༄༅། །ཕྱི་ལོ་ ༢༠༢༣ ཟླ་བ་ ༠༧ ཚེས་ ༠༥ ཉིན་ཡུ་རོབ་གྲོས་ཚོགས་ཉེ་འགྲམ་དུ་བེལ་ཇམ་སྐུ་ཚབ་དོན་ཁང་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༨ ཕེབས་པའི་༸སྐུའི་འཁྲུངས་སྐར་མཛད་སྒོ་སྔ་སྣུར་གྱིས་གོ་སྒྲིག་ཞུས་ཡོད། དེ་ཡང་མཛད་སྒོའི་ཐོག་ཨ་རི་དང་། ཡུ་རོབ་གྲོས་ཚོགས་ཀྱི་མི་སྣ་གཙོས་པའི་ཕྱི་འབྲེལ་མི་སྣ་གཞན་དང་། ཡུ་རོབ་གྲོས་ཚོགས་དང་བེམ་ཇམ་གཞུང་གི་ལས་ཀྱི་སྣེ་མོ་བ། ཡུ་རོབ་གྲོས་ཚོགས་ཀྱི་གྲོས་ཚོགས་འཐུས་མི། བེལ་ཇམ་གྲོས་ཚོགས་ཀྱི་གྲོས་ཚོགས་འཐུས་མི། རྒྱལ་སྤྱིའི་གཞུང་ཁོངས་མིན་པའི་ཚོགས་སྡེ་ཁག་གི་སྐུ་ཚབ། བེལ་ཇམ་གནས་འཁོད་བོད་རིགས་ཚོགས་པ་ཁག་གི་སྐུ་ཚབ་སོགས་མཉམ་ཞུགས་ཀྱི་ཐོག་མར་ར་ཉག་དཔལ་སྤྲུལ་རིན་པོ་ཆེ་དང་དགེ་བཤེས་ཚེ་བརྟན་ལགས་ཀྱིས་ཤིས་བརྗོད་གསུང་འདོན་དང་འབྲེལ། བེལ་ཇམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱིས་ཕེབས་བསུའི་གསུང་བཤད་གནང་། སྐབས་དེར་སྐུ་ཚབ་དོན་གཅོད་ཀྱིས་ཚོགས་བཅར་བ་རྣམས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་བོད་མི་རྣམས་ལ་རྒྱུན་མཐུད་ནས་རྒྱབ་སྐྱོར་གནང་བ་ཐུགས་རྗེ་ལེགས་འབུལ་ཞུས་པ་དང་ཆབས་ཅིག སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་ཞི་བདེ་དང་། ཆོས་ལུགས་མཐུན་འབྲེལ། ཁོར་ཡུག་སྲུང་སྐྱོབ། འགྲོ་བ་མིའི་ཐོབ་ཐང་སོགས་གོ་ལའི་གནད་དོན་མང་དག་ཐད་ཞབས་འདེགས་རླབས་ཆེན་བསྒྲུབས་དང་སྒྲུབ་གནང་བཞིན་པའི་སྐོར་ངོ་སྤྲོད་དང་། དེ་བཞིན་ཁོང་མོས་བོད་མི་རྣམས་ལ་མཚོན་ན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནི་ཡང་དག་པའི་ལམ་སྟོན་པ་ཞིག་དང་། བོད་དང་བོད་མིའི་མཚོན་དོན་དང་མགྲིན་ཚབ་པ་ཡིན། གལ་ཏེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལྟ་བུའི་དབུ་ཁྲིད་ཅིག་མེད་ན། བོད་ས་ཤོར་བའི་རྗེས་ཀྱི་གནས་སྟངས་མི་འདྲ་བ་ཞིག་ཆགས་ཡོད་ངེས་རེད་ཅེས་དང་། གཞན་ཡང་ཁོང་མོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་དག་པའི་དབུ་ཁྲིད་ལམ་སྟོན་ལ་བརྟེན་ནས་བོད་མི་རྣམས་ནས་རྒྱ་ནག་གིས་དྲག་གནོན་ཇི་ཙམ་བཏང་ཡང་བོད་དོན་བདེན་པའི་འཐབ་རྩོད་དེ་བཞིན་འཚེ་མེད་ཞི་བའི་ལམ་ཐོག་ནས་ཤར་སྐྱོད་བྱེད་བཞིན་ཡོད་ཅེས་སོགས་གསུངས་རྗེས་བེལ་ཇམ་ནང་པའི་མཐུན་ཚོགས་ཀྱི་ཚོགས་གཙོ་ཀར་ལོ་ (Carlo Luyckx) ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་ལ་ཞབས་འདེགས་ཇི་ཙམ་ཞུས་ཡོད་སྐོར་འགྲེལ་བརྗོད་གནང་ཡོད། མཛད་སྒོ་གྲོལ་མཚམས་སྐུ་མགྲོན་རྣམས་ལ་བེལ་ཇམ་གནས་སྡོད་བོད་མི་སྒྱུ་རྩལ་བ་བཞི་ནས་བོད་ཀྱི་སྲོལ་རྒྱུན་ནང་མ་སྟོད་གཞས་གཟིགས་འབུལ་ཞུས། བེལ་ཇམ་སྐུ་ཚབ་དོན་ཁང་ནས་འདི་ལོའི་༸སྐུའི་འཁྲུངས་སྐར་སྲུང་བརྩིའི་མཛད་སྒོར་དམིགས་བསལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་བཞིའི་སྐོར་པར་རིས་འགྲེམས་སྟོན་ཞིག་གོ་སྒྲིག་ཞུས་ཡོད་པ་མ་ཟད། ཚོགས་བཅར་བ་རྣམས་ལ་རང་ཉིད་ཀྱི་མིང་བོད་ཀྱི་ཡིག་གཟུགས་སྒྱུ་རྩལ་ལམ་ནས་འབྲི་ས་ཤིག་ཀྱང་གོ་སྒྲིག་ཞུས་ཡོད།

མཐར་ཕྱི་དྲོ་ཚོགས་བཅར་བ་རྣམས་ནས་སྒོར་གཞས་ཀྱི་དགའ་སྟོན་ལ་རོལ་ཏེ་མཛད་སྒོ་ལེགས་པར་གྲུབ་ཡོད་པ་བཅས།།