༄༅། །ཕྱི་ལོ་ ༢༠༢༣ ཟླ་བ་ ༠༧ ཚེས་ ༢༣ ཉིན་རྒྱ་གར་གྱི་རྒྱལ་ས་ལྡི་ལིར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མས་རྒྱ་གར་གནས་འཁོད་བོད་དོན་རྒྱབ་སྐྱོར་ཚོགས་པ་ལྷན་འཛོམས་ཀྱི་ཚོགས་འདུ་ཞིག་བསྐོང་ཚོགས་གནང་ཡོད།
དེ་ཡང་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་པའི་རྒྱལ་ཡོངས་ཚོགས་གཙོ་རིན་ཆེན་མཁའ་འགྲོ་ཁེར་མེ་ལགས་ཀྱི་གཙོ་སྐྱོང་འོག་ཚོགས་འདུའི་ནང་ལྡི་ལིའི་སྐུ་ཚབ་དོན་གཅོད་བློ་བཟང་ཤཱསྟྲི་ལགས་དང་། ཕྱི་དྲིལ་དྲུང་འཕར་བསྟན་འཛིན་ལེགས་བཤད་ལགས། རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་པའི་ཟུང་སྦྲེལ་ཚོགས་གཙོ་བླ་མ་ཆོས་འཕེལ་བཟོད་པ་ལགས། སྐུ་ཞབས་སུ་རེནྡྲ་ཀུ་མཱར་ལགས། སྐུ་ཞབས་ཨར་བིནྚ་ནོ་ཀོ་སི་ལགས། དེ་བཞིན་རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་པའི་ས་གནས་འབྲེལ་མཐུད་པ་དང་། འཕགས་བོད་འབྲེལ་མཐུད་ལས་ཁུངས་ཀྱི་འབྲེལ་མཐུད་པ་དང་ལས་བྱེད་བཅས་མཉམ་ཞུགས་གནང་ཡོད།
ཚོགས་འདུའི་ཐོག་མར་འཕགས་བོད་འབྲེལ་མཐུད་ལས་ཁུངས་ཀྱི་འབྲེལ་མཐུད་པ་གཞོན་པ་བཀྲ་ཤིས་བདེ་སྐྱིད་ལགས་ཀྱིས་ཕེབས་བསུའི་གསུང་བཤད་དང་ཚོགས་འདུའི་གྲོས་གཞི་ངོ་སྤྲོད་གནང་རྗེས་འཕགས་བོད་འབྲེལ་མཐུད་ལས་ཁུངས་ཀྱི་གསར་བསྐོས་འབྲེལ་མཐུད་པ་ཐུབ་བསྟན་རིག་འཛིན་ལགས་ངོ་སྤྲོད་གནང་ཡོད་པ་རེད།
དེ་རྗེས་ཚོགས་བཅར་བ་ནང་ཁུལ་ངོ་སྤྲོད་གྲུབ་མཚམས་སྐུ་ཞབས་རིན་ཆེན་མཁའ་འགྲོ་ལགས་ཀྱིས་རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མར་ལེགས་བཅོས་དགོས་གལ་ཆེ་ཚུལ་དང་། ཚོགས་པ་དེ་ཉིད་བོད་མིའི་རང་དབང་འཐབ་རྩོད་ལ་གལ་གནད་ཆེན་པོ་ཆགས་སྐོར་འགྲེལ་བརྗོད་གནང་བ་མ་ཟད། ཚོགས་འདུའི་དམིགས་ཡུལ་གཙོ་བོ་གཉིས་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གམ་ཁོང་གི་སྐུ་ཚབ། ཡང་ན་བོད་མིའི་སྒྲིག་འཛུགས་དང་རྒྱ་ནག་མིང་མང་སྤྱི་མཐུན་རྒྱལ་ཁབ་བར་གྲོས་མོལ་སླར་གསོ་ཡོང་ཐབས་དང་། རྒྱལ་སྤྱི་དང་རྒྱ་གར་གྱི་དཔོན་རིགས་ལ་གནོན་ཤུགས་སྤྲད་ཐོག་རྒྱ་ནག་གཞུང་ནས་བོད་རྒྱ་གྲོས་མོལ་ལ་ཞུགས་རྒྱུར་སྐུལ་དེད་གཏང་རྒྱུ་ཡིན་ཞེས་གསུངས།
ལྡི་ལིའི་སྐུ་ཚབ་དོན་གཅོད་བློ་བཟང་ཤཱསྟྲི་ལགས་ནས་འཕགས་བོད་གཉིས་ཀྱི་ལོ་རྒྱུས་ཀྱི་འབྲེལ་བ་ལ་ནན་བརྗོད་དང་སྦྲགས། རྒྱ་གར་གཞུང་དམངས་གཉིས་ནས་བོད་མི་རྣམས་ལ་འདས་པའི་ལོ་ངོ་བཅུ་ཕྲག་དྲུག་རིང་རྒྱབ་སྐྱོར་རོགས་ཕན་གནང་བར་ཐུགས་རྗེ་ལེགས་འབུལ་ཞུས།
ཚོགས་འདུའི་ཐོག་གཙོ་བོ་ཕྱི་ལོ་ ༢༠༢༢ ཟླ་བ་ ༡༡ ཚེས་ ༢༨ ནས་ ༢༩ བར་ཚོགས་པའི་རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་བདུན་པའི་ནང་ལས་འཆར་གྲོས་ཆོད་གཏན་འབེབས་གནང་བ་ཁག་ལ་གླེང་སློང་གནང་སྟེ། རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མའི་ལམ་སྟོན་འོག་བོད་དོན་རྒྱབ་སྐྱོར་ཚོགས་པ་ཁག་མཉམ་སྦྲེལ་གྱིས་ལས་དོན་སྤེལ་ཕྱོགས་ཇི་དགེའི་ཐད་འཆར་གཞི་འཆར་འགོད་དང་། དེ་བཞིན་རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མའི་དམིགས་ཡུལ་དང་། སྒྲོམ་གཞི། ལས་དོན་བྱེད་ཕྱོགས་ཀྱི་རྩ་འཛིན་སྒྲིག་གཞིར་བསྐྱར་བཅོས་གནང་སྒོ་ཁག་གནང་ཡོད།
ཕྱོགས་མཚུངས་ཚོགས་བཅར་བ་རྣམས་ནས་རྒྱ་གར་མི་སེར་ལ་བོད་དོན་གོ་རྟོགས་སྤེལ་རྒྱུའི་གལ་གནད་དང་། རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མའི་ལས་བྱེད་དོན་ཕྱོགས་སོགས་ཀྱི་སྐོར་བསམ་ཚུལ་བརྗེ་ལེན་ལྷུག་པོ་གནང་ཡོད། ཐེངས་འདིའི་རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་འདུར་འཕགས་བོད་འབྲེལ་མཐུད་ལས་ཁུངས་ནས་མཐུན་འགྱུར་གང་ལྕོགས་ཞུས་ཡོད་པ་རེད།
ཕྱི་དྲོ་རྒྱ་གར་བྷི་ཇེ་པོ་སྲིད་དོན་ཚོགས་པའི་ཚོགས་མི་རྒན་པ་བི་ཇེ་ཇོ་ལི་(Vijay Jolly)ལགས་ནས་རྒྱབ་སྐྱོར་མཚོན་ཆེད་རྒྱ་གར་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མའི་ཚོགས་མི་རྣམས་ལ་དགོང་ཚིགས་གསོལ་སྟོན་ཞིག་གོ་སྒྲིག་ཞུས་ཏེ། རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མའི་ཚོགས་མི་རྣམས་ལ་འཚམས་འདྲི་དང་རྒྱབ་སྐྱོར་མུ་མཐུད་གནང་རྒྱུའི་ཞལ་བཞེས་གནང་ཡོད་པ་བཅས།།
