༄༅། །འདི་གར་པེ་རི་སི་འབྲེལ་མཐུད་ལས་ཁུངས་ནས་བཏང་གནས་ནང་འཁོད་དོན། པེ་རི་སི་འབྲེལ་མཐུད་ལས་ཁུངས་དང་ཕ་རན་སིའི་གྲོས་ཚོགས་གོང་མའི་བོད་དོན་རྒྱབ་སྐྱོར་ཚོགས་པ་ཐུན་མོང་ནས་༸སྐུའི་འཁྲུངས་སྐར་གྲོས་ཚོགས་གོང་མའི་ཚོགས་ཁང་ནང་སྲུང་བརྩི་ཞུ་བཞིན་ཡོད་པ་ལྟར། ཕྱི་ལོ་ ༢༠༢༣ ཟླ་བ་ ༧ ཚེས་ ༦ ཉིན་རྒྱབ་ཆུ་ཚོད་གསུམ་པ་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༨ ལ་ཕེབས་པའི་༸སྐུའི་འཁྲུང་སྐར་གྲོས་གོང་མའི་ཚོགས་ཁང་ (Les Salons Tournon)  ཞེས་པའི་ནང་སྲུང་བརྩི་ཞུས་ཡོད།དེ་ཡང་མཛད་སྒོའི་སྐུ་མགྲོན་གཙོ་བོ་ཕ་རན་སིའི་གྲོས་ཚོགས་གོང་མའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ལྕམ་སྐུ་ཇེ་ཁེ་ལེན་ ཨུ་ས་ཊ་ཆི་བྷི་རི་ནའོ་ (Jacqueline Eustache-Brinio) མཆོག་དང་། གྲོས་ཚོགས་གོང་མའི་འཐུས་མི་ལྕམ་སྐུ་ཨེལ་སི་ཇོ་སེབ་ (Else Josep ལགས།  གྲོས་གོང་མའི་འཐུས་མི་ལྕམ་སྐུ་ཨ་ནིག་བྷི་ལོན་ (Annick Billon) ལགས།  གྲོས་ཚོགས་གོང་མའི་འཐུས་མི་སྐུ་ཞབས་ཨན་ཊི་གྷ་ཊོ་ལེན་ (Andre Gattolin) ལགས།  པེ་རི་སིའི་རྫོང་དཔོན་གཞོན་པ་སྐུ་ཞབས་ཇིན་ལུཀ་རོ་མེ་རོ་མ་ཡི་ཀེལ་ (Jean Luc Romero-Michel)  ལགས། ཕྱོགས་བཞུགས་སྤྱི་འཐུས་ཐུབ་བསྟན་རྒྱ་མཚོ་ལགས།   སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས།  ཐེ་ཝན་གཞུང་ཚབ་གཞོན་པ་སྐུ་ཞབས་ཕི་ལི་པི་ཡེན་ (Philippe C.L.Yen) ལགས་དང་ཁོང་གི་ལས་རོགས། གཞན་ཡང་ཕ་རན་སི་ནང་གནས་སྡོད་བོད་དོན་རྒྱབ་སྐྱོར་ཚོགས་པའི་སྐུ་ཚབ་ཁག་གཅིག་དང་རོགས་ཚོགས་ཁག་གཅིག  གསར་འཁོད་པ།  བོད་ཀྱི་གྲོགས་པོ་ཁག་གཅིག་བཅས་མགྲོན་འབོད་གནང་དོན་བཞིན་ཕེབས་གནང་སོང་། 

ཕྱོགས་མཚུངས་ཕ་རན་སི་ནང་གནས་སྡོད་བོད་རིགས་ཚོགས་པའི་ཚོགས་གཙོ་ཀརྨ་འཕྲིན་ལས་ལགས་དང་རྒྱུན་ལས།  ས་གནས་མདོ་ཁམས་ཆུ་བཞི་སྒང་དྲུག་གི་ཚོགས་གཙོ། ས་གནས་དབུས་གཙང་ཆོལ་ཁའི་ཚོགས་གཞོན།  ས་གནས་མདོ་སྨད་ཆོལ་ཁའི་ཚོགས་གཙོ་ཚོགས་གཞོན། བོད་རང་བཙན་སློབ་ཕྲུག་ཚོགས་པའི་སྐུ་ཚབ། ས་གནས་གཞོན་ནུའི་སྐུ་ཚབ་སོགས་མཛད་སྒོར་ཕེབས་གནང་སོང་།

སྐབས་དེར་ཕ་རན་སི་གྲོས་ཚོགས་གོང་མའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ལྕམ་སྐུ་ཇེ་ཁེ་ལེན་ཨུ་ས་ཊ་ཆི་བྷི་རི་ནའོ་ མཆོག་གིས་༸སྐུའི་འཁྲུངས་སྐར་ལ་འཚམས་འདྲིའི་གསུང་བཤད་དང་བོད་དོན་ཐོག་མུ་མཐུད་ནས་རྒྱབ་སྐྱོར་གནང་རྒྱུའི་ཞལ་བཞེས་གནང་སོང་། 

སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱིས་མཛད་སྒོར་ཕེབས་མཁན་ཡོངས་ལ་འཚམས་འདྲི་དང་༸གོང་ས་མཆོག་གི་མཛད་འཆར་སྐོར་དང་བོད་ནང་གི་གནས་སྟངས་སོགས་ཀྱི་སྐོར་གསུང་བཤད་དང་ཚོགས་བཅར་བར་ཡོངས་ལ་ཐུགས་རྗེ་ཆེ་ཞུ་གནང་སོང་། 

༸སྐུའི་འཁྲུངས་སྐར་མཛད་སྒོ་ཐོག་མགྲོན་འབོད་ཞུ་དོན་བཞིན་སྐུ་མགྲོན་གྲངས་ ༦༠༠  ཙམ་ཕེབས་གནང་ཡོད་པ་བཅས། །