ལངས་པ་དང་སྟོན་པའི་གསོལ་འདེབས་ལ་བསམ་བློ་བཏང་། དེ་ནས་འཕགས་པ་སྤྱན་རས་གཟིགས་ལ་བསམ་བློ་བཏང་ནས་མ་ཎི་བསགས་ཀྱི་ཡོད། དེས་སེམས་ལ་ཞི་བདེ་ཡོང་བ་ཞིག་རེད། འཛམ་གླིང་འདིར་མི་ཚང་མ་སྡུག་བསྔལ་མི་འདོད་པ་དང་། བདེ་བ་འདོད་པ་ཤ་སྟག་ཡིན་ཀྱང་། འཁྲུག་པ་བརྒྱབ་ནས་གསོད་རེས་མང་པོ་གཏོང་གི་འདུག སེམས་སྐྱོ་དགོས་པ་རེད། རིམ་བཞིན་འཛམ་གླིང་འདིར་སེམས་ཀྱི་ཞི་བདེ་རྒྱུད་ནས་འཛམ་གླིང་ཞི་བདེ་ཡོང་བར་སྨོན་ལམ་རྒྱག་གི་ཡོད་ལ། སྨོན་ལམ་བརྒྱབ་པ་ནང་བཞིན་ག་ཚོད་ཐུབ་ཐུབ་ཀྱིས་ངོ་ཤེས་པ་ཚོར་སེམས་ཀྱི་ཞི་བདེ་བྱུང་ན་འཛམ་གླིང་ཞི་བདེ་བྱུང་གི་རེད་ཅེས་ཤོད་བཞིན་ཡོད།
སངས་རྒྱས་པའི་གཞུང་ནས་སྐྱེ་བ་སྔ་ཕྱི་བཤད་ཀྱི་ཡོད་། ཚེ་འདི་གཅིག་པུ་མ་རེད། དེར་བརྟེན། ཚེ་འདི་ལ་འཕགས་པ་སྤྱན་རས་གཟིགས་ལ་གསོལ་བ་བཏབ་ནས་སེམས་བཟང་པོ་བྱས་པ་ཡིན་ན། ཚེ་རབས་ནས་ཚེ་རབས་སུ་འཕགས་པ་སྤྱན་རས་གཟིགས་ཀྱི་བྱིན་རླབས་ཀྱི་ཐོག་ནས་མི་ཚེ་བདེ་ཞིང་སྐྱིད་པ་ཞིག་ཡོང་ཐུབ་པ་དང་། དེ་རྒྱུད་ནས་མཐའ་ཡས་པའི་སེམས་ཅན་ཐམས་ཅད་ལ་ཕན་བདེ་སྒྲུབ་ཐུབ་པ་ཞིག་ཡོང་གི་རེད། ནང་པ་སངས་རྒྱས་པའི་ཆོས་ནི་སྐྱབས་སུ་མཆི་ཟེར་བ་གཅིག་པུ་མིན་པར་སེམས་ལ་འགྱུར་བ་ཇི་ལྟར་གཏོང་དགོས་མིན་ཧ་ཅང་ཞིབ་ཚགས་པོ་འདུག ངོས་ཀྱིས་ཆོས་ལུགས་ཚང་མར་གུས་ཞབས་བྱེད་ཀྱི་ཡོད། རྗེས་སུ་ཡི་རངས་བྱེད་ཀྱི་ཡོད། ཡི་ཤུ་ཆོས་དང་། ཁ་ཆེའི་ཆོས། ཇོའུ་ཆོས་སོགས་སུ་ཡིན་ནའང་སེམས་པ་བཟང་པོ་བྱེད་དགོས་པ་གསུང་གི་ཡོད། ཡིན་ནའང་། སེམས་ཀྱི་འགྲོ་སྟངས་ལ་འགྲེལ་བཤད་རྒྱབ་ནས་དེའི་ཐོག་ནས་སེམས་ཀྱི་ཞི་བདེ་སྒྲུབ་པ་ནི་ཕལ་ཆེར་ནང་པའི་ཆོས་སྤྱི་དང་། ལྷག་པར་དུ་དཔལ་ནཱ་ལེནྡྲའི་ཆོས་བརྒྱུད་ཀྱི་རིང་ལུགས་སམ་འགྲོ་སྟངས་ནི་ཧ་ཅང་ཟབ་མོ་རེད།
ནང་པ་སངས་རྒྱས་པའི་ཆོས་ནི་དད་པ་ཙམ་མ་ཡིན་པར་ལྟ་གྲུབ་ཀྱི་ཐོག་ནས་འགྲེལ་བཤད་མང་པོ་ཡོད་པས་སློབ་སྦྱོང་བྱེད་རྒྱུ་ཧ་ཅང་གལ་ཆེན་པོ་རེད། ཁྱོད་ཚོ་ཚང་མས་ག་ཚོད་ཐུབ་ཐུབ་ཀྱིས་ནང་པའི་གཞུང་རྣམས་ལ་བལྟས་ནས་དད་པ་ཙམ་མ་ཡིན་པར་སློབ་སྦྱོང་བྱ་རྒྱུ་ཧ་ཅང་གལ་ཆེན་པོ་རེད། འདི་ཁྱོད་ཚོར་ཞུ་འདོད་བྱུང་། ཐུགས་རྗེ་ཆེ་ཞེས་བཀའ་སློབ་སྩལ་རྗེས། འབྲེལ་ཡོད་སྐུ་ཚབ་ནས་ཏོག་པ་ཡུལ་མི་ཚང་མས་ཚབ་བྱས་ཏེ་ཏོག་ཡུལ་དུ་ཐེངས་གཉིས་པར་ཆིབས་བསྒྱུར་བསྐྱངས་པར་ཐུགས་རྗེ་ཆེ་ཞུས་མཚམས་མགོན་པོ་གང་ཉིད་མཆོག་ཏོག་རྒྱལ་པོ་ཚང་གིས་གདན་ཞུ་ལྟར་ཏོག་ལྕང་མའི་སྤྲོ་གསེང་གླིང་ག་ (Willow Resort Stok )ཞེས་པར་ཆིབས་བསྒྱུར་གྱིས་ཏོག་རྒྱལ་མོ་དང་། ཁོང་གི་ནང་མིར་མཇལ་ཁ་སྩལ་ཞིང་། གསོལ་ཇ་འབྲས་སིལ་འདེགས་འབུལ་གྲུབ་མཚམས་ཞི་བའི་ཚལ་གྱི་ཕོ་བྲང་དགེ་འཕེལ་གླིང་དུ་ཆིབས་བསྒྱུར་བསྐྱངས་ཡོད་པ་བཅས།།
