༄༅། །ཕྱི་ལོ་ ༢༠༢༣ ཟླ་བ་ ༠༧ ཚེས་ ༡༠ ཉིན་བེལ་ཇམ་ས་གནས་ཆུ་བཞི་སྒང་དྲུག་ཚོགས་པའི་གོ་སྒྲིག་འོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་སྲུང་བརྩིའི་མཛད་སྒོ་ཚོགས་ཡོད།
དེ་ཡང་མཛད་སྒོའི་ཐོག་མར་དགེ་བཤེས་ཚེ་བརྟན་ཕུན་ཚོགས་ནས་ཤིས་བརྗོད་གསུང་འདོན་དང་སྐུ་པར་མཐོང་གྲོལ་རིན་པོ་ཆེར་མཇལ་དར་ཕུལ་རྗེས་བེལ་ཇམ་ས་གནས་ཆུ་སྒང་ཚོགས་པའི་ཚོགས་གཙོ་སྤེན་པ་རྡོ་རྗེ་ལགས་ནས་ནས་སྐུ་མགྲོན་རྣམས་ལ་ཕེབས་བསུའི་འཚམས་འདྲི་དང་། དེ་ནས་མཛད་སྒོའི་སྐུ་མགྲོན་གཙོ་བོ་བེལ་ཇམ་དོན་ཁང་གི་དྲུང་ཆེ་འཕྲིན་ལས་དབང་འདུས་ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་གསུང་ཅི་སྒྲུབ་གནང་རྒྱུ་གལ་གནད་ཆེན་པོ་ཡིན་སྐོར་དང་། བོད་ནང་གི་བོད་མི་རྣམས་ལ་མགོན་པོ་མཆོག་གི་འཁྲུངས་སྐར་སྲུང་བརྩི་ཞུ་རྒྱུའི་གོ་སྐབས་མེད་པ་མ་ཟད། སྐུ་པར་ཡང་ཉར་འཇོག་ཆོག་གི་མེད་སྐོར་དྲན་སྐུལ་གནང་ཡོད།
དེ་བཞིན་དྲུང་ཆེ་འཕྲིན་ལས་ལགས་ནས་ཡོང་འགྱུར་བེལ་ཇམ་ནང་ཀོ་ནི་ཕ་ཨེ་ཤི་ཡའི་རྐང་སྤོལ་རྩེད་འགྲན་འཚོག་རྒྱུ་ཡིན་སྟབས། བོད་མི་རྣམས་ནས་མཉམ་ཞུགས་གནང་དགོས་སྐོར་དང་། གཞན་ཡང་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་བཀའ་འབྲེལ་ལྟར་དཔྱ་ཁྲལ་ལག་དེབ་གསར་བཟོའི་ལས་གཞིའི་ནང་མཉམ་ཞུགས་དགོས་པའི་འབོད་སྐུལ་གནང་ཡོད།
མཛད་སྒོའི་ཐོག་བོད་རིགས་ཚོགས་པ་དང་། གཞུང་ཁོངས་མིན་པའི་ཚོགས་སྡེ་ཁག་གི་སྐུ་ཚབ་མཉམ་ཞུགས་གནང་ཡོད་ལ། མཛད་སྒོ་གྲོལ་མཚམས་ས་གནས་བོད་མི་རྣམས་ནས་གཞས་སྣ་འཁྲབ་སྟོན་གཟིགས་འབུལ་ཞུས་ཡོད་པ་བཅས།། 
