༄༅། །འདི་གར་བལ་ཡུལ་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། བོད་རྒྱལ་ལོ་ ༢༡༥༠ ཕྱི་ལོ་ ༢༠༢༣ ཟླ་ ༧ ཚེས་ ༦ རེས་གཟའ་ཕུར་བུ་ཉིན་བལ་ཡུལ་སྐུ་ཚབ་དོན་གཅོད་ཁང་གི་དབུ་ཁྲིད་འོག་ཀཐ་མན་གྲུ་༸སྐུའི་འཁྲུངས་སྐར་གོ་སྒྲིག་ཚོགས་ཆུང་ནས་འགྲོ་བ་ལྷ་དང་བཅས་པའི་མ་འདྲིས་པའི་མཛའ་ཤེས་ཆེན་པོ། ས་སྟེང་རྒྱལ་བསྟན་ཡོངས་རྫོགས་ཀྱི་མངའ་བདག བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་རྒྱལ་བའི་དབང་པོ་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༨ ལ་ཕེབས་པའི་སྐུའི་འཁྲུངས་སྐར་དུས་ཆེན་གྱི་གཞུང་འབྲེལ་མཛད་སྒོ་སྲུང་བརྩི་ཞུ་རྒྱུ་དེ་ཉིད་བལ་གཞུང་ནས་ཆོག་མཆན་ཡོད་མེད་ལ་མ་ལྟོས་པར་ཐབས་མཁས་ཐོག་སྔ་དྲོ་ ༧:༤༥ ཐོག་འཕགས་ཤིང་རྣམ་རྒྱལ་འབྲིང་སློབ་ཏུ་སྐུ་མགྲོན་དང་སེར་སྐྱ་མི་མང་འདུ་འཛོམས་གནང་རྗེས་སྐུ་མགྲོན་གཙོ་བོ་༸སྐྱབས་རྗེ་ཤྲི་ཆུ་བཟང་རིན་པོ་ཆེ་མཆོག་གིས་གཙོས་མཁན་པོ་བླ་སྤྲུལ་ཁག་དང་། བོད་མིའི་སྒྲིག་འཛུགས་ཀྱི་བལ་ཡུལ་སྐུ་ཚབ་སྐུ་ཚབ་དོན་གཅོད། ཕྱོགས་བཞུགས་སྤྱི་འཐུས་དང་སྤྱི་ཟུར། བལ་ཡུལ་སྐུ་ཚབ་དོན་ཁང་གི་དྲུང་ཆེ། ས་གནས་འཐུས་ཚོགས་ཁག་གི་ཚོགས་གཙོ་རྣམ་པ། ས་གནས་འགོ་འཛིན་རྣམ་པ། ས་གནས་རང་བདེན་ཚོགས་ཆུང་ཁག་གི་ཚོགས་གཙོ་རྣམ་པ། བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་ཟུར་པ་ཁག བལ་ཡུལ་གངས་ཅན་བདེ་རྩའི་འཛིན་སྐྱོང་འགན་འཛིན་དང་བོད་མིའི་སློབ་གྲྭ་ཁག་གི་སློབ་སྤྱི་ཁག
ལྷག་པར་བལ་ཡུལ་ནང་གི་ཕྱི་རྒྱལ་གཞུང་ཚབ་ཁང་གི་གཞུང་ཚབ་པ་དང་ལས་བྱེད། བལ་ཡུལ་ནང་པའི་ཚོགས་ཆེན་གྱི་ཚོགས་གཙོ་གཙོས་པའི་ཆོས་བརྒྱུད་ཁག་གི་ཚོགས་གཙོ་ཁག རང་རེའི་ཆོས་དང་རིག་གཞུང་། མི་རིགས་གཅིག་པའི་ཧི་མ་ལ་ཡའི་ཚོགས་པ་ཁག་གི་ཚོགས་གཙོ་ཁག་བཅས་པས་དབུས་སུ་༸རྒྱལ་བའི་སྐུ་པར་མཐོང་གྲོལ་རིན་པོ་ཆེ་གདན་དྲངས་ཏེ་བལ་ཡུལ་རྣམ་རྒྱལ་མཐོ་སློབ་ཀྱི་སློབ་མ་རྣམས་ནས་རྔ་རོལ་རུ་སྒྲིག བལ་ཡུལ་བོད་ཀྱི་ལྷ་མོ་ཚོགས་པས་བཀྲ་ཤིས་གཞོལ་པ་དང་ལྷ་ཀླུང་གཞས་མའི་གླུ་དབྱངས། བལ་ཡུལ་ཏྲེ་ཧོར་སྐྱིད་སྡུག་གི་བོད་ཀྱི་ནོར་གཡག་དང་གངས་སེང་དཀར་མོའི་སྒོ་ནས་གདན་ཞུས་བཞུགས་ཁྲིར་མངའ་གསོལ་རྗེས་གཞུང་དགོན་བསམ་གཏན་གླིང་གི་མཁན་པོ་དང་། དགེ་འདུན་པ་གཙོས་པའི་སྐུ་མགྲོན་གཙོ་བོ་༸སྐྱབས་རྗེ་ཤྲི་ཆུ་བཟང་རིན་པོ་ཆེ་མཆོག་དང་། ༸སྐྱབས་རྗེ་ཆུ་དབར་ཀུན་རྩེ་རིན་པོ་ཆེ། ཤེལ་ཆོས་མཁན་རིན་པོ་ཆེ། ས་སྐྱ་མཁན་རིན་པོ་ཆེ་ངག་དབང་འབྱོར་ལྡན་ལགས་སོགས་ནས་ཁྲུས་གསོལ་རབ་གནས་དང་།
དེ་རྗེས་༸རྒྱལ་བའི་སྐུ་པར་མཐོང་གྲོལ་རིན་པོ་ཆེར་མཎྡལ་སྐུ་གསུམ་ཐུགས་རྟེན་འདེགས་འབུལ་གྱིས་གནད་ཡོད་མི་སྣས་མཇལ་དར་ཕུལ། དེ་ནས་སེར་སྐྱ་མི་མང་སྐུ་བཞེངས་ཐོག་བལ་བོད་གཉིས་ཀྱི་རྒྱལ་གླུ་དང་དྲུག་ཅུའི་དབྱངས་ལྡན་རྔ་རོལ་གླིང་བུ་དང་བཅས་མཚར་དུ་མངར་བ་ཕུལ།
དེ་ནས་རིམ་བཞིན་ལྷ་མོ་ཚོགས་པས་རྟེན་འབྱུང་དགའ་སྟོན་གྱི་གཞས་སྣ་བོད་ཆོལ་ཁ་གསུམ་གྱི་ཆས་གོས་སྤྲས་ཏེ་ཏཱ་ལའི་བླ་མ་ཞེས་པའི་༸རྒྱལ་བའི་བསྟོད་གླུ་ཞིག་འབུལ། དེ་རྗེས་བལ་ཡུལ་ཉེན་རྟོགས་ལས་ཁུངས་ཀྱི་ལམ་སྟོན་ལྟར་གཞས་སྣ་ཁག་ཅུང་ཟད་མཁོ་བསྡུ་མ་བྱེད་ཐབས་མེད་བྱུང་བ་ལས་གཞི་རྩའི་རྟེན་འབྲེལ་གྱི་མཛད་རིམ་རྣམས་ཡུལ་བབས་ལ་བསམ་ན་ལེགས་གྲུབ་བྱུང་སོང་བ་དང་། དེ་ནི་དེ་སྔ་ཀཐ་མན་གྲུའི་རྫོང་དཔོན་ལས་ཁུངས་ཀྱི་ཁྱབ་ཁོངས་སུ་ལོ་མང་ནང་༸སྐུའི་འཁྲུངས་སྐར་བདེ་འཇགས་ངང་སྲུང་བརྩི་ཞུ་རྒྱུ་མ་བྱུང་བར་དཔག་ན་ད་རེས་མི་མང་སྟོང་ཚོ་གཉིས་ལ་ཉེ་བ་འཛོམས་པརྒྱས་འཛོམས་ཆེ་ཤོས་སུ་གྱུར།
བལ་ཡུལ་ཉེན་རྟོགས་པའི་ལམ་སྟོན་ཇི་བཞིན་བདེ་འཇགས་ངང་གཞས་སྣ་ཁག་གཅིག་མཁོ་བསྡུ་བྱས་པ་ལས་འདས་པའི་ལོ་མང་སྔོན་དུ་བྱུང་བ་ལྟ་བུའི་མི་མང་བཀག་འགོག་དང་། གནད་ཡོད་མི་སྣ་འཛིན་བཟུང་། དེ་བཞིན་བོད་ཆས་གྱོན་གྱུར་གཡོ་ཐབས་བྱེད་དགོས་པའི་གནས་ཚུལ་ལྟ་བུ་གང་ཡང་བྱུང་མེད་པ་མ་ཟད། མཐར་བལ་ཡུལ་བོད་ཀྱི་ལྷ་མོ་ཚོགས་པས་རྣམ་ཐར་མཆོད་དབྱངས་དང་བཅས་ཕྱི་ནང་སྐུ་མགྲོན་དང་སེར་སྐྱ་མི་མང་སྟོང་ཚོ་གཉིས་ལ་ཉེ་བས་ཀི་བསྭོའི་ལྷ་རྒྱལ་འཐེན་ནས་མཛད་སྒོ་ཞི་འཇམ་དགའ་སྤྲོའི་ངང་གྲོལ་རྒྱུ་བྱུང་། བསམ་ཡོད་གཟུ་བོར་གནས་པའི་གནད་ཡོད་བོད་མི་དང་ཧི་མ་ལ་ཡའི་མི་རིགས། ལྷག་པར་ཕྱི་རྒྱལ་གཞུང་ཚབ་ཁག་གཅིག་གིས་ཀཐ་མན་གྲུ་ནང་འདི་ཙམ་བྱུང་བ་ཧ་ཅང་ཡག་པོ་རེད་ཅེས་གསུངས།
འདི་ནི་ལཱ་ལིཏ་པུར་རྫོང་གི་གནས་སྟངས་དང་མི་འདྲ་བའི་དབང་གིས་༸སྐུའི་འཁྲུངས་སྐར་གོ་སྒྲིག་ཚོགས་ཆུང་ཡང་འདོད་བློ་ཁེངས་པ་ལྟ་བུའི་རྣམ་པ་བྱུང་བ་སོགས་དང་། ཉིན་གཉིས་པར་འཁྲུངས་སྐར་གོ་སྒྲིག་ཚོགས་ཆུང་གི་མཐུན་འགྱུར་འོག་བལ་ཡུལ་བོད་ཀྱི་ལྷ་མོ་ཚོགས་པས་ལྷ་མོའི་འཁྲབ་གཞུང་མི་ཉམས་རྒྱུན་འཛིན་གྱིས་སྟོན་པའི་རྣམ་ཐར་ཉིན་འཁྱོངས་གཟིགས་འབུལ་བཅས། །
