༄༅། །ཕྱི་ལོ་ ༢༠༢༣ ཟླ་བ་ ༠༧ ཚེས་ ༠༦ ཉིན་བེལ་ཇམ་ས་གནས་གཞོན་ནུ་ལྷན་ཚོགས་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༨ ལ་ཕེབས་པའི་༸སྐུའི་འཁྲུངས་སྐར་གྱི་མཛད་སྒོ་གོ་སྒྲིག་ཞུས་པ་ལྟར། བེལ་ཇམ་དོན་ཁང་གི་དྲུང་ཆེ་འཕྲིན་ལས་དབང་འདུས་ལགས་སྐུ་མགྲོན་གཙོ་བོར་ཆེད་ཕེབས་གནང་ཡོད།
དེ་ཡང་མཛད་སྒོའི་ཐོག་མར་བེལ་ཇམ་ས་གནས་གཞོན་ནུ་ལྷན་ཚོགས་ཀྱི་ཚོགས་གཙོ་ཐུབ་བསྟན་འཕེལ་རྒྱས་ལགས་ཀྱིས་མཛད་སྒོའི་ངོ་སྤྲོད་མདོར་བསྡུས་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་དང་བོད་མིའི་བདེ་དོན་ཆེད་སྐུ་ངལ་ལྷོད་མེད་མཛད་དང་མཛད་བཞིན་པའི་སྐོར་ངོ་སྤྲོད་གནང་རྗེས་བེལ་ཇམ་བོད་རིགས་ཚོགས་པའི་ཚོགས་གཙོ་དཔལ་ལྡན་ཚེ་རིང་ལགས་ཀྱིས་བོད་མི་རྣམས་ཕན་ཚུན་རྡོག་རྩ་ཆིག་སྒྲིལ་ངང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་སྒྲུབ་དགོས་པའི་འབོད་སྐུལ་ཞུས།
དེ་རྗེས་བེལ་ཇམ་དོན་ཁང་གི་དྲུང་ཆེ་འཕྲིན་ལས་དབང་འདུས་ལགས་ཀྱིས་བཀའ་ཤག་གི་གསུང་འཕྲིན་སྒྲོགས་སྦྱང་ཞུས་པ་དང་འབྲེལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་སྲུང་བརྩི་ཞུ་རྒྱུ་ཙམ་མ་ཡིན་པར་དུས་རྒྱུན་ནས་མགོན་པོ་མཆོག་གི་ཅི་གསུང་བཀའ་སྒྲུབ་ཞུ་རྒྱུ་གལ་ཆེན་པོ་ཡིན་སྐོར་གསུངས་ཡོད། གསུང་བཤད་ཀྱི་ལས་རིམ་གྲུབ་མཚམས་གཞས་སྣ་འཁྲབ་སྟོན་གཟིགས་འབུལ་དང་། སྒོར་གཞས་ལ་མཉམ་རོལ་ཞུས་ཡོད་པ་བཅས།།
