༄༅། །ཕྱི་ལོ་ ༢༠༢༣ ཟླ་བ་ ༠༧ ཚེས་ ༢༦ ཉིན་ལས་བྱེད་འདེམས་བསྐོ་ལྷན་ཁང་གི་གོ་སྒྲིག་འོག་བཞུགས་སྒར་རྡ་རམ་ས་ལའི་འཛིན་སྐྱོང་སྦྱོང་བརྡར་བསྟི་གནས་ཁང་དུ་བོད་མིའི་སྒྲིག་འཛུགས་ཀྱི་ལས་ཁུངས་ཁག་གི་ལས་འཆར་ལས་བྱེད་རྣམས་ལ་དམིགས་པའི་ཟབ་སྦྱོང་ཞིག་དབུ་འཛུགས་ཞུས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཐོག་ཟབ་སྦྱོང་དབུ་འབྱེད་མཛད་སྒོའི་ཐོག་ལས་བྱེད་འདེམས་བསྐོ་ལྷན་ཁང་གི་ཚོགས་གཙོ་དཔེ་ཟུར་དབང་འདུས་ཚེ་རིང་ལགས་དང་། ཟབ་སྦྱོང་གི་སློབ་སྟོན་པ་རྣམ་པ། ཟབ་སྦྱོང་བ་བཅས་ཚང་འཛོམས་ཀྱི་ཐོག་མར་འདེམས་ལྷན་ཚོགས་གཙོ་དཔེ་ཟུར་དབང་འདུས་ཚེ་རིང་ལགས་ནས་སྣང་གསལ་མར་མེ་ཞལ་ཕྱེ་དང་། དེ་རྗེས་ཟབ་སྦྱོང་བ་རྣམས་ནས་ངོ་སྤྲོད་དང་འབྲེལ་འདེམས་ལྷན་འབྲེལ་ལས་ཀརྨ་འཕྲིན་ལས་ལགས་ནས་ཟབ་སྦྱོང་གི་དགོས་པ་དམིགས་ཡུལ་དང་སློབ་ཚན་ངོ་སྤྲོད་གནང་གྲུབ་མཚམས་འདེམས་ལྷན་ཚོགས་གཙོ་དཔེ་ཟུར་དབང་འདུས་ཚེ་རིང་ལགས་ནས་ཟབ་སྦྱོང་དང་འབྲེལ་བའི་གསུང་བཤད་གནང་ཡོད།
དེ་ཡང་གསུང་བཤད་ནང་ཁོང་གིས་བོད་མི་བཙན་བྱོལ་བའི་གནས་བབ་ནི་གཞན་དབང་སྟབས་བསྟུན་ཡིན་པས་གཞན་ལ་བསྟུན་པའི་ཐབས་ལམ་ཤེས་རྒྱུ་གལ་ཆེན་པོ་ཡིན་ཞིང་། ལྷག་པར་དུ་ལས་འཆར་ལས་བྱེད་རྣམས་ནས་ལས་འཆར་སྒྲིག་པའི་སྐབས་སུ་གཙོ་བོའི་བོད་མིའི་སྒྲིག་འཛུགས་དང་བོད་མིའི་སྤྱི་ཚོགས་ལ་སྨན་པ་ཞིག་དགོས་པ་སྨོས་མེད་ཐོག་ལས་འཆར་ལམ་ལྷོངས་འོང་མིན་ལ་ཆ་རྐྱེན་མང་པོ་ཡོད་པའི་ནང་ནས་གཙོ་བོ་གཅིག་ནི་ལས་འཆར་འགན་ཁུར་བར་རག་ལུས་པས། འབྲེལ་ལས་ནས་ལས་ཁུངས་དང་སྤྱི་ཚོགས་ཀྱི་དགོས་མཁོ་ཤེས་རྟོགས་ཡོད་པའི་ཁར། དེ་དོན་གོང་རིམ་ལ་སྙན་སེང་འཐུས་ཚང་ཞུ་ཐུབ་པ་དགོས་རྒྱུ་གལ་གནད་ཆེན་པོ་ཡིན་སྐོར་གསུངས།
དེ་བཞིན་ཁོང་གིས་ཐེངས་འདིའི་ལས་འཆར་ལས་བྱེད་རྣམས་ལ་ཟབ་སྦྱོང་གོ་སྒྲིག་གནང་དགོས་དོན་ནི། དབུས་སའི་ལས་ཁུངས་ཀྱི་སྒྲིག་འཛུགས་ལས་དོན་ཚགས་ཚུད་ཡོང་མིན་ནི་ལས་འཆར་འཛིན་སྐྱོང་ལའང་རག་ལུས་ཀྱི་ཡོད་སྟབས། ལས་འཆར་ལས་བྱེད་ཀྱི་ནུས་སྟོབས་གོང་འཕེལ་གཏོང་སླད་ཡིན་ཞེས་དང་། དེ་ལས་འཕྲོས་ཏེ་ཁོང་གིས་ལས་བྱེད་རྣམས་ནས་ཀྱང་ཉིན་གསུམ་རིང་གི་ཟབ་སྦྱོང་ལས་བློ་སྐྱེད་གང་མང་བླངས་ཏེ་ལས་ཁུངས་ནང་ལས་ཀ་བྱེད་སྐབས་ཕན་ཐོགས་ཡོད་པ་ཞིག་བྱ་རྒྱུའི་ཐོག་དོ་སྣང་གནང་དགོས་པའི་རེ་སྐུལ་གནང་ཡོད་པ་བཅས།།
