༄༅། །རྒྱ་གར་གྲོས་ཚོགས་འོག་མའི་ཚོགས་གཙོ་སྐུ་ཞབས་ཨོམ་བྷིར་ལ་ (Om Birla) མཆོག་སོག་ཡུལ་དུ་གཞུང་འབྲེལ་ཕྱོགས་ཕེབས་སྐབས་དགའ་ལྡན་ཐེག་ཆེན་དགོན་པར་གནས་གཟིགས་སུ་ཕེབས་ཡོད་པ་རེད། 

སྐབས་དེར་རྒྱ་གར་གྱི་རིག་གཞུང་འབྲེལ་ལམ་ལྷན་ཚོགས་ནས་ཁམ་བ་ནོ་མན་ཁཱན་ (Khamba Nomun Khan) མཆོག་གིས་ནང་ཆོས་དར་འཕེལ་དང་རྒྱ་གར་དང་སོག་པོའི་འབྲེལ་ལམ་གོང་མཐོར་གཏོང་སླད་ཕྱག་ལས་རྒྱ་ཆེ་གནང་བར་ངོས་འཛིན་བསྔགས་བརྗོད་མཚོན་དོན་དུ་ཁྱད་འཕགས་ནང་པའི་གཟེངས་རྟགས་(Distinguished Buddhist Award)ཞེས་པ་ཕུལ་ཡོད། སོག་ཡུལ་ནང་པའི་སྐྱབས་མགོན་ཁམ་བ་ནོ་མན་ཁཱན་མཆོག་ནི་དགའ་ལྡན་ཐེག་ཆེན་གླིང་གི་མཁན་པོ་དང་། སོག་པོ་ནང་པའི་བསྟི་གནས་ཁང་གི་དབུ་འཛིན་ཡིན་པ་རེད། 

རྒྱ་གར་གྲོས་ཚོགས་འོག་མའི་ཚོགས་གཙོ་ཨོམ་བྷིར་ལ་མཆོག་ལ་ཕེབས་བསུའི་སྐབས་རུ་སོག་སྐུ་ཚབ་དོན་གཅོད་ཏི་ལོ་རིན་པོ་ཆེ་མཆོག་ཀྱང་ཕེབས་ཡོད་པ་ལྟར། སོག་ཡུལ་རྒྱ་གར་གཞུང་ཚབ་ཆེན་མོ་ཨེམ་པི་སིངྒ་མཆོག་(M.P.Singh)གིས་གྲོས་ཚོགས་འོག་མའི་ཚོགས་གཙོ་མཆོག་ལ་ཏི་ལོ་རིན་པོ་ཆེ་ངོ་སྤྲོད་གནང་ཡོད། སྐབས་དེར་དགའ་ལྡན་ཐེག་ཆེན་གླིང་གི་དགེ་འདུན་པ་རྣམས་ནས་གར་འཆམ་དང་བཅས་རྒྱ་གར་གྲོས་ཚོགས་ཀྱི་ཚོགས་གཙོར་ཕེབས་བསུ་གཟབ་རྒྱས་ཐོག་དགོན་པར་གནས་གཟིགས་དང་། དེ་རྗེས་རྒྱ་གར་གྲོས་ཚོགས་འོག་མའི་ཚོགས་གཙོ་མཆོག་གིས་ཁམ་བ་ནོ་མན་ཁཱན་མཆོག་ལ་གཟེངས་རྟགས་གནང་ཡོད། 

དེ་དང་ཆབས་ཅིག་ཏི་ལོ་རིན་པོ་ཆེ་མཆོག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་བོད་མིའི་སྒྲིག་འཛུགས་ཀྱི་ཚབ་ཞུས་ཏེ་ཁམ་པ་ནོ་མན་ཁཱན་མཆོག་ལ་དྲན་རྟེན་ཕུལ་ཡོད་པ་བཅས།།