༄༅། །འདི་གར་བྱང་ཨ་རིའི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༣ ཟླ་བ་ ༧ ཚེས་ ༡༡ ཉིན་ཨ་རིའི་ནང་རྟེན་གཞི་བྱས་པའི་འོད་ཟེར་གསར་ཁང་གིས་གོ་སྒྲིག་ཐོག  སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་རྗེས་དང་མ་འོངས་བོད་རྒྱའི་འགྲོ་ཕྱོགས་ཞེས་པའི་བརྗོད་གཞིའི་ཐོག་དྲྭ་ཐོག་ཚོགས་འདུ་ཞིག་བསྐོང་འཚོགས་གནང་ཡོད་པ་དང་། ཚོགས་འདུའི་འདིའི་ཐོག་ཐེའི་ཝན་སྐུ་ཚབ་དོན་གཅོད་སྐལ་བཟང་རྒྱལ་མཚན་ལགས་དང་། བྱང་ཨ་རིའི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས། ཨོསྟྲེ་ལི་ཡཱའི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཟླ་བ་བཟང་མོ་ལགས་བཅས་བོད་མིའི་སྐུ་ཚབ་ཏུ་མཉམ་ཞུགས་གནང་བ་དང་། ཨ་རི་དང་ཁེ་ན་ཊ་ནས་པེ་ཅིང་དཔྱིད་ཁའི་དུས་དེབ་ཀྱི་རྩོམ་སྒྲིག་པ་གྲགས་ཅན་སྐུ་ཞབས་ཧུ་ཕིང་ལགས་དང་མང་གཙོ་དོན་གཉེར་བ་སྐུ་མཁྱེན་མ་ཧྲེང་ཞོའི་ལགས། ཐེའི་ཝན་ནས་སྐུ་ཞབས་ལི་ཤི་ཐན་ལགས།   ཨོསྟྲེ་ལི་ཡཱ་ནས་སྐུ་ཞབས་ཧྥང་ཁྲུང་ཡིས་ལགས་བཅས་རྒྱ་རིགས་ཀྱི་སྐུ་ཚབ་ཐོག་མཉམ་ཞུགས་གནང་ཞིང་། འགྲོ་གླེང་ཚོགས་འདུ་འདི་བཞིན་འོད་ཟེར་གསར་ཁང་གི་འགན་འཛིན་སྐུ་མཁྱེན་མ་ཝང་རོས་ཆིན་གྱིས་གཙོ་སྐྱོང་གནང་ཡོད།

ཚོགས་འདུའི་ཐོག་༸སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་གི་ལོ་རྒྱུས་རིན་ཐང་ལྡན་པའི་མཛད་རྗེས་ཁག་ལ་ཚོགས་ཞུགས་པ་ཚང་མས་ཕྱིར་དྲན་དང་དཔྱད་ཞིབ་གནང་དོན་དུ། ༸མགོན་པོ་མཆོག་གིས་བྱམས་བརྩེ་དང་འཚེ་མེད་ཞི་བའི་ལྟ་གྲུབ་ཀྱི་དགོངས་གཞི་ལ་འཛམ་གླིང་ཡོངས་ཀྱིས་དད་གུས་བྱེད་བཞིན་ཡོད་པ་དང་། འདས་པའི་ལོ་ངོ་བདུན་བཅུ་ལྷག་གི་རིང་རྒྱ་ནག་དམར་ཤོག་གི་འགོ་འཁྲིད་རིམ་པ་འགྱུར་བ་ཕྱིན་ནས་འགོ་འཁྲིད་རྒན་གྲས་ད་ལྟའི་ཆར་གཅིག་ཀྱང་ལྷག་མེད་ལ། ༸མགོན་པོ་མཆོག་སྐུ་གཟུགས་གསལ་ཐང་ཐོག་བོད་མིའི་རང་དབང་འཐབ་རྩོད་མུ་མཐུད་གནས་ཡོད་པ་དགའ་འོས་པའི་གནས་ཚུལ་ཡིན་པ་མ་ཟད་མགྱོགས་མྱུར་བོད་དོན་བདེན་མཐའ་གསལ་བའི་རེ་འདུན་དང་འབྲེལ་གཏམ་བཤད་གནང་། སྐུ་ཞབས་ཧུ་ཕིང་ལགས་ནས་༸གོང་ས་མཆོག་གིས་དབུ་མའི་ལམ་གྱི་སྲིད་བྱུས་གསར་སྟོན་མཛད་པ་ནི་ཤེས་རབ་རྣམ་དཔྱོད་འཕེལ་བའི་ལམ་སྟོན་ཡིན་པ་དང་། སྲིད་ཇུས་དེ་ཉིད་རྒྱ་ནག་དམར་ཤོག་གཞུང་བསམ་བློ་གཏོང་ཐུབ་མཁན་ཡིན་ན་དེ་ནི་སྒྲུབ་ཐུབ་པ་དང་འབྲས་བུ་ཐོན་ཐུབ་པའི་ལམ་སྟོན་ཡིན་པ་གསུངས་སོང་། དེ་བཞིན་རྒྱ་རིགས་གྲོགས་པོ་ཚོས་༸མགོན་པོ་མཆོག་གི་ཆོས་ཕྱོགས་མཛད་རྗེས་དང་ཆབ་སྲིད་ཐད་ཀྱི་མཛད་རྗེས། ཚན་རིགས་ལ་ལེགས་སྐྱེས་ཕུལ་བའི་མཛད་རྗེས་སོགས་བགྲང་ནས་འཛམ་གླིང་གི་མི་སྣ་གྲགས་ཅན་ཁག་ནས་ཀྱང་༸མགོན་པོ་མཆོག་ལ་དད་གུས་གནང་བཞིན་ཡོད་པ་སོགས་འགྲེལ་བརྗོད་གནང་སོང་།

ཐའི་ཝན་སྐུ་ཚབ་དོན་གཅོད་སྐལ་བཟང་རྒྱལ་མཚན་ལགས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་བཞི་དང་འབྲེལ། བོད་མི་དང་ཡང་སྒོས་འཛམ་གླིང་གི་སྐྱེ་འགྲོ་ཀུན་ལ་བདེ་སྐྱིད་ཀྱི་བྱུང་རྩ་འབྱིན་ཐུབ་པའི་བཀའ་དྲིན་བསྐྱངས་གནང་བའི་མཛད་རྗེས་སོགས་ཀྱི་སྐོར་ངོ་སྤྲོད་ཞུས་གནང་བ་དང་། ཨ་རིའི་དོན་ཁང་རྒྱ་རིགས་འབྲེལ་མཐུད་པས་སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་གིས་བོད་མི་དང་། རྒྱ་རིགས། འཛམ་གླིང་མི་མང་སྤྱི་སོ་སོར་ཕན་བདེའི་ལམ་སྟོན་གནང་བའི་བཀའ་དྲིན་སོགས་དང་བཀའ་ཤག་གི་འཁྲུངས་སྐར་གྱི་གསུང་འཕྲིན་སྙིང་དོན་སོགས་ངོ་སྤྲོད་བྱས། ཨོསྟྲེ་ལི་ཡཱིའི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཟླ་བ་བཟང་མོ་ལགས་ནས་༸གོང་ས་མཆོག་གི་ཐུགས་བསྐྱེད་དམ་བཅའ་བཞི་དང་༸མགོན་པོ་མཆོག་ནས་ནང་སེམས་བཅུན་ཐབས་ཀྱི་ལམ་སྟོན་བཀའ་དྲིན་བསྐྱངས་བའི་སྐོར་སོགས་འགྲེལ་བརྗོད་གནང་། འགྲོ་གླེང་ཚོགས་འདུའི་ནང་ཉེ་ཆར་སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་ནས་རྒྱ་ནག་གིས་གཞུང་འབྲེལ་དང་གཞུང་འབྲེལ་མ་ཡིན་པའི་བརྒྱུད་ལམ་ནས་གྲོས་མོལ་ཡོང་ཐབས་ཀྱི་སྐོར་ལ་དྲི་བ་ཡོང་བ་ལྟར། སྐུ་ཚབ་དོན་གཅོད་སྐལ་བཟང་རྒྱལ་མཚན་ལགས་ནས་དེའི་སྐོར་འགྲེལ་བཤད་གནང་བ་དང་ཚོགས་འདུའི་ནང་ད་དུང་མ་འོངས་པའི་རྒྱ་བོད་ཀྱི་འགྲོ་ཕྱོགས་སོགས་ཀྱི་ཐད་ལ་ཚོགས་ཞུགས་པ་རྣམས་ནས་སོ་སོའི་བསམ་ཚུལ་ཕུལ་གནང་སོང་།

ཕྱི་ལོ་ ༢༠༢༣ ཟླ་བ་ ༧ པའི་ཚེས་ ༡༤ ཉིན་འོད་ཟེར་གསར་ཁང་གིས་མཁས་པའི་འགྲོ་གླེང་ཚོགས་འདུ་ཞིག་སྐོང་འཚོགས་གནང་ནས། ཉེ་དུས་དགོངས་པ་རྫོགས་པའི་སྐུ་ཞབས་ཡན་མིང་ཧྥུ་ལགས་ལ་རྗེས་དྲན་དང་རྒྱ་ནག་གི་གནས་བབ་སོགས་ཀྱི་སྐོར་ལ་གླེང་སློང་བྱས་ཡོད་པ་རེད། ཨ་རིའི་དོན་ཁང་གི་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་ཀྱང་མགྲོན་འབོད་གནང་དོན་ལྟར་ཚོགས་འདུར་མཉམ་ཞུགས་བྱས། ཚོགས་འདུའི་ཐོག་སྐུ་ཞབས་ཡན་ཅའ་ཆི་ལགས་ནས་དམིགས་གསལ་གཏམ་བཤད་ཕུལ་ཡོད་པ་དང་། སྐུ་ཞབས་ཧུ་ཕིང་ལགས་དང་། སུའུ་ཞོའོ་ཁང་ལགས། ཁྲིན་ཁོའི་བདེ་ལགས་སོགས་རྒྱ་རིགས་ཤེས་ཡོན་ཅན་མང་པོས་མཉམ་ཞུགས་ཐོག་དམ་པ་དེའི་བྱས་རྗེས་སོགས་ལ་རྗེས་དྲན་གྱི་གཏམ་བཤད་སྤེལ་ཡོད་པ་རེད།  ཡན་མིང་ཧྥུ་ནི་ལོ་རབས་གྱ་བཅུའི་ནང་རྒྱ་ནག་དམག་ཤོག་ཚོགས་པའིདབུས་དྲུང་ལས་ཁང་གི་དྲུང་ཡིག་དང་། འཐབ་ཕྱོགས་གཅིག་འགྱུར་གྱི་བློན་ཆེན། རྒྱ་ནག་རྒྱལ་ཡོངས་སྲིད་གྲོས་ཀྱི་ཚོགས་གཙོ་གཞོན་པའི་གོ་གནས་ཐོག་ཕྱག་ལས་གནང་མྱོང་མཁན་ཞིག་ཡིན་པ་རེད།

རྒྱ་རིགས་འབྲེལ་མཐུད་པས་ཡན་མིང་ཧྥུ་ཡི་སྐོར་ལ་བོད་རིགས་རྒན་རབས་པ་ཁག་གི་གསུངས་པ་དང་བྲིས་པའི་དཔེ་དེབ་ནས་ངོ་སྤྲོད་བྱུང་བ་དང་། ལྷ་སྲས་རྒྱ་ལོ་དོན་དོན་གྲུབ་དང་རྒྱ་རི་རིན་པོ་ཆེ་སོགས་བོད་རྒྱ་འབྲེལ་མོལ་ཐད་མཛད་རྗེས་ཧ་ཅང་ཆེ་བའི་མི་སྣ་ལྷན་འབྲེལ་བ་བྱུང་ཡོད་པའི་སྐོར་དང་། དེ་བཞིན་ཁོང་གིས་གོ་ཐོས་བྱུང་བའི་༸པཎ་ཆེན་རིན་པོ་ཆེ་སྐུ་འཕྲེང་བཅུ་པ་དང་སྐུ་ཞབས་ཡན་མིང་ཧྥུ་བར་གྱི་འབྲེལ་བ་དམ་ཟབ་ཡོད་པ་སོགས་ངོ་སྤྲོད་བྱས། དེ་བཞིན་རྒྱ་རིགས་འབྲེལ་མཐུད་པས་བོད་ཕྱི་ནང་གཉིས་སུ་ཡོད་པའི་བོད་མི་ཚང་མས་སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་ལ་དད་གུས་གཡོ་བར་མེད་པར་ཚེ་རབས་ནས་ཚེ་རབས་ལ་རྗེས་འཛིན་བྱེད་ངེས་ཡིན་པ་དང་། རྒྱ་ནག་ནང་ནས་ཀྱང་ཤེས་ཡོན་ཅན་དང་མི་མང་བོད་དོན་ཐད་ཤེས་རྟོགས་ཡོད་མཁན་མང་དུ་ཕྱིན་ནས་༧མགོན་པོ་མཆོག་གི་ལམ་སྟོན་གནང་བའི་དབུ་མའི་ལམ་གྱི་ཐབས་ཇུས་ལ་རྒྱབ་བསྐྱོར་གནང་བཞིན་ཡོད་པ། བོད་དོན་དཀའ་རྙོག་སེལ་བར་རྒྱ་ནག་གིས་དྲང་བདེན་ལྡན་པའི་་གྲོས་མོལ་གྱི་སྒོ་ཕྱེ་དགོས་པ་སོགས་འགྲེལ་བཤད་གནང་ཡོད་པ་བཅས།།