༄༅། །བལ་ཡུལ་སྐུ་ཚབ་དོན་གཅོད་ལས་ཁུངས་ཀྱི་ལས་བྱ་ཁ་ལོ་བ་དབང་འདུས་ཚེ་རིང་ལགས་བར་ལམ་གཟུགས་གཞི་བདེ་མིན་རྐྱེན་དམིགས་བསལ་ཕྱེད་ཕོགས་ནད་དགོངས་ཐོག་ཡོད་པ་ཕྱི་ལོ་ ༢༠༢༣ ཟླ་བ་ ༧ ཚེས་ ༩ ཉིན་གྱི་དགོང་མོ་ཆུ་ཚོད་ ༡༠།༤༥ ཐོག་སྤོག་ར་བྱམས་པ་གླིང་བོད་མིའི་གཞིས་ཆགས་སུ་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་དཔལ་ལྡན་བཀའ་ཤག་ཏུ་སྙན་སེང་བྱུང་བར་ཐུགས་ཕམ་དང་འབྲེལ་དམ་པ་ཁོང་གིས་ཚེ་རབས་ཕྲེང་བར་བསགས་པའི་སྡིག་སྒྲིབ་བྱང་ཞིང་དག་ནས་མངོན་མཐོ་ངེས་ལེགས་ཀྱི་གོ་འཕང་མགྱོགས་ནས་མྱུར་དུ་འཐོབ་པའི་སྨོན་ལམ་གསོལ་འདེབས་ཞུ་ཕྱིར་དེ་རིང་ཕྱི་ཚེས་ ༡༠ ཉིན་གྱི་ཕྱི་དྲོ་ཆུ་ཚོད་ ༣ པའི་ཐོག་རྡ་ས་གངས་སྐྱིད་སྲིད་སྐྱོང་ཚོགས་ཁང་དུ་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་། ལྷན་ཁང་ཁག་གི་དྲུང་ཆེ་ཆུང་རྣམ་པ། དེ་བཞིན་སྲི་ཞུའི་ལས་བྱེད་བཅས་ཚང་འཛོམས་ཐོག་བཀའ་དྲུང་ཆུ་སྐྱ་སྦྲ་གཉིས་ཚེ་རྒྱལ་ལགས་ཀྱིས་དམ་པ་ཁོང་གི་ལོ་རྒྱུས་སྙིང་བསྡུས་ཤིག་སྒྲོགས་སྦྱང་གནང་རྗེས་སྨོན་ལམ་གསུང་འདོན་གནང་། དེ་རྗེས་དམ་པ་ཁོང་ལ་མྱ་ངན་གུས་འདུད་དང་གདུང་སེམས་མཉམ་སྐྱེ་མཚོན་སླད་ཕྱི་དྲོ་ཆུ་ཚོད་ ༤ ནས་བོད་མིའི་སྒྲིག་འཛུགས་ཀྱི་དབུས་ལས་ཁུངས་ཁག་ལས་མཚམས་བཞག་ཡོད།
དམ་པ་ཁོང་ནི། ཕྱི་ལོ་ ༡༩༨༣ ཟླ་བ་ ༡༢ ཚེས་ ༢༧ ཉིན་བལ་ཡུལ་སྤོག་ར་བྱམས་པ་གླིང་བོད་མིའི་གཞིས་ཆགས་སུ་སྐྱེས་ཤིང་། ཕྱི་ལོ་ ༢༠༡༢ ཟླ་བ་ ༣ ཚེས་ ༡ ཉིན་ཚོད་ལྟའི་ངོ་བོར་སྤོག་ར་གློ་སྒྲིག་ས་གནས་འགོ་འཛིན་ལས་ཁུངས་ཀྱི་ཁ་ལོ་བར་བསྐོ་གཞག་གནང་། ཕྱི་ལོ་ ༢༠༡༢ ཟླ་བ་ ༩ ཚེས་ ༢༥ ཉིན་གློ་སྒྲིག་ས་གནས་འགོ་འཛིན་ལས་ཁུངས་ཀྱི་ལས་བྱེད་ངོ་མར་བསྐོ་གཞག ཕྱི་ལོ་ ༢༠༢༡ ཟླ་བ་ ༡༢ ཚེས་ ༣༠ ནས་བལ་ཡུལ་སྐུ་ཚབ་དོན་ཁང་གི་ཁ་ལོ་བར་གནས་སྤོས། ཕྱི་ལོ་ ༢༠༢༣ ཟླ་བ་ ༥ ཚེས་ ༢༢ ནས་ཕྱི་ལོ་ ༢༠༢༣ ཟླ་བ་ ༩ ཚེས་ ༡༨ བར་ཕྱེད་ཕོགས་དམིགས་བསལ་ནད་དགོངས་ཞུས་འཁྲོལ། ཕྱི་ལོ་ ༢༠༢༣ ཟླ་བ་ ༧ ཚེས་ ༩ ཉིན་གྱི་དགོང་མོ་ཆུ་ཚོད་ ༡༠།༤༥ ཐོག་བལ་ཡུལ་གློ་སྒྲིག་ས་གནས་འགོ་འཛིན་ཁྱབ་ཁོངས་སྤོག་ར་བྱམས་པ་གླིང་བོད་མིའི་གཞིས་ཆགས་སུ་འདས་གྲོངས་གྱུར་འདུག་པ་བཅས། །
