༄༅། །ཕྱི་ལོ་ ༢༠༢༣ ཟླ་བ་ ༠༧ ཚེས་ ༡༢ ཉིན་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་ཉི་འོང་གི་ཆི་བ་འཕྲུལ་ལས་བསྟི་གནས་ཁང་དུ་ཆེད་ཕེབས་ཀྱིས་བོད་དང་རྒྱལ་སྤྱིའི་འབྲེལ་བ་ཞེས་པའི་བརྗོད་གཞིའི་ཐོག་གསུང་བཤད་གནང་ཡོད།
དེ་ཡང་གོང་ཚེས་ཉིན་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་ཉི་འོང་གི་ཆི་བ་འཕྲུལ་ལས་བསྟི་གནས་ཁང་དུ་ཆེད་ཕེབས་སྐབས་བསྟི་གནས་ཁང་གི་འགན་འཛིན་སེ་ཏོ་ཀུ་མ་ཨོ་ས་མུ་(Setokuma Osamu)ལགས་གཙོས་པའི་འགན་འཛིན་ལྷན་ཚོགས་ཀྱི་ཚོགས་མི་རྣམས་པས་ཕེབས་བསུ་ཞུས་པ་འབྲེལ། ཕྱི་དྲིལ་བཀའ་བློན་མཆོག་ནས་གཙུག་ལག་སློབ་གཉེར་ཁང་གིས་བོད་ཕྲུག་གི་ཤེས་ཡོན་ཐད་རོགས་སྐྱོར་གནང་བཞིན་པར་ཐུགས་རྗེ་ཆེ་ཞུས།
སྐབས་དེར་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་བསྟི་གནས་ཁང་གི་དགེ་ལས་སློབ་གཉེར་བ་རྣམས་ལ་བོད་དང་རྒྱལ་སྤྱིའི་འབྲེལ་བ་ཞེས་པའི་བརྗོད་གཞིའི་ཐོག་གསུང་བཤད་གནང་སྐབས་བོད་ཀྱི་ལོ་རྒྱུས་ངོ་སྤྲོད་མདོར་བསྡུས་དང་། རྒྱ་ནག་དམར་ཤོག་གཞུང་གིས་བོད་བཙན་བཟུང་བྱས་ཚུལ། བོད་ཕྱི་ནང་གཉིས་ཀྱི་བོད་མི་རྣམས་ནས་བོད་དོན་བདེན་པའི་འཐབ་རྩོད་གནང་བཞིན་པའི་སྐོར་འགྲེལ་བརྗོད་དང་སྦྲགས། རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་དང་ཆོས་དད་རང་དབང་ལ་རྡོག་རོལ་ཚབས་ཆེ་གཏོང་བཞིན་པའི་ཛ་དྲག་གནས་སྟངས་གསལ་སྟོན་གནང་བའི་ཐོག བོད་མིའི་སྒྲིག་འཛུགས་ངོས་ནས་དབུ་མའི་ལམ་བརྒྱུད་བོད་རྒྱའི་དཀའ་རྙོག་ཞི་འགྲིག་ཡོང་ཐབས་ལ་འབད་རྩོལ་གནང་བཞིན་པའི་སྐོར་ངོ་སྤྲོད་ཞིག་རྒྱས་གནང་ཡོད།
ཆི་བ་འཕྲུལ་ལས་བསྟི་གནས་ཁང་གི་འགན་འཛིན་སེ་ཏོ་ཀུ་མ་ཨོ་ས་མུ་ལགས་དང་འགན་འཛིན་ལྷན་ཚོགས་ཀྱི་ཚོགས་མི་རྣམས་ནས་ཕྱི་དྲིལ་བཀའ་བློན་མཆོག་གཙུག་ལག་སློབ་གཉེར་ཁང་དུ་ཆེད་ཕེབས་ཀྱིས་བོད་དོན་སྐོར་གསུང་བཤད་གནང་བར་ཐུགས་རྗེ་ཆེ་ཞུས་པ་དང་འབྲེལ་གཙུག་ལག་སློབ་གཉེར་ཁང་ནས་ཕེབས་བསུའི་དགུང་ཚིགས་གསོལ་སྟོན་ཞིག་ཀྱང་གོ་སྒྲིག་གནང་། སྐབས་དེར་སྐུ་ཞབས་སེ་ཏོ་ཀུ་མ་ཨོ་ས་མུ་ལགས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཁོང་གི་བཀའ་སློབ་ལམ་སྟོན་ལ་གུས་བརྩི་དང་མགོན་པོ་མཆོག་སྐུ་ཁམས་གསལ་ཞིང་སྐུ་ཚེ་ཡུན་རིང་བརྟན་པའི་སྨོན་འདུན་ཞུས་ཡོད།
དེ་རྗེས་ཕྱི་དྲིལ་བཀའ་བློན་མཆོག་གིས་གཙུག་ལག་སློབ་གཉེར་ཁང་དེའི་ནང་སློབ་གཉེར་གནང་བཞིན་པའི་བོད་ཕྲུག་རྣམས་དང་ཐུག་འཕྲད་གནང་སྟེ་ཉི་འོང་དུ་སློབ་གཉེར་བྱེད་རྒྱུའི་དམིགས་ཡུལ་དང་། སློབ་གཉེར་བ་དེ་དག་གཞུང་འབྲེལ་མིན་པའི་བོད་མིའི་མགྲོན་ཚབ་པ་ཡིན་པས་མ་འོངས་པར་བོད་མིའི་སྤྱི་ཚོགས་ནང་དུ་ཞབས་ཞུ་སྒྲུབ་ཐུབ་པ་གནང་དགོས་པའི་ལམ་སྟོན་གནང་ཡོད།
ཉིན་རྒྱབ་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་རེ་ཏ་ཀུ་གཙུག་ལག་སློབ་གཉེར་ཁང་དུ་ཕེབས་ཤིང་། སྐབས་དེར་སྐུ་ཞབས་ཧི་རོ་རི་ཀི་མོ་ཊོ་ཊ་ཀ་(Hiroike Mototaka)ལགས་དང་དགེ་རྒན་ལས་བྱེད་ནས་ཕེབས་བསུ་ཞུས་ཐོག་གཙུག་ལག་སློབ་གཉེར་ཁང་གི་ལོ་རྒྱུས་དང་། སྤྱི་ཚོགས་ཞབས་ཞུ་ཇི་ཞུས་སྐོར་ངོ་སྤྲོད་གནང་བ་མ་ཟད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་བོད་མིའི་སྤྱི་ཚོགས་ལ་རྒྱབ་སྐྱོར་ཞུ་རྒྱུ་བྱུང་བར་དགའ་ཚོར་ཆེན་པོ་ཡོད་སྐོར་འགྲེལ་བརྗོད་གནང་།
སྐབས་དེར་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་རེ་ཏ་ཀུ་གཙུ་ལག་སློབ་གཉེར་ཁང་གིས་བོད་མིར་རྒྱབ་སྐྱོར་ཕན་གྲོགས་གནང་བར་ཐུགས་རྗེ་ཆེ་ཞུས་པ་དང་འབྲེལ། གཙུག་ལག་སློབ་གཉེར་ཁང་དང་དཔེ་མཛོད་ཁང་དུ་གཟིགས་སྐོར་ལ་ཕེབས་ཡོད། དེ་དང་ཆབས་ཅིག་ཉི་འོང་དུ་ཉི་འོང་གི་སྐད་ཡིག་སློབ་གཉེར་གནང་བཞིན་པའི་བོད་མིའི་སྒྲིག་འཛུགས་ཀྱི་གཞུང་ཞབས་རྡོ་རྗེ་དབང་ཕྱུག་ལགས་དང་བསྟན་འཛིན་འོད་གསལ་ལགས་གཉིས་ནས་ཕྱི་དྲིལ་བཀའ་བློན་མཆོག་མཇལ་ཏེ་རང་ཉིད་ཀྱི་བསླབ་པ་སློབ་གཉེར་སྐོར་ངོ་སྤྲོད་སྙན་སེང་ཞུས་ཡོད།
ཕྱི་དྲིལ་བཀའ་བློན་ལྷན་དུ་ཉི་འོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་དང་། དྲུང་ཆེ་བཀྲ་ཤིས་དབྱངས་འཛོམས་ལགས་གཉིས་ལྷན་བཅར་ཞུས། སང་ཉིན་ཕྱི་དྲིལ་བཀའ་བློན་མཆོག་ནས་དཔེ་དེབ་དབུ་འབྱེད་དང་བོད་སོག་རིག་གཞུང་དང་ཆོས་ལུགས་ཚོགས་འདུའི་ཐོག་གསུང་བཤད་གནང་རྒྱུ་ཡིན་པ་བཅས།། 
