༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན།  བོད་མི་མང་སྤྱི་འཐུས་མཁན་པོ་འཇམ་དཔལ་བསྟན་འཛིན་ལགས་དང་། སྤྱི་འཐུས་སློབ་དཔོན་ཐུབ་བསྟན་རྒྱལ་མཚན་ལགས། སྤྱི་འཐུས་རྡོ་རྗེ་ཚེ་བརྟན་ལགས་བཅས་ལས་གྲུབ་པའི་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ནས་ཡུ་རོབ་རྒྱལ་ཁབ་སྦེལ་ཇམ་དང་། ཕ་རན་སི་གཉིས་ཀྱི་ནང་བོད་དོན་ཞུ་སྐུལ་གྱི་ལས་དོན་ཁག་ལེགས་པར་གྲུབ་རྗེས། ཕྱི་ལོ་ ༢༠༢༣ ཟླ་ ༧ པའི་ཚེས་ ༥ ནས་འགོ་འཛུགས་ཏེ། འཇར་མན་རྒྱལ་ཁབ་ནང་འཇར་མན་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སོགས་དཔོན་རིགས་ཁག་ཅིག་དང་མཇལ་འཕྲད་ཀྱིས་བོད་དོན་ཞུ་སྐུལ་གནང་བཞིན་ཡོད།དེ་ཡང་ཕྱི་ཚེས་ ༥ ཉིན་ཕ་རན་སི་རྒྱལ་ཁབ་ནང་བོད་དོན་ཞུ་སྐུལ་གྱི་ལས་དོན་ཁག་ལེགས་པ་གྲུབ་རྗེས། སྔ་དྲོ་ཆུ་ཚོད་ ༩།༣༠ ཐོག་བོད་མི་མང་སྤྱི་འཐུས་རྣམ་པ་མེ་འཁོར་བརྒྱུད་འཇར་མན་རྒྱལ་ས་བྷར་ལེན་ལ་ཕེབས་ཐོན་གྱིས་ཕྱི་དྲོ་ཆུ་ཚོད་ ༧ ཡོལ་ཙམ་ལ་བྷར་ལེན་མེ་འཁོར་བབས་ཚུགས་སུ་ཕེབས་འབྱོར་མཚམས། སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་དང་། ས་གནས་བོད་རིགས་ཚོགས་པའི་ཚོགས་གཙོ་ཚོགས་གཞོན། ས་གནས་མི་མང་བཅས་ནས་ཕེབས་བསུའི་སྣེ་ལེན་ཟབ་རྒྱས་ཞུས་ཡོད།ཕྱི་ཚེས་ ༦ ཉིན་གྱི་སྔ་དྲོ་ཆུ་ཚོད་ ༡༠།༣༠ ཐོག་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་དང་། སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་བཅས་ནས་འཇར་མན་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་གྲོས་ཚོགས་འཐུས་མི་མེ་ཀལ་བྷ་རན་ཌི་ (MP Michael Brand) མཆོག་དང་། ཚོགས་མི་གྲོས་ཚོགས་འཐུས་མི་ནཱ་ཌ་ཇཱ་སི་ཐཱ་མར་ (MP Nadja Sthamer) ལགས། ཚོགས་མི་གྲོས་ཚོགས་འཐུས་མི་མ་རེ་ཡ་ཀེ་ལེན་སིཀ་མེན་ (MP Maria Klein-Schmeink) ལགས།  ཚོགས་མི་གྲོས་ཚོགས་འཐུས་མི་པི་ཊར་ཧེ་ཌེ་ཊི་ (MP Peter Heidt) ལགས།  ཚོགས་མི་གྲོས་ཚོགས་འཐུས་མི་ཨར་ཝིན་རུ་ཌེལ་ (MP Erwin Rueddel) ལགས་བཅས་འཇར་མན་སྲིད་དོན་ཚོགས་པ་ཆེ་ཁག་བཞིའི་གྲོས་ཚོགས་འཐུས་མི་ལྔ་དང་ལྷན་མཇལ་འཕྲད་གནང་སྟེ། འཇར་མན་གཞུང་གིས་རྒྱ་ནག་ལ་འཛིན་པའི་ཐབས་བྱུས་ཡིག་ཆ་གསར་པ་བཟོ་བཞིན་པའི་ནང་བོད་དོན་སྐོར་ངེས་པར་དུ་ཁ་གསལ་འཁོད་དགོས་པ་དང་།ཡུ་རོབ་མཐུན་ཚོགས་ནང་བོད་དོན་དམིགས་བསལ་འབྲེལ་མཐུད་པ་བསྐོ་གཞག་ཡོང་ཐབས། དེ་བཞིན་ཉེ་ཆར་འཇར་མན་ཕྱི་སྲིད་ལས་ཁུངས་ཀྱིས་ཡུལ་འདིའི་གྲོས་ཚོགས་ནང་རྒྱ་དམར་གཞུང་གིས་བོད་ནང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་ཡོད་པའི་སྐོར་དང་། གཏན་འཇགས་སློབ་གྲྭའི་སྐོར་ལ་ཐུགས་འཚབ་ཀྱིས་གསུང་བཤད་ཤུགས་ཆེ་གནང་བ་དེར་གྲོས་ཚོགས་ནས་རྒྱབ་སྐྱོར་གྱིས་འཐུས་མི་རྣམ་པས་རྒྱ་ནག་གཞུང་ཚབ་ལ་ཡི་གེ་བཏང་བ་སོགས་ལ་ཐུགས་རྗེ་ཆེ་ཞུས་གནང་རྗེས། བོད་དོན་ཞུ་སྐུལ་གྱི་ཡིག་ཆ་ཁག་དང་བོད་མི་མང་སྤྱི་འཐུས་ལྷན་ཚོགས་ཀྱི་དྲན་རྟེན་ཕྱག་རྟགས་ཕུལ་གནང་ཡོད་འདུགསྐབས་དེར་ཁོང་རྣམ་པས་གོང་གསལ་ཞུ་སྐུལ་གནང་བའི་དོན་གནད་ཁག་ངོས་བཞེས་དང་། འབོད་སྐུལ་གནང་བ་བཞིན་ལོ་རྗེས་མ་འཇར་མན་གྲོས་ཚོགས་འཐུས་མིའི་སྐུ་ཚབ་ཚོགས་ཆུང་ཞིག་བཞུགས་སྒར་རྡ་སར་ཕེབས་རྒྱུའི་ཞལ་བཞེས་ཀྱང་གནང་འདུག དེ་དང་བསྟུན། དེ་ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༨ ལ་ཕེབས་པའི་༧སྐུའི་འཁྲུངས་སྐར་འཁེལ་ཡོད་སྟབས། བརྙན་ལམ་བརྒྱུད་མགོན་པོ་གང་ཉིད་མཆོག་ལ་འཚམས་འདྲི་ཡང་ཞུས། ཚོགས་འདུ་གྲུབ་རྗེས། འབྲེལ་ཡོད་ལས་བྱེད་ནས་བོད་མི་མང་སྤྱི་འཐུས་རྣམ་པ་འཇར་མན་གྲོས་ཚོགས་ཚོགས་ཁང་ནང་གཟིགས་སྐོར་སྣེ་ཁྲིད་གནང་འདུག སྐབས་དེར་འཇར་མན་རྒྱལ་སྤྱིའི་བོད་དོན་ལས་འགུལ་ཁང་གི་འགན་ཁུར་བ་ཀཱ་ཡེ་ མུ་ལར་ (Kai Muller) ལགས་དང་། འཇར་མན་བོད་དོན་རྒྱབ་སྐྱོར་ཚོགས་པའི་ཚོགས་གཙོ་བསྟན་འཛིན་འཛོམས་འབར་བ་ (Tezyn Zochbauer) ལགས་རྣམ་གཉིས་མཉམ་བཅར་ཞུས་གནང་ཡོད་འདུག་པ་བཅས། །