༄༅། །ཕྱི་ལོ་ ༢༠༢༣ ཟླ་བ་ ༠༧ ཚེས་ ༡༧ ཉིན་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གི་ཉི་འོང་ཁུལ་གྱི་མཛད་འཆར་ཁག་ལེགས་པར་གྲུབ་སྟེ་མཁའ་གྲུ་བརྒྱུད་ལྡི་ལིར་ཕེབས་ཐོན་གནང་ཡོད་པ་དང་། སྐབས་དེར་ཉི་འོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་དང་། དོན་ཁང་ལས་བྱེད། ས་གནས་བོད་མི་བཅས་ནས་གནམ་ཐང་དུ་ཕེབས་སྐྱེལ་ཞུས་ཡོད་པ་་རེད།
དེ་ཡང་ཐེངས་འདིའི་ཕྱི་དྲིལ་བཀའ་བློན་མཆོག་གི་ཉི་འོང་གཞུང་འབྲེལ་ཕྱོགས་ཕེབས་ཐེངས་དང་པོའི་སྐབས་ཉི་འོང་བོད་དོན་རྒྱབ་སྐྱོར་ཚོགས་པ་དང་། ཉི་འོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་གཙོས་པའི་རྒྱུན་ལས་ཚོགས་མི་རྣམ་པ་དང་མཇལ་འཕྲད་གནང་སྟེ་བོད་ནང་གི་ཛ་དྲག་གནས་སྟངས་དང་། བོད་མིའི་སྒྲིག་འཛུགས་ཀྱི་སྲིད་བྱུས་དང་ལས་དོན་གནང་ཕྱོགས་སོགས་ངོ་སྤྲོད་དང་། ཉི་འོང་ནས་བོད་དོན་ཐོག་རྒྱབ་སྐྱོར་གཡོ་མེད་གནང་བཞིན་པར་ཐུགས་རྗེ་ལེགས་འབུལ་ཞུས་ཤིང་། ཉི་འོང་བོད་དོན་རྒྱབ་སྐྱོར་བ་དང་གྲོས་ཚོགས་འཐུས་མི་རྣམ་པས་ཀྱང་བོད་དོན་ལ་མུ་མཐུད་རྒྱབ་སྐྱོར་གནང་རྒྱུའི་ཞལ་བཞེས་གནང་ཡོད།
དེ་བཞིན་ཁོང་མོས་ཉི་འོང་གི་གཙུག་ལག་སློབ་གཉེར་ཁང་གཉིས་སུ་ཆེད་ཕེབས་ཀྱིས་གཙུག་ལག་སློབ་གཉེར་ཁང་གི་དགེ་ལས་སློབ་ཕྲུག་རྣམས་ལ་བོད་དོན་ངོ་སྤྲོད་དང་། གསར་འགོད་པའི་བཅར་འདྲིར་དང་ལེན། གསར་འགོད་གསལ་བསྒྲགས། དཔེ་དེབ་དབུ་འབྱེད། བོད་སོག་འབྲེལ་ལམ་གྱི་ཚོགས་འདུར་མཉམ་ཞུགས་ཀྱི་ལམ་ནས་བོད་དོན་ངོ་སྤྲོད་གནང་ཡོད།
མཐར་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་སྐུ་ཚབ་དོན་ཁང་དུ་ས་གནས་བོད་རིགས་དང་མཇལ་འཕྲད་གནང་སྟེ་ཐེངས་འདིའི་ཕྱོགས་ཕེབས་ཀྱི་དམིགས་ཡུལ་དང་། ཕྱོགས་ཕེབས་སྐབས་ཆབ་སྲིད་དང་། སྤྱི་ཚོགས་བདེ་དོན། ཤེས་ཡོན་དང་འབྲེལ་བའི་མཛད་འཆར་ཁག་གང་ལེགས་བྱུང་ཡོད་སྐོར་གསལ་བཤད་དང་སྦྲགས། བོད་མི་རྣམས་ནས་རྩ་བའི་དམིགས་ཡུལ་མ་བརྗེད་པའི་ཐོག་རྡོག་རྩ་ཆིག་སྒྲིལ་ངང་ནས་གནས་དགོས་པའི་ལམ་སྟོན་གནང་ཡོད་པ་བཅས།། 
