༄༅། །ཕྱི་ལོ་ ༢༠༢༣ ཟླ་བ་ ༠༧ ཚེས་ ༢༠ ཉིན་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱིས་གོ་སྒྲིག་ཞུས་པའི་རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་ལེགས་པར་མཇུག་སྒྲིལ་ཡོད་པ་རེད།
དེ་ཡང་གོང་ཚེས་ཉིན་གྱི་ཕྱི་དྲོ་ཆུ་ཚོད་ ༥ ཐོག་ཚོགས་ཆེན་མཇུག་བསྡུའི་མཛད་སྒོའི་ཐོག་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་དང་། ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས། ཕྱི་དྲིལ་དྲུང་འཕར་བསྟན་འཛིན་ལེགས་བཤད་ལགས། ཕྱི་དྲིལ་དྲུང་འཕར་རྣམ་རྒྱལ་ཚེ་དབང་ལགས། དེ་བཞིན་ཚོགས་འདུའི་གསུང་བཤད་པ་རྣམ་པ་དང་། ཚོགས་བཅར་བ་བཅས་ལྷན་འཛོམས་ཐོག་ཚོགས་བཅར་བའི་སྐུ་ཚབ་གཉིས་ནས་བོད་ཨིན་ཐོག་རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་གྱི་བསྒྲགས་གཏམ་སྒྲོགས་སྦྱང་དང་། དེ་རྗེས་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་ཚོགས་འདུ་དང་འབྲེལ་བའི་གསུང་བཤད་གནང་ཡོད།
སྐབས་དེར་ཕྱི་དྲིལ་བཀའ་བློན་མཆོག་གིས་ཐེངས་འདིའི་རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་ནང་འཛམ་གླིང་རྒྱལ་ཁབ་འདྲ་མིན་ནས་བོད་རིགས་གཞོན་སྐྱེས་བརྒྱ་ལྷག་ནས་ལྷག་བསམ་དང་འདུན་པ་ཡོད་པའི་ཐོག་ཚོགས་བཅར་ཞུས་ཏེ་བོད་དོན་ཞུ་གཏུག་གནང་ཕྱོགས་སྐོར་བགྲོ་གླེང་ཞིབ་ལྷུག་གནང་བར་ཡི་རངས་བསྔགས་བརྗོད་དང་སྦྲགས། བཀའ་ཤག་སྐབས་བཅུ་དྲུག་པའི་ངོས་ནས་འདི་ལྟ་བུའི་རྒྱལ་སྤྱིའི་རང་བཞིན་ལྡན་པའི་གཞོན་སྐྱེས་ཚོགས་ཆེན་གོ་སྒྲིག་ཞུ་རྒྱུའི་དམིགས་ཡུལ་གཙོ་བོ་ནི། བོད་རིགས་གཞོན་སྐྱེས་རྣམས་ཀྱི་ནུས་པ་གོང་འཕེལ་བཏང་ཐོག་གཞོན་སྐྱེས་རྣམས་ལ་སྡིངས་ཆ་དང་གོ་སྐབས་བསྐྲུན་རྒྱུ་དང་། དེ་བཞིན་གཞོན་སྐྱེས་ཀྱིས་སྣེ་ཁྲིད་པའི་བོད་དོན་ཞུ་གཏུག་ལས་འགུལ་དེ་བཞིན་ནུས་པ་ལྡན་ཞིང་རྒྱུན་འཁྱོངས་ཕུགས་འཕེར་བཟོ་ཐབས་ཡིན་སྐོར་འགྲེལ་བརྗོད་གནང་ཡོད། དེ་བཞིན་ཁོང་མོས་དེང་སྐབས་འཛམ་བུ་གླིང་གི་མི་འབོར་བཞི་ཆ་གཅིག་གཞོན་སྐྱེས་ཡིན་སྟབས། གཞོན་ནུ་ཕོ་མོ་རྣམས་ནས་འཛམ་བུ་གླིང་སྤྱི་ལ་སྨན་པའི་ལས་དོན་ནང་ཆ་ཤས་ལེན་དགོས་ཤིང་། ལྷག་པར་དུ་བོད་རིགས་གཞོན་ནུ་རྣམས་ཀྱིས་བོད་ཀྱི་ངོ་བོ་སྲུང་སྐྱོབ་ཐད་ལྷག་བསམ་ལྡན་པའི་ཐོག་འབད་འབུངས་གནང་ན་ནུས་པ་ཐོན་ངེས་ཡིན་པའི་ཡིད་ཆེས་ཡོད་ཅེས་གསུངས་ཡོད། 
དེ་ནས་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གིས་གཞོན་སྐྱེས་རྣམས་ནས་བོད་དོན་ཐོག་འགན་ཁུར་གནང་ཕྱོགས་དང་འབྲེལ་བའི་གསུང་བཤད་གནང་རྗེས་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་ནས་ཐུགས་རྗེ་ཆེ་ཞུའི་གསུང་བཤད་དང་སྦྲགས། རྒྱལ་སྤྱིའི་སྟེང་བོད་དོན་ཞུ་གཏུག་དང་བོད་མིའི་ངོ་བོ་རྒྱུན་འཛིན་སླད་གཞོན་སྐྱེས་རྣམས་ནས་འགན་ཁུར་ཧུར་སྐྱེད་གནང་དགོས་པའི་འབོད་སྐུལ་གནང་ཡོད།
སྤྱིར་ཉིན་གྲངས་གསུམ་གྱི་རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་ཐོག་རྒྱ་གར་ཐེ་བའི་འཛམ་གླིང་རྒྱལ་ཁབ་བཅུ་དྲུག་ཙམ་ནས་བོད་རིགས་གཞོན་སྐྱེས་བརྒྱ་ལྷག་མཉམ་ཞུགས་ཀྱིས་བོད་ཀྱི་ལོ་རྒྱུས་གནས་བབ་དང་། རྒྱལ་སྤྱིའི་སྟེང་བོད་དོན་ཞུ་གཏུག་གནང་ཕྱོགས་སོགས་ཀྱི་སྐོར་གོ་བསྡུར་སྦྱང་བཤད་གནང་བ་མ་ཟད། ཚོགས་ཆེན་མཇུག་ཏུ་ཚོགས་བཅར་བ་ཐུན་མོང་ནས་གཞིས་བྱེས་བོད་མི་དང་མཉམ་དུ་དཔུང་པ་མཉམ་གཤིབ་ཐོག་འགན་ཁུར་རྒྱུན་འཁྱོངས་བྱ་རྒྱུ་དང་། རྒྱ་ནག་གཞུང་གིས་བོད་ཐོག་ཁྲིམས་འགལ་བཙན་བཟུང་གིས་བོད་མིར་དྲག་གནོན་དང་བོད་ཀྱི་ཆོས་དང་རིག་གཞུང་རྩ་མེད་གཏོང་བྱུས་བྱེད་བཞིན་པར་ངོ་རྒོལ་བྱ་རྒྱུ། དེ་བཞིན་བོད་ཀྱི་ས་བབ་ཆབ་སྲིད་དང་། དཔལ་འབྱོར། ཁོར་ཡུག་འཛམ་གླིང་ལ་གལ་འགངས་ཆེ་བས་འཛམ་གླིང་མི་མང་ལ་བོད་རྒྱའི་དཀའ་རྙོག་བསལ་རྒྱུའི་འགན་ཁྲི་ཡོད་པ་ལྟར་རོགས་ཕན་གནང་དགོས་པ་མ་ཟད། རྒྱ་ནག་གཞུང་ནས་ཀྱང་བོད་བཙན་བཟུང་བྱེད་མཚམས་བཞག་སྟེ་བོད་མི་མང་ལ་རང་དབང་གི་སྒོ་ནས་རང་ཐག་རང་གཅོད་ཀྱི་ཁེ་དབང་ལོངས་སུ་སྤྱད་རྒྱུའི་ཐོབ་ཐང་སྤྲོད་དགོས་སྐོར་གསལ་བའི་དགོས་འདུན་འཁོད་པའི་བསྒྲགས་གཏམ་ཞིག་སྤེལ་ཡོད་པ་བཅས།།
