༄༅། །ཕྱི་ལོ་ ༢༠༢༣ ཟླ་བ་ ༠༧ ཚེས་ ༠༦ ཉིན་སུད་སི་དང་ལེག་ཊིན་ཚིན་གནས་སྡོད་བོད་མི་རྣམས་ནས་རི་ཀོན་ཆོས་འཁོར་དགོན་དུ་ཚང་འཛོམས་ཀྱིས་ཆོས་ཕྱོགས་ཀྱི་མཛད་སྒོའི་ལམ་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༨ ཕེབས་པའི་སྐུའི་འཁྲུངས་སྐར་སྲུང་བརྩི་ཞུས་ཡོད།
དེ་ཡང་དུས་ཆེན་མཛད་སྒོའི་ཐོག་མར་མཁན་པོ་ཐུབ་བསྟན་ལེགས་སྨོན་ལགས་དང་ཆོས་འཁོར་དགོན་གྱི་དགེ་འདུན་པ་རྣམས་ནས་སྣེ་ཁྲིད་དེ་ཞལ་འདོན་གསུང་འདོན་དང་མགོན་པོ་མཆོག་སྐུ་ཚེ་ཡུན་དུ་བརྟན་པའི་ཆོས་ཕྱོགས་ཀྱི་གནང་སྒོ་ཁག་ལེགས་གྲུབ་བྱུང་མཚམས་སུད་སི་དོན་ཁང་གི་འབྲེལ་ལས་བསྟན་འཛིན་ཆོས་བཟང་ལགས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་གྱི་ལེགས་སྐྱེས་ཡག་ཤོས་ནི་མགོན་པོ་མཆོག་གི་བཀའ་གསུང་ཅི་སྒྲུབ་ཞུས་ཏེ་མི་བཟང་པོ་ཞིག་བྱ་རྒྱུ་དེ་ཡིན་ཞེས་སོགས་གསུངས།
ཕྱི་ཚེས་ ༠༩ ཉིན་སུད་སི་དང་ལེག་ཊིན་ཚིན་བོད་རིགས་སྤྱི་མཐུན་ཚོགས་པས་ཛུ་རིག་ཏུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་འཁྲུངས་སྐར་སྲུང་བརྩིའི་མཛད་སྒོ་ཞིག་གོ་སྒྲིག་ཞུས་ཡོད་པ་ལྟར། རི་ཀོན་ཆོས་འཁོར་དགོན་གྱི་མཁན་པོ་ཐུབ་བསྟན་ལེགས་སྨོན་ལགས་དང་། སུད་སི་གྲོས་ཚོགས་འཐུས་མི་དང་སུད་སི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཟུང་སྦྲེལ་ཚོགས་གཙོ་ནིག་གུ་ར་(Nik Gugger)ལགས། སུད་སི་དོན་ཁང་གི་བསྟན་འཛིན་ཆོས་བཟང་ལགས་སོགས་ཕེབས་ཞུགས་གནང་ཡོད།
སྐབས་དེར་སུད་སི་དང་ལེག་ཊིན་ཚིན་བོད་རིགས་སྤྱི་མཐུན་ཚོགས་པའི་ཚོགས་གཙོས་ཕེབས་བསུའི་འཚམས་འདྲི་གནང་ཞིང་། རི་ཀོན་ཆོས་འཁོར་དགོན་གྱི་མཁན་པོ་བསྟན་འཛིན་ལེགས་སྨོན་ལགས་ནས་བོད་མི་རྣམས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་གཞིར་བཟུང་མི་བཟང་པོ་ཞིག་བྱེད་དགོས་སྐོར་ལམ་སྟོན་གནང་། དེ་བཞིན་སུད་སི་དོན་ཁང་གི་བསྟན་འཛིན་ཆོས་བཟང་ལགས་ཀྱིས་བོད་མི་རྣམས་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་སླད་རྡོག་རྩ་ཆིག་སྒྲིལ་ངང་ནས་འབད་རྩོལ་གནང་དགོས་པའི་གལ་གནད་སྐོར་གསུངས་རྗེས་སུད་སི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཟུང་སྦྲེལ་ཚོགས་གཙོ་ནིག་གུ་ར་ལགས་ནས་བོད་དོན་ལ་མུ་མཐུད་རྒྱབ་སྐྱོར་གནང་རྒྱུའི་ནན་བརྗོད་གནང་ཡོད།
གསུང་བཤད་ལས་རིམ་གྲུབ་རྗེས་གཞས་སྣ་འཁྲབ་སྟོན་གྱི་ལམ་ནས་དུས་ཆེན་སྲུང་བརྩི་གཟབ་རྒྱས་ངང་ཞུས་ཡོད་པ་བཅས།། 
