༄༅། །ཕྱི་ལོ་ ༢༠༢༣ ཟླ་ ༧ ཚེས་ ༨ ནས་ ༡༠ བར་ཉིན་གསུམ་བསྟུད་མར་ཧི་མ་ཅལ་ཁུལ་དུ་ཆར་ཞོད་ཆེན་པོ་འབབ་པའི་རྐྱེན་གྱིས་ཀུ་ལུ་དཔལ་རབ་གླིང་ས་གནས་འགོ་འཛིན་ལས་ཁུངས་ཀྱ་ཁྱབ་ཁོངས་རྡོ་སྦི་གཞིས་ཆགས་དང་། ཀུ་ལུ་གཡུ་ལོ་བཀོད། མེལ་ ༡༥ བཅས་ཀྱི་ཉེ་འགྲམ་གྱི་གཙང་ཆུ་རྒྱས་ཏེ་དེ་ཁུལ་གནས་སྡོད་བོད་མི་རྣམས་ལ་ཆུ་ལོག་གི་ཛ་དྲག་དཀའ་ངལ་འཕྲད་བཞིན་ཡོད་པའི་གནས་ཚུལ་ཐོས་མ་ཐག་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་དྲུང་ཆེ་མཆོག་གི་གཙོ་སྐྱོང་འོག་ནང་སྲིད་ལས་ཁུངས་ཀྱི་འཛིན་སྐྱོང་ཚོགས་འདུ་ཛ་དྲག་ངང་བསྐོང་ཚོགས་ཀྱིས་ཀུ་ལུ་ཁུལ་གྱི་ས་གནས་བོད་མིའི་ངལ་སེལ་ལས་དོན་སྤེལ་ཕྱོགས་ཐོག་གོ་བསྡུར་དང་སྦྲགས་ས་གནས་བོད་མིའི་སྐབས་ཐོག་ཛ་དྲག་ངལ་སེལ་སླད་ཧིན་སྒོར་འབུམ་ ༥ མཁོ་སྤྲོད་ཞུ་རྒྱུའི་ཐག་གཅོད་བྱུང་ཡོད་པ་བཞིན་འབྲེལ་ཡོད་ས་གནས་འགོ་འཛིན་ལས་ཁུངས་བརྒྱུད་རོགས་དངུལ་ཁུངས་གཏོང་ཞུས་ཡོད།
བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ལམ་སྟོན་བཀོད་མངགས་འོག་འབྲེལ་ཡོད་ཀུ་ལུ་ས་གནས་འགོ་འཛིན་དང་། ས་གནས་བརྒྱ་དཔོན་དང་འཐུས་མི་བཅས་ནས་ཆུ་ལོག་གི་གོད་ཆག་བྱུང་བའི་ས་གནས་མང་ཚོགས་ཀྱི་ངལ་སེལ་ལས་གཞི་སྤེལ་མུས་ཡིན། ས་གནས་སུ་ཆུ་ལོག་གི་རྐྱེན་པས་བོད་མི་གནས་སྡོད་སྡོད་ཁང་འགའ་ཞིག་ལ་གཏོར་སྐྱོན་གང་འཚམ་བྱུང་ཡོད་ཀྱང་མི་སྲོག་ཤོར་བའི་དོན་རྐྱེན་བྱུང་མེད་པ་དང་། ད་ལྟའི་ཆར་ཆར་ཞོད་ཆུང་དུ་འགྲོ་བཞིན་པའི་རྐྱེན་གྱིས་གཙང་ཆུ་བྲི་སྟེ་ཆུ་ལོག་གི་གནོད་འཚེ་ཆུང་དུ་འགྲོ་བཞིན་ཡོད་སྟབས་རིང་མིན་ཆར་དུས་རྫོགས་མཚམས་སུ་ཆུ་ལོག་སྔོན་འགོག་སླད་ཆུ་རགས་ཀྱི་ལས་གཞི་སྤེལ་རྒྱུ་དང་། ཆུ་ལོག་གི་གོད་ཆག་འོག་ས་གནས་བོད་མིའི་སྡོད་ཁང་གཏོར་སྐྱོན་ཇི་བྱུང་ཐད་ཞིབ་འཇུག་འཐུས་ཚང་ཞུས་ཏེ་ཉམས་བཟོའི་ལས་གཞི་སྤེལ་འཆར་ཡོད་པ་བཅས།། 
