༄༅། །ཕྱི་ལོ་ ༢༠༢༣ ཟླ་བ་ ༠༧ ཚེས་ ༢༥ ཉིན་བེལ་ཇམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱིས་ཤ་ཧར་བིག་(Schaerbeek)གྲོང་སྡེའི་སྤྱི་ཁྱབ་སེ་སི་ལེ་ཇོ་ཊོག་ནེ་(Cécile Jodogne)མཆོག་དང་མཇལ་འཕྲད་གནང་ཡོད།

དེ་ཡང་མཇལ་འཕྲད་སྐབས་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས་ནས་གྲོང་སྡེའི་སྤྱི་ཁྱབ་ནས་འདས་པའི་ལོ་ངོ་བཅུ་ཕྲག་གཉིས་རིང་བོད་མིར་རྒྱབ་སྐྱོར་མཚོན་ཆེད་གྲོང་སྡེའི་ཚོགས་ཁང་སྟེང་དུ་བོད་མིའི་རང་དབང་སྒེར་ལངས་ཉིན་བོད་ཀྱི་རྒྱལ་དར་སྒྲེང་འཛུགས་གནང་བར་ཐུགས་རྗེ་ཆེ་ཞུས་པ་དང་ཆབས་ཅིག བོད་ནང་རྒྱ་ནག་གཞུང་གིས་སྟངས་འཛིན་བྱེད་པའི་མི་སེར་སྤེལ་ཡུལ་གཏན་འཇགས་སློབ་གྲྭ་ཁག་ཏུ་བོད་ཕྲུག་ས་ཡ་གཅིག་ལྷག་བཙན་འཇུག་གིས་བོད་ཀྱི་ཆོས་དང་རིག་གཞུང་ཤུལ་མེད་བཟོ་བྱུས་རྩོམ་བཞིན་པའི་ཛ་དྲག་གནས་སྟངས་ངོ་སྤྲོད་གནང་ཞིང་། དེར་གྲོང་སྡེའི་སྤྱི་ཁྱབ་མཆོག་ནས་ཐུགས་འཚབ་ཤུགས་ཆེ་བསྟན་ཡོད།

གཞན་ཡང་ཚོགས་འདུའི་ཐོག་ཕྱོགས་གཉིས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། བེལ་ཇམ་གནས་སྡོད་བོད་མིའི་གནས་སྟངས་དང་གྲུབ་འབྲས་སོགས་ཀྱི་སྐོར་གྲོས་མོལ་གནང་ཡོད།

མཐར་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས་ནས་གྲོང་སྡེའི་སྤྱི་ཁྱབ་མཆོག་ལ་མཇལ་དར་དང་བེལ་ཇམ་དོན་ཁང་གིས་དཔར་སྐྲུན་ཞུས་པའི་དཔེ་དེབ་གཉིས་ཕུལ་ཡོད་པ་བཅས།།