༄༅། །བེལ་ཇམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་འཇམ་དབྱངས་བློ་འཕེལ་སློབ་གྲྭའི་ཕ་མའི་ཉིན་མོའི་མཛད་སྒོའི་སྐུ་མགྲོན་གཙོ་བོར་ཆེད་ཕེབས་གནང་ཡོད།
དེ་ཡང་མཛད་སྒོའི་ཐོག་མར་བོད་ཀྱི་རིག་གཞུང་བསྟི་གནས་ཁང་གི་འབྲེལ་ཡོད་ཕུན་ཚོགས་རྣམ་རྒྱལ་ལགས་ནས་ལས་གཞིའི་ངོ་སྤྲོད་དང་། དམིགས་བསལ་སྐུ་མགྲོན་ར་ཉག་དཔལ་སྤྲུལ་རིན་པོ་ཆེ་མཆོག་གི་གསུང་བཤད་གྲུབ་མཚམས་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས་ནས་བོད་ཀྱི་གནས་སྟངས་ཛ་དྲག་ཅན་དུ་གྱུར་བའི་སྐབས་སུ་སློབ་གྲྭ་འདི་ལྟ་བུས་བོད་ཀྱི་ཆོས་རིག་འཛིན་སྐྱོང་སླད་འབད་རྩོལ་ལྷོད་མེད་གནང་བཞིན་པར་སློབ་གྲྭའི་དགེ་ལས་རྣམས་ལ་ཐུགས་རྗེ་ཆེ་ཞུས་པ་དང་སྦྲགས། ཕ་མ་རྣམས་ནས་སོ་སོའི་ཕྲུ་གུ་མ་འོངས་པར་མི་བཟང་པོ་ཞིག་ཏུ་གྱུར་བའི་ཆེད་ཕྲུ་གུ་འཚར་ལོངས་ལ་དོ་སྣང་དང་། ཕྲུ་གུ་ལྷན་དུས་ཚོད་མང་ཙམ་གཤིབ་དགོས་པའི་གལ་གནད་སྐོར་གསུངས། གཞན་ཡང་སྐུ་ཚབ་དོན་གཅོད་ནས་ར་ཉག་དཔལ་སྤྲུལ་རིན་པོ་ཆེ་མཆོག་ནས་ཁོང་གི་ཆོས་ཚོགས་ནང་བྱིས་པ་རྣམས་ཀྱི་ཆེད་དབྱར་དུས་ཀྱི་འདུ་འཛོམས་གོ་སྒྲིག་གནང་རྒྱུའི་ཆོག་མཆན་གནང་བར་ཐུགས་རྗེ་ལེགས་འབུལ་ཞུས་ཡོད་པ་རེད།
འཇམ་དབྱངས་བློ་འཕེལ་སློབ་གྲྭ་ནི་བོད་ཀྱི་རིག་གཞུང་བསྟི་གནས་ཁང་གི་སྟངས་འཛིན་འོག་བེལ་ཇམ་ས་གནས་ཁག་དྲུག་ནང་ཡོད་པའི་གཟའ་མཇུག་སློབ་གྲྭ་དག་ཡིན་ཞིང་། སློབ་གྲྭའི་ནང་ཁྱོན་སློབ་ཕྲུག་གྲངས་ ༣༤༡ དང་། དགེ་རྒན་ ༤༥ བླངས་བ་ ༡༧ ཡོད། ལོ་ལྟར་བོད་ཀྱི་རིག་གཞུང་བསྟི་གནས་ཁང་གི་གོ་སྒྲིག་འོག་བདུན་ཕྲག་གཅིག་རིང་དབྱར་ཁའི་འདུ་འཛོམས་ཤིག་གོ་སྒྲིག་ཞུ་སྲོལ་ཡོད་ལ། འདི་ལོའི་འདུ་འཛོམས་ནང་སློབ་ཕྲུག་གྲངས་ ༡༢༠ མཉམ་ཞུགས་གནང་ཡོད། དབྱར་དུས་འདུ་འཛོམས་ཀྱི་བདུན་ཕྲག་གཅིག་ནང་ནས་ཉིན་གཅིག་ཕ་མའི་ཉིན་མོར་སྲུང་བརྩི་ཞུ་གི་ཡོད་པ་བཅས།།
