༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། བོད་མི་མང་སྤྱི་འཐུས་དགེ་བཤེས་ཨ་ཀྲོང་རིན་ཆེན་རྒྱལ་མཚན་ལགས་དང་། སྤྱི་འཐུས་པདྨ་མཚོ་ལགས་རྣམ་གཉིས་ནས་ཕྱི་ལོ་ ༢༠༢༣ ཟླ་ ༦ ཚེས་ ༢༥ ནས་འགོ་འཛུགས་ཏེ། ལ་དྭགས་སླེ་བྱང་ཁུལ་དང་། ཉེ་འཁོར་ས་གནས་ཁག་ཅིག་ལ་གཞུང་འབྲེལ་ས་བགོས་ཕྱོགས་བསྐྱོད་གནང་བཞིན་ཡོད་པ་ལྟར། ཕྱི་ཟླ་ ༧ པའི་ཚེས་ ༥ ཉིན་གྱི་དགོང་དྲོ་ཆུ་ཚོད་ ༦།༣༠ ཐོག་བོད་མི་མང་སྤྱི་འཐུས་རྣམ་པ་གཉིས་ནས་ལ་དྭགས་སླེ་རུ་རྒྱ་གར་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་སྡེ་དཔོན་ཆེན་པོ་བཀྲ་ཤིས་རྒྱལ་མཚན་མཆོག་དང་ལྷན་མཇལ་འཕྲད་གནང་སྟེ། ལ་དྭགས་མི་མང་དང་བོད་མི་གཉིས་དབར་ལོ་རྒྱུས་ཐོག་མི་རིགས་དང་སྐད་ཡིག་གཅིག་ཡིན་པ་ནང་བཞིན་ད་ལྟ་ཡང་ལ་དྭགས་མི་མང་དང་བོད་མི་གཉིས་དབར་སེམས་ཐག་ཉེ་བོའི་ཐོག་གནས་ཡོད་པའི་སྐོར་དང་།
ལྷག་པར་ལ་དྭགས་མངའ་གཞུང་ནས་ས་གནས་སུ་གནས་སྡོད་བོད་མི་ཚོར་གཟིགས་རྟོག་རྒྱ་ཆེ་གནང་བཞིན་ཡོད་པ་དང་། དེ་བཞིན་འདི་ལོར་རྒྱ་ནག་གཞུང་གིས་ངན་བྱུས་འོག་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་གཞི་མེད་མཚན་སྨོད་ཞུས་སྐབས། ལ་དྭགས་ཁུལ་གྱི་དད་ལྡན་སེར་སྐྱ་མི་མང་སྟོང་ཕྲག་མང་པོས་ཞི་བའི་ངོ་རྒོལ་ལས་འགུལ་ཤུགས་ཆེན་སྤེལ་བ་བཅས་ལ་བཀའ་དྲིན་ཆེ་ཞུས་པ་དང་། མ་འོངས་པར་དེ་ལྟར་གཟིགས་རྟོག་གནང་སྐྱོང་བའི་འབོད་སྐུལ་ཞུས་གནང་ཡོད་འདུག
སྐབས་དེར་སྡེ་དཔོན་ཆེན་མོ་མཆོག་གིས་ཀྱང་མུ་མཐུད་བོད་མི་རྣམས་ལ་གཟིགས་རྟོག་གང་ལེགས་གནང་རྒྱུའི་ཞལ་བཞེས་དང་སྦྲགས། ཉིན་ཤས་རྗེས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་དྭགས་སུ་ཆིབས་བསྒྱུར་བཀའ་དྲིན་བསྐྱང་རྒྱུ་ཡིན་པ་ལྟར་དེའི་ཐོག་གྲ་སྒྲིག་ཞུ་སྒོ་ཁག་གང་ལེགས་གནང་ཡོད་སྐོར་སོགས་ངོ་སྤྲོད་གནང་ཡོད་འདུག་པ་བཅས། །
