༄༅། །འདི་གར་མོན་གྷོ་འདོད་རྒུ་གླིང་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན།  ཕྱི་ལོ་ ༢༠༢༣ ཟླ་བ་ ༧ ཚེས་ ༦ ཉིན་གྱི་སྔ་དྲོ་ཆུ་ཚོད་ ༨ ཐོག་བོད་མི་མང་ཕྱོགས་བཞུགས་སྤྱི་འཐུས་དང་། མཁན་རིན་པོ་ཆེ་རྣམ་པ། ས་གནས་འགོ་འཛིན། ས་འཐུས་ཚོགས་གཙོ། ས་གནས་རང་བདེན་ཚོགས་གཙོའི་ལས་ཚབ། མཉམ་སྦྲེལ་གྱི་ཚོགས་གཙོ་དང་དྲུང་ཆེ། གཏན་སློབ་ཀྱི་སློབ་སྤྱི་དང་དགེ་ཆེ་རྣམ་པ། བླ་སྤྱི་དང་དགོན་སྡེ་གྲྭ་ཚང་ཁག་གི་ཕྱག་མཛོད་རྣམ་པ། ཕྱི་ནང་སྨན་ཁང་གི་འགན་འཛིན་དང་སྨན་པ། གཞིས་མཉམ་འཕྲོད་གསུམ་གྱི་ལས་བྱེད། ས་གནས་གཞོན་ནུ་དང་བུད་མེད་ལྷན་ཚོགས་ཀྱི་ཚོགས་གཙོ། གཞིས་གྲོང་ཁག་གི་སྤྱི་མི། གཞིས་སྤྱི་ལྷ་མོ་ཚོགས་པ། སློབ་ཕྲུག་དང་སེར་སྐྱ་མི་མང་ཡོངས་ནོར་བུ་རིར་ལྷན་འཛོམས་ཀྱིས་བོད་སྐྱོང་ལྷ་སྲུང་འཕྲིན་བསྐུལ་དང་། སྐུ་རླུང་དར་འཛུགས་ཀྱིས་ཀི་བསྭོལྷ་རྒྱལ་དང་བཅས་དཀར་ཕྱོགས་སྐྱོང་བའི་ལྷ་ཀླུ་རྣམས་ལ་བསང་གསོལ་གཟབ་རྒྱས་ཞུས།

དེ་རྗེས་ཆུ་ཚོད་ ༩།༣༠ ཐོག་༸རྒྱལ་བའི་ཕོ་བྲང་ནས་༸སྐུ་དཔར་མཐོང་གྲོལ་རིན་པོ་ཆེ་དུང་རྒྱ་སྤོས་སྣེས་སྔོན་བསུས་ཏེ་གཞིས་སྤྱི་མི་མང་ཚོགས་ཁང་གི་མཛད་སྒོའི་བཞུགས་ཁྲི་སྟེང་དུ་གདན་འདྲེན་ཞུས་རྗེས་མཎྜལ་རྟེན་གསུམ་འདེགས་འབུལ་ཞུས། དེ་ནས་སྐུ་མགྲོན་གཙོ་བོ་ཤང་ཀར་གྷོ་ཏི་ (Shri Shankar Goudi, Tehsildar) ལགས་ཀྱིས་མར་མེ་ཞལ་ཕྱེ་གནང་གྲུབ་བསྟུན། སློབ་ཕྲུག་རྣམས་ནས་འཕགས་བོད་གཉིས་ཀྱི་རྒྱལ་གླུ་དང་དྲུག་ཅུ་དབྱངས་ལྡན་གྱི་གླུ་གཞས་བླངས་རྗེས་སྐུ་མགྲོན་གཙོ་བོ་ནས་༸རྒྱལ་བའི་འཁྲུངས་སྐར་གྱི་སྤྲི་ཀོར་གཏུབས་རྗེས་སྐུ་མགྲོན་ཁག་ལ་བགོ་འགྲེམས་དང་མི་མང་ལ་མངར་ཟས་བགོ་འགྲེམས་ཞུས།

དེ་ནས་ས་གནས་འགོ་འཛིན་ལྷག་པ་སྒྲོལ་མ་ལགས་ཀྱིས་དཔལ་ལྡན་བཀའ་ཤག་གི་བོད་ཨིན་གསུང་འཕྲིན་དང་། ས་འཐུས་ཚོགས་གཙོ་དགེ་བཤེས་ལྷ་རམས་པ་བློ་བཟང་སྙན་གྲགས་ལགས་ཀྱིས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་འཕྲིན་སྒྲོགས་སྦྱང་གནང་། 

དེ་རྗེས་དམིགས་བསལ་སྐུ་མགྲོན་བོད་མི་མང་སྤྱི་འཐུས་ཨ་ཀྲུག་ཚེ་བརྟན་ལགས་དང་སྐུ་མགྲོན་གཙོ་བོ་ཤང་ཀར་གྷོ་ཏི་ལགས་ཀྱིས་དུས་ཆེན་དང་འབྲེལ་བའི་གསུང་བཤད་གནང་གྲུབ་མཚམས་ཕྱི་ལོ་ ༢༠༢༣ ལོའི་འཛིན་རིམ་བཅུ་གཉིས་ཀྱི་ཕུལ་བྱུང་སློབ་ཡོན་བཞེས་མཁན་གཞིས་མི་བསྟན་འཛིན་ཨུ་རྒྱན་ལ་གཞིས་ལས་ཁང་ནས་ཕྱག་རྟགས་དང་། འབྲས་སྤུངས་བློ་གསལ་གླིང་གྲྭ་ཚང་ནས་ཕུལ་བྱུང་སློབ་ཡོན་བཞེས་མཁན་ལྔ་ལ་སྒོར་ཆིག་ཁྲི་ལྔ་སྟོང་གི་ལེགས་གསོལ་བྱ་དགའ་གནང་། དེ་བཞིན་འཛིན་རིམ་སོ་སོའི་བོད་ཡིག་ཡིག་གཟུགས་རྩེར་སོན་རྣམས་ལ་ཕྱག་རྟགས་གནང་རྗེས་རྭ་སྟོད་གྲྭ་ཚང་ནས་སྤྱི་མི་རྣམས་ལ་ཀམ་པོ་ཊར་ (Desktop) བཅུ་གསོལ་རས་གནང་ཡོད།

དེ་ནས་གཞིས་སྤྱི་ལྷ་མོ་ཚོགས་པ་ནས་རྟེན་འབྲེལ་མཚོན་བྱེད་རྣམ་ཐར་དང་སློབ་ཕྲུག་དང་གྲོང་སྡེ་གཉིས་ནས་བོད་ཀྱི་རིག་གཞུང་གི་གཞས་སྣ་འཁྲབ་སྟོན་གཟིགས་འབུལ་ཞུས་མཚམས་ས་གནས་རང་བདེན་ཚོགས་གཙོའི་ལས་ཚབ་ནས་ཐུགས་རྗེ་ཆེ་ཞུའི་གསུང་བཤད་གནང་།

མཐར་གཞིས་ལས་ཁང་ནས་ཚོགས་སྡེ་ཁག་ ༢༦ དང་། སློབ་གྲྭ་ཁག་གསུམ། གཞིས་སྤྱི་ལྷ་ཚོགས། རྩེད་རིགས་ཚུགས་ཆུང་བཅས་ལ་སྒོར་ ༥༠༠༠༠ ཙམ་གྱི་ཤིང་སྣ་འདྲ་མིན་ཁག་བཅུ་ཙམ་བགོ་འགྲེམས་དང་། སྐུ་མགྲོན་རྣམས་ལ་གུང་ཚིགས་འདེགས་འབུལ་ཞུས་ཏེ་མཛད་སྒོ་བཀྲ་ཤིས་པའི་ངང་གྲོལ་ཡོད་པ་བཅས།