༄༅། །མཉམ་འབྲེལ་རྒྱལ་ཚོགས་ཀྱི་ཚོགས་མི་རྒྱལ་ཁབ་ཐུན་མོང་ནས་རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་རྡོག་རོལ་རྩིས་མེད་གཏོང་བཞིན་པར་ཐུགས་འཚབ་ཤུགས་ཆེ་བསྟན་ཡོད།
དེ་ཡང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱིས་གོ་ལ་སྤྱི་ཡོངས་ཀྱི་འགྲོ་བ་མིའི་ཐོབ་ཐང་སྐོར་དུས་བསྟུན་སྙན་སྒྲོན་གནང་སྐབས་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་རང་དབང་ལྡན་པའི་ཆེད་མཁས་པའི་སྙན་ཐོ་ནང་གསལ་རྒྱ་ནག་གཞུང་གིས་བོད་ཀྱི་ངོ་བོ་ཤུལ་མེད་བཟོ་རྒྱུའི་བཙན་སྒྱུར་སྲིད་བྱུས་ཐེ་བའི་འགྲོ་བ་མིའི་ཐོབ་ཐང་རྡོག་རོལ་ཚབས་ཆེ་གཏོང་བཞིན་པ་གསལ་སྟོན་དང་འབྲེལ། རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ལས་ཁུངས་ངོས་ནས་རྒྱ་ནག་གཞུང་དང་འབྲེལ་མོལ་གནང་སྟེ་རྒྱ་ནག་ནང་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ལས་ཁུངས་གསར་འཛུགས་ཞུ་ཕྱོགས་ཐད་བཀའ་བསྡུར་གནང་རྒྱུ་མ་ཟད། རྒྱ་ནག་གཞུང་ནས་རྒྱལ་ཚོགས་ཀྱི་ཆེད་མཁས་པའི་དགོངས་ཚུལ་ལས་ལེགས་སྤེལ་ཉེས་འགོག་གི་ལེགས་ཆ་ལེན་དགོས་པའི་འབོད་སྐུལ་གནང་ཡོད་པ་རེད།
རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་གོ་ལ་སྤྱི་ཡོངས་ཀྱི་འགྲོ་བ་མིའི་ཐོབ་ཐང་གི་གནས་བབ་སྙན་སྒྲོན་གནང་རྗེས་རྒྱལ་ཚོགས་ཀྱི་ཚོགས་མི་རྒྱལ་ཁབ་ཨོསྟྲེ་ལི་ཡཱ་དང་། ཅེཀ་སྤྱི་མཐུན་རྒྱལ་ཁབ། ཇར་མ་ནཱི། སུད་སི། སྭི་ཌན། ཨིན་ཡུལ་སོགས་ཀྱི་བསྒྲགས་གཏམ་སྒྲོགས་སྦྱང་གནང་སྐབས་བོད་ནང་གི་འགྲོ་མིའི་ཐོབ་ཐང་གནས་བབ་ཐད་གླེང་སློང་གནང་ཡོད།
རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ལས་ཁུངས་ཤིག་རྒྱ་ནག་ཏུ་གསར་འཛུགས་གནང་འཆར་དང་འབྲེལ་ཏེ། ཅེཀ་སྤྱི་མཐུན་རྒྱལ་ཁབ་དང་ཨིན་ཡུལ་ནས་རྒྱ་ནག་གཞུང་གིས་རྒྱལ་སྤྱིའི་ཁྲིམས་སྒྲིག་ལ་གུས་བརྩི་དང་ལེན་གྱིས་འགྲོ་བ་མི་རིགས་ཡོངས་ཀྱི་འགྲོ་བ་མིའི་ཐོབ་ཐང་ལ་སྲུང་སྐྱོབ་ཞུས་ཐོག་བོད་ནང་འཆར་གཞི་ལྡན་པའི་ངང་འགྲོ་བ་མིའི་ཐོབ་ཐང་རྡོག་རོལ་གཏོང་མཚམས་འཇོག་དགོས་པའི་རེ་སྐུལ་གནང་ཡོད།
དེ་མཚུངས་སུད་སི་དང་། སྭི་ཌན། ཇར་མི་ནི་ཡིས་བོད་ནང་གི་འགྲོ་བ་མིའི་ཐོབ་ཐང་གནས་བབ་ལ་ཐུགས་འཚབ་ཆེན་པོ་བསྟན་ཏེ། འགྲོ་བ་མིའི་ཐོབ་ཐང་སྲུང་སྐྱོབ་པར་དྲག་གནོན་བྱེད་རྒྱུ་ཐེ་བའི་གནད་དོན་ཐོག་གླེང་སློང་གནང་ཞིང་། དེ་འབྲེལ་ཨོསྟྲེ་ལི་ཡཱའི་སྐུ་ཚབ་ནས་ཀྱང་རྒྱལ་ཚོགས་ཀྱི་བུད་མེད་ལ་དབྱེ་འབྱེད་འགོག་ཐབས་ལྷན་ཚོགས་ཀྱི་སྙན་ཐོ་ནང་གསལ་ལྟར་རྒྱ་གཞུང་གིས་བོད་ཀྱི་བུད་མེད་རྣམས་ལ་དབྱེ་འབྱེད་བཤུ་གཞོག་གཏོང་བཞིན་པར་ཐུགས་འཚབ་བསྟན་ཡོད་པ་རེད།
གཞན་ཡང་ལྷན་ཚོགས་ཐོག་ཨ་རིས་ཚོགས་མི་རྒྱལ་ཁབ་གྲངས་ ༦༥ ཐུན་མོང་གི་བསྒྲགས་གཏམ་སྒྲོགས་སྦྱང་གནང་སྟེ། སྲིད་གཞུང་གིས་གྲངས་ཉུང་ཆོས་ལུགས་དང་། སྐད་ཡིག མི་རིགས་ཐོག་དྲག་གནོན་གྱིས་འགྲོ་བ་མིའི་ཐོབ་ཐང་རྡོག་རོལ་རྩིས་མེད་གཏོང་བཞིན་པ་གསལ་སྟོན་དང་། གྲངས་ཉུང་མི་རིགས་ཐོག་དམ་བསྒྲགས་དང་དྲག་གནོན་ཆེད་ཁྲིམས་དང་སྲིད་བྱུས་གཏན་འབེབས་ཀྱིས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནས་སྟངས། དབང་འཛིན་སྲིད་གཞུང་གིས་རིག་གཞུང་དང་གནའ་བོའི་ས་ཚིགས་གལ་ཆེ་ཐེ་བའི་ཆོས་སྡེ་གཏོར་བཤིག སྐད་ཡིག་སྦྱོང་སྤྱོད་ལ་དམ་བསྒྲགས། ཤེས་ཡོན་ལ་སྙད་དེ་བྱིས་པ་རིག་གཞུང་གཞན་ལ་བཙན་སྒྱུར། ཡུལ་མིའི་འགྲུལ་བཞུད་ལ་བཀག་སྡོམ། འཚོ་བ་དང་། ཤེས་ཡོན། འཕྲོད་བསྟེན་ཐོབ་ཐང་ལ་དམ་བསྒྲགས་བྱེད་ཀྱི་ཡོད་སྐོར་སྙན་སེང་ཞུས་ཡོད།
དེ་མ་ཟད་གནད་དོན་བྱེ་བྲག་པའི་ཐོག་བགྲོ་གླེང་གནང་སྐབས་ཨ་རིའི་སྐུ་ཚབ་ནས་རྒྱལ་ཚོགས་ཀྱི་ཤེས་ཡོན་དང་འབྲེལ་བའི་དམིགས་བསལ་ཆེད་མཁས་པས་བོད་ནང་རྒྱ་ནག་གཞུང་གིས་སྟངས་འཛིན་བྱེད་བཞིན་པའི་མི་སེར་སྤེལ་ཡུལ་གཏན་འཇགས་སློབ་གྲྭའི་སྐོར་གསལ་སྟོན་གནང་བར་བསྔགས་བརྗོད་གནང་སྟེ། རྒྱ་གཞུང་གིས་གཉེར་བའི་མི་སེར་སྤེལ་ཡུལ་གཏན་འཇགས་སློབ་གྲྭ་དེ་དག་ཏུ་བོད་ཕྲུག་ས་ཡ་གཅིག་ལྷན་ཕ་མ་དང་ཁ་བྲལ་དུ་བཅུག་ནས་བཙན་ཤེད་ཀྱི་སློབ་འཇུག་བྱེད་ཀྱི་ཡོད་པ་དེ་ནི་འགྲོ་བ་མིའི་ཐོབ་ཐང་རྡོག་རོལ་ཚབས་ཆེ་གཏང་བ་ཆགས་ཡོད་སྐོར་གསལ་བཤད་གནང་ཡོད་པ་རེད།
ཐེངས་འདིའི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ལྔ་བཅུ་ང་གསུམ་པའི་སྐབས་བོད་ཀྱི་བུད་མེད་ཀྱི་གནས་བབ་དང་བོད་ནང་གི་མི་སེར་སྤེལ་ཡུལ་གཏན་འཇགས་སློབ་གྲྭའི་སྐོར་གླེང་སློང་ཤུགས་ཆེ་གནང་ཡོད་པ་མ་ཟད། སུད་སི་སྐུ་ཚབ་དོན་ཁང་དང་འཇིགས་ཉེན་ཡོད་པའི་མི་རིགས་ལྷན་ཚོགས་ནས་བོད་ནང་གི་ཛ་དྲག་གནས་སྟངས་སྐོར་ཟུར་ཚོགས་ཤིག་ཀྱང་བསྐོང་ཚོགས་གནང་ཡོད་པ་བཅས།།
