༄༅། །འདི་གར་བྱང་ཨ་རིའི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། བྱང་ཨ་རིའི་ནང་སྤྱི་ནོར་༸གོང་༸སྐྱབས་མགོན་ཆེན་པོ་མཆོག་དགུང་གྲངས་ ༨༨ ལ་ཕེབས་པའི་སྐུའི་འཁྲུངས་སྐར་སྔ་སྣུར་གྱིས་སྲུང་བརྩི་ཞུས་པའི་འདྲ་པར་གནས་ཚུལ་སྙིས་བསྡུས་དང་པོ་ཁ་སྔོན་འགོད་སྤེལ་ཟིན། རེས་གཟའ་སྤེན་པ་དང་ཉི་མ་གུང་གསེང་དང་བསྟུན་ནས་འཁྲུངས་སྐར་སྲུང་བརྩི་གནང་མཁན་ས་གནས་ཁག་གི་འདྲ་པར་གནས་ཚུལ་འབྱོར་བ་འགོད་སྤེལ་ཞུ་རྒྱུར། 

ས་གནས་ཁག་ཚང་མར་གཞི་རྒྱ་ཆེ་ཆུང་དང་།  རྣམ་པ་ཕྲན་བུ་མི་འདྲ་བ་མ་གཏོགས།  འཁྲུངས་སྐར་མཛད་སྒོ་ཚོགས་སྟངས་སྤྱིའི་ཆ་ནས་གཅིག་པ་རེད།  དེ་ཡང་ཐོག་མར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཞུགས་ཁྲིར་མཎྚལ་རྟེན་གསུམ་དང་།  རྟེན་འབྲེལ་གྱི་གསོལ་ཇ་ཞལ་འབྲས་འདེགས་འབུལ།  ས་གནས་ཚོགས་གཙོས་ངོ་སྤྲོད་གསུང་བཤད།  ཕྱི་ནང་གི་སྐུ་མགྲོན་ཚོས་འཁྲུངས་སྐར་དང་འབྲེལ་བའི་གསུང་བཤད།  མངར་ཟས་གཅོད་བྲེག  ས་གནས་གཟའ་མཇུག་སློབ་གྲྭའི་སློབ་ཕྲུག་དང་།  སྒེར་པ་སྒྱུ་རྩལ་བས་༸གོང་ས་མཆོག་ལ་བསྟོད་དབྱངས།  རྣམ་ཐར།  སྲོལ་རྒྱུན་གྱི་གཞས་སྣ་སོགས་ཐུན་མོང་མ་ཡིན་པའི་བོད་ཀྱི་རིག་གཞུང་འཁྲབ་སྟོན་གཟིགས་འབུལ།  སྐུའི་མཛད་པ་དང་འབྲེལ་བརྙན་ཐུང་གཟིགས་འབུལ།  འཁྲུངས་སྐར་མཛད་སྒོ་དང་བསྟུན་ནས་བྱ་དགའ་གསོལ་རས་དང་གཟེངས་བསྟོད་འབུལ་བ།  བསང་གསོལ།  ཟས་ཀྱི་སྦྱིན་པ་གཏོང་བ་སོགས་ཀྱི་རྣམ་པ་སྣ་ཚོགས་ཀྱི་ལམ་ནས་༸གོང་ས་མཆོག་དགུང་གྲངས་གྱ་བརྒྱད་ལ་ཕེབས་པའི་༧སྐུའི་འཁྲུངས་སྐོར་སྲུང་བརྩི་ཞུས་ཡོད། 

ཉེ་ཆར་ཚེས་ ༨ གཟའ་སྤེན་པ་དང་ཚེས་ ༩ གཟའ་ཉི་མའི་ཉིན་ནིའུ་ཡོག་དང་ནིའུ་འཇར་སི།  Washington Seattle, Vermont, Vancouver BC, Utah, Santa Fe, Portland, Philadelphia, Northern California, Miane, Atlanta, Ithaca, Boston, Canada Ontario བཅས་སུ་འཁྲུངས་སྐར་སྲུང་བརྩི་གནང་ཡོད། 

དཔེར་ན།  ནིའུ་ཡོག་གི་འཁྲུངས་སྐར་མཛད་སྒོར་ New York State Comptroller Thomas Dinapoli, གྲོང་སྡེ་སྤྱི་ཁྱབ་ལས་ཁུངས་ཀྱི་ཡུལ་སྤོ་བའི་གནད་དོན་འབྲེལ་ལས་མེ་ནུལ་ཀ་སི་ཀྲོ་ (Manual Castro)ལགས། གྲོང་སྡེ་སྤྱི་ཁྱབ་ལས་ཁུངས་ཀྱི་ལྷོ་ཨེ་ཤི་ཡའི་མང་ཚོགས་ཀྱི་འབྲེལ་མཐུད་པ་སཱུག་རེན་དན་པཊ་(Sookranie Dhanpat)ལགས། གྲོང་སྡེ་སྤྱི་ཁྱབ་ལས་ཁུངས་ཀྱི་ཡུལ་སྤོ་བའི་གནད་དོན་དང་འབྲེལ་བའི་སྲིད་བྱུས་སློབ་སྟོན་པ་གཙོ་བོ་ལོ་རེ་ན་ལུ་སེ་རོ་(Lorena Lucero)ལགས།   Council Member District 26th Julie Won , New York State Assembly member, Steven Raga ཁྲིམས་ཞིབ་པ་ཟུར་པ་འབུམ་རམས་པ་ངག་དབང་རང་རྒྱས་ལགས་དང་བཀའ་ཟུར་འབྲོང་ཆུང་དངོས་གྲུབ་ལགས།  ཚོགས་པ་ཆེ་ཁག་གི་སྐུ་ཚབ་བཅས་སྐུ་མགྲོན་དུ་ཕེབས་ཡོད། 

ཤེས་རྟོགས་བྱུང་བར་གཞིགས་ན།  མཛད་སྒོར་ཕེབས་མཁན་ཕྱི་རྒྱལ་སྐུ་མགྲོན་ཚོས།  ༸གོང་ས་མཆོག་གི་མཛད་ཆེན་ཁག་ལ་ཡི་རངས་བསྔགས་བརྗོད་དང་།  བོད་ཀྱི་ཆོས་དང་རིག་གཞུང་།  མི་རིགས་ངོ་བོ་དང་བཅས་པ་སྲུང་སྐྱོབ་ལ་རྒྱབ་སྐྱོར་གྱི་རྣམ་འགྱུར་གསལ་སྟོན་གནང་ཡོད་པ་མ་ཟད། མངོན་བསྟོད་ཀྱི་བརྗོད་ཚིག་སྣ་ཚོགས་བེད་སྤྱད་ནས་༸གོང་ས་མཆོག་དགུང་གྲངས་གྱ་བརྒྱད་ལ་ཕེབས་པའི་འཁྲུངས་སྐར་ལ་བཀྲ་ཤིས་བདེ་ལེགས་ཀྱི་འཚམས་འདྲི་ཞུས་ཡོད་པ་དང་།  ནིའུ་ཡོག་གི་འཁྲུངས་སྐར་མཛད་སྒོར་བྱང་ཨ་རི་སྐུ་ཚབ་དོན་གཅོད་ཁང་གི་སྐུ་ཚབ་བོད་རིགས་འབྲེལ་མཐུད་པ་དྲུང་ཟུར་ཀུན་དགའ་བཀྲ་ཤིས་ལགས་ནས་བཀའ་ཤག་གི་འཁྲུངས་སྐར་མཛད་སྒོའི་གསུང་བཤད་ཀྱི་ནང་དོན་སྙིང་བསྡུས་འགྲེལ་བརྗོད་དང་།  བཀའ་ཤག་གིས་བོད་མི་ཡོངས་ལ་ཐུགས་རྗེ་ག་རེ་གནང་ཡོད་པ་འབུར་འདོན་གྱིས་འགྲེལ་བརྗོད་གནང་།   

ད་དུང་ཤེས་རྟོགས་བྱུང་བར་གཞིགས་ན།  ཁེ་ན་ཊ་ཀྲོ་རོན་ཊོ་གངས་ལྗོངས་ཆོས་ལྡན་གླིང་གི་འཁྲུངས་སྐར་མཛད་སྒོར་ཁྲིམས་པ་ཟུར་པ་ཨ་མྱེས་ཚང་ཐུབ་བསྟན་བཀྲ་ཤིས་ལགས་དང་།  བཀའ་ཟུར་བློ་བཟང་ཉི་མ་ལགས།  བཀའ་ཟུར་བཟོད་པ་རྒྱ་མཚོ་ལགས་སོགས་བོད་པའི་སྐུ་མགྲོན་ཕུད།  ས་གནས་ཀྱི་གྲོས་ཚོགས་ཀྱི་དཔོན་རིགས་བུ་ཁྲིད་དཀར་པོ་ཆེ་ལགས་དང་།  གྲོས་ཚོགས་ཀྱི་འཐུས་མི་བཅས་སྐུ་མགྲོན་གདན་ཞུས་ལྟར།  ཆེད་ཕེབས་ཀྱིས་༧གོང་ས་མཆོག་དགུང་གྲངས་ ༨༨ ལ་ཕེབས་པའི་༧སྐུའི་འཁྲུངས་སྐར་དུས་ཆེན་དང་འབྲེལ་བའི་གསུང་བཤད་གནང་ཡོད་འདུག་པ་བཅས་ཀྱི་འདྲ་པར་གནས་ཚུལ་སྙིང་བསྡུས་སུ།  བྱང་ཨ་རི་སྐུ་ཚབ་དོན་གཅོད་ཁང་ནས་ཟླ་བ་ ༧ ཚེས་ ༡༢ ཉིན་ཕུལ།།