བེལ་ཇམ་བོད་ཀྱི་ཆོས་རིག་འཛིན་སྐྱོང་ཁང་གི་དབྱར་ཁའི་ཤེས་ཡོན་ཉམས་གསོག་ལེགས་གྲུབ་ཟིན་པ།

གསར་ལས་ཁང་གི་གསར་འགོད་པས།

༢༠༢༣-༠༧-༢༡

༄༅། །འདི་གར་ཤེས་རིག་ལས་ཁུངས་ནས་བཏང་གནས་ནང་འཁོད་དོན། བེལ་ཇམ་བོད་ཀྱི་སྐུ་ཚབ་དོན་གཅོད་ཁང་བརྒྱུད་ནས་བེལ་ཇམ་བོད་ཀྱི་ཆོས་རིག་འཛིན་སྐྱོང་ཁང་ནས་འབོད་སྐུལ་གནང་བ་བཞིན། འདི་ག་བོད་མིིའི་སྒྲིག་འཛུགས་ཤེས་རིག་ལས་ཁུངས་ནས་ཕྱི་ལོ་ ༢༠༢༣ ཟླ་ ༧ ཚེས་ ༡༣ ནས་ ༢༠ བར་བེལ་ཇམ་བོད་ཀྱི་ཆོས་རིག་འཛིན་སྐྱོང་ཁང་གི་ཁྱབ་ཁོངས་སློབ་གྲྭའི་སློབ་ཕྲུག་རྣམས་ལ་དྷ་ས་ཁུལ་དུ་ཤེས་ཡོན་ཉམས་གསོག་དང་གཟིགས་སྐོར་གྱི་མཛད་རིམ་གོ་སྒྲིག་ཞུས་པ་ཕྱི་ཚེས་ ༢༠ ཉིན་ལེགས་གྲུབ་ཟིན་ཡོད།

ཕྱི་ཚེས་ ༡༣ ཉིན་བོད་མིའི་སྒྲིག་འཛུགས་ཀྱི་གློག་ཀླད་སྡེ་ཚན་ཚོགས་ཁང་དུ་ཚོགས་ཐུན་དང་པོར་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གིི་ཁྲིམས་ཞིབ་པ་གཞན་བསྟན་འཛིན་ལུང་རྟོགས་མཆོག་ནས་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གི་བྱུང་རབས་དང་ལས་དོན་གནང་ཕྱོགས་ངོ་སྤྲོད་དང་། ཚོགས་ཐུན་གཉིས་པར་བོད་མི་མང་སྤྱི་འཐུས་བསྟན་པ་ཡར་འཕེལ་མཆོག་ནས་བོད་མི་མང་སྤྱི་འཐུས་ལྷན་ཚོགས་ཀྱི་བྱུང་རབས་དང་ལས་དོན་གནང་ཕྱོགས་ངོ་སྤྲོད་གནང་ཡོད། ཕྱི་དྲོ་ཤེས་རིག་ལས་ཁུངས་ཀྱི་བཀའ་བློན་ལྕང་ར་ཐར་ལམ་སྒྲོལ་མ་མཆོག་ནས་བཙན་བྱོལ་བོད་མིའི་སྒྲིག་འཛུགས་ཀྱི་བྱུང་རབས་དང་། བཀའ་ཤག་དང་ལས་ཁུངས་ཁག་ངོ་སྤྲོད་གནང་ཡོད། ཉིན་དང་པོའི་ཚོགས་ཐུན་གསུམ་ཀའི་སྐབས་སློབ་ཕྲུག་དང་ལྷན་དུ་དྲི་བ་དྲིས་ལན་གྱི་ལས་རིམ་གང་ལེགས་བྱུང་བ་དང་། དེའི་རྗེས་ཁོང་རྣམས་བོད་ཀྱི་འགྲེམས་སྟོན་ཁང་དུ་ཆུ་ཚོད་གཅིག་ལྷག་གི་གཟིགས་སྐོར་དང་ཉམས་གསོག་གནང་ཡོད།