༄༅། །འདི་གར་བྱང་ཨ་རིའི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ནིའུ་ཡོག་དང་ནིའུ་འཇར་སི་བོད་ཀྱི་ཟློས་གར་ཟུར་པའི་ཚོགས་པས་རེས་གཟའ་ཉི་མའི་ཉིན་གྲོང་ཁྱེར་ནིའུ་ཡོག་ནང་གི་བོད་རིགས་སྤྱི་མཐུན་ཚོགས་པའི་ཚོགས་ཁང་ཕུན་ཚོགས་སྡེ་བཞིའི་ནང་བོད་ཀྱི་ལྷ་མོའི་དུས་སྟོན་ཚོགས་ནས་ལྷ་གཞུང་ཆོས་རྒྱལ་ནོར་བཟང་རིན་མེད་ཐོག་གཟིགས་འབུལ་ཞུས།  

དེ་ཡང་རེས་གཟའ་ཉི་མའི་སྔ་དྲོའི་ཕྱག་ཚོད་ ༩ དང་ཕྱེད་ཀའི་ཐོག་ཟློས་ཟུར་ཚོགས་མི་སྒྱུ་རྩལ་བ་བསྟན་ནོར་ལགས་ནས་ལྷ་མོའི་དུས་སྟོན་དངོས་སུ་འགོ་ཚུགས་པའི་གསལ་བསྒྲགས་དང་འབྲེལ་ཐེངས་འདིའི་དུས་སྟོན་ཉིན་གཟིགས་འབུལ་ཞུ་རྒྱུའི་འཁྲབ་གཞུང་ནི་ཆོས་རྒྱལ་ནོར་བཟང་ཡིན་པ་ངོ་སྤྲོད་གནང་རྗེས།  ཟློས་ཟུར་ཚོགས་པའི་ཚོགས་གཙོ་པད་མ་བསྟན་འཛིན་ལགས་ནས་དུས་སྟོན་ལ་ཕེབས་པའི་སྐྱབས་ཡུལ་དགེ་འདུན་པ་རྣམ་པ་དང་།  གདན་ཞུས་སྐུ་མགྲོན་རྣམས་ལ་ཚམས་འདྲི་དང་འབྲེལ།  ད་ཐེངས་འཁྲབ་གཞུང་སྦྱོང་བསྡར་བྱས་པའི་རྒྱུད་རིམ་རོབ་ཙམ་གསུང་ཐོག  ཟློས་ཟུར་ཚོགས་པས་ལྷ་མོའི་དུས་སྟོན་གྲ་སྒྲིག་ཞུ་དགོས་པའི་དམིགས་ཡུལ་གཙོ་བོ་ནི།  བོད་ཀྱི་ཐུན་མོང་མ་ཡིན་པའི་ལྷ་མོའི་རིག་གཞུང་སྲུང་སྐྱོབ་དང་།  གཞོན་སྐྱེས་མི་རབས་གསར་པས་ལྷ་མོའི་རིག་གཞུང་ལ་དོ་སྣང་སླེབས་ཐབས།  ཞོར་ལ་ལྷ་མོའི་དགེ་རྒན་དམ་པ་ནོར་བུ་ཚེ་རིང་མཆོག་ལ་བཀའ་དྲིན་རྗེས་དྲན་ཞུ་རྒྱུ་དེ་ཡིན།  ཞེས་གསུངས། 

ལྷ་མོའི་དུས་སྟོན་ཉིན་མོར་བྱང་ཨ་རིའི་སྐུ་ཚབ་དོན་གཅོད་ཁང་གི་བོད་རིགས་འབྲེལ་མཐུད་པ་དྲུང་ཟུར་ཀུན་དགའ་བཀྲ་ཤིས་ལགས་དང་།  ཁྲིམས་ཞིབ་པ་ཟུར་པ་ངག་དབང་རབ་རྒྱས་ལགས།  ཚོགས་པ་ཁག་གི་སྐུ་ཚབ་དང་། མི་ལོ་ཧྲིལ་པོ་ ༤༠ ལྷག་ཟློས་གར་ཚོགས་པའི་ནང་ཕྱག་ལས་གནང་མཁན་རྒན་བློ་བཟང་བསམ་གཏན་ལགས།  ཟློས་གར་འགན་འཛིན་ཟུར་པ་འཇམ་དབྱང་ནོར་བུ་ལགས་སོགས་ཟློས་གར་ཟུར་པ་དང་།  དེ་མིན་གྱི་མི་སྣ་ཁག་ཅིག་སྐུ་མགྲོན་དུ་གདན་འདྲེན་ཞུས་འདུག

བྱང་ཨ་རིའི་སྐུ་ཚབ་དོན་གཅོད་ཁང་གི་བོད་རིགས་འབྲེལ་མཐུད་པ་དྲུང་ཟུར་ཀུན་དགའ་བཀྲ་ཤིས་ལགས་ཀྱིས་གསུང་བཤད་གནང་སྐབས།  ༸གོང་ས་མཆོག་གི་བཀའ་འབྲེལ་བཞིན་ཕྱི་ལོ་ ༡༩༥༩ ལོར་ཀ་ལོན་སྦུག་ཏུ་བོད་གཞུང་ཟློས་གར་ཚོགས་པ་ཐོག་མར་དབུ་བརྙེས་ནས་ད་བར་མི་ལོ་ ༦༤ རིང་ཟློས་གར་ཚོགས་པའི་འགོ་ལས་འདས་སོན་ཡོངས་ནས་རིག་གཞུང་འཁྲབ་སྟོན་དང་སྒྱུ་རྩལ་གྱི་ལམ་ནས་བོད་ཀྱི་བདེན་དོན་འཐབ་རྩོད་ལ་ཞབས་འདེགས་རླབས་ཆེན་བསྒྲུབས་ཡོད་པའི་སྐོར་དང་།  གཞན་ལ་མེད་པའི་བོད་གཞུང་ཟློས་གར་ཚོགས་པའི་དམིགས་བསལ་གྱི་ཁྱད་ཆོས།  ཟློས་གར་ཟུར་པ་རྣམས་ས་ཕྱོགས་གང་དུ་གནས་ཀྱང་སློབ་ཕྲུག་རྣམས་ལ་རིག་གཞུང་འཁྲབ་སྟོན་སློབ་ཁྲིད་དང་།   རང་རེའི་སྤྱི་ཚོགས་ནང་རིག་གཞུང་འཁྲབ་སྟོན་གྱི་ཞབས་ཞུ་གནང་བའི་སྐོར་བཅས་གསུངས་པ་དང་འབྲེལ་ད་རེས་ཟློས་ཟུར་ཚོགས་པས་དམིགས་ཡུལ་ངེས་ཅན་ཞིག་བཟུང་སྟེ།  གྲོང་ཁྱེར་ནིའུ་ཡོག་ནང་ལྷ་མོའི་དུས་སྟོན་གོ་སྒྲིག་གནང་ཐུབ་བར་སྐུ་ཚབ་དོན་གཅོད་ཁང་གི་ཚབ་ཞུས་ནས་ཡི་རངས་བསྔགས་བརྗོད་གནང་། 

ཤེས་རྟོགས་བྱུང་བར་གཞིགས་ན།  ནིའུ་ཡོག་དང་ནིའུ་འཇར་སི་ཟློས་ཟུར་ཚོགས་པ་ནི་ཕྱི་ལོ་ ༢༠༡༦ ལོར་དངོས་སུ་བཙུགས་ནས་བཟུང་ཟློས་ཟུར་ཚོགས་པའི་མིང་ཐོག་ནས་གྲོང་ཁྱེར་ནིའུ་ཡོག་ནང་ལྷ་མོའི་འཁྲབ་གཞུང་ཆ་ཚང་བ་གཟིགས་འབུལ་ཞུས་པ་ད་རེས་ཐེངས་པོ་ཡིན་འདུག  

ལྷ་གཞུང་ལ་དོ་སྣང་ཡོད་པའི་དགེ་རྒན་ཞིག་གིས།  “ རེས་གཟའ་ཉི་མའི་ཉིན།  ཆོས་རྒྱལ་ནོར་བཟང་གི་འཁྲབ་གཞུང་དངོས་སུ་འཁྲབ་སྟོན་སྐབས། རྣམ་ཀུན་དང་མི་འདྲ་བར་མང་ཚོགས་ཧ་ཅང་མང་པོ་དང་།  ལྷག་པར་དུ་གཞོན་ནུ་ལོ་ཆུང་ཡང་མི་ཉུང་བ་ཞིག་ལྷ་མོ་ལྟ་བར་ཕེབས་པ་ཙམ་མ་ཟད།  སྤྲོ་སྣང་དང་དོ་དབྱིངས་ཡོད་པའི་སྒོ་ནས་ལྷ་གཞུང་ལྟ་གི་འདུག་སྙམ་པའི་ཚོར་སྣང་དམིགས་བསལ་ཞིག་བྱུང་བས།  དེ་ནི་ང་རང་ཚོ་དགའ་འོས་པའི་སྔོན་རྟགས་ཞིག་རེད། ” ཅེས་གསུངས་བྱུང་།   

འཁྲབ་གཞུང་གཟིགས་འབུལ་གྲུབ་རྗེས།  ཟློས་ཟུར་ཚོགས་པའི་ངོས་ནས་རྒན་བློ་བཟང་བསམ་གཏན་ལགས་ལ་བཀའ་དྲིན་དྲན་པའི་ཆེ་བསྟོད་གཟེངས་རྟགས་དང་།  ཁྲིམས་ཞིབ་པ་ཟུར་པ་ངག་དབང་རབ་རྒྱས་ལགས་ནས།  ལྷ་མོའི་འཁྲབ་གཞུང་སྲོལ་གཏོད་མཁན་གྲུབ་ཆེན་ཐང་སྟོང་རྒྱལ་པོའི་རྣམ་མཐར་མདོར་བསྡུས་ངོ་སྤྲོད་དང་།  ནིའུ་ཡོག་ནིའུ་འཇར་སི་ཟློས་ཟུར་ཚོགས་པས་ལྷ་མོའི་དུས་སྟོན་གྲ་སྒྲིག་གནང་བར་བསྔགས་བརྗོད་ཀྱི་མཇུག་སྡོམ་གསུང་བཤད་གནང་།  དེ་རྗེས་ཟློས་ཟུར་ཚོགས་པས་ཐུགས་རྗེ་ཆེའི་གསུང་བཤད་གནང་སྟེ།  ཉིན་གཅིག་གི་ལྷ་མོའི་དུས་སྟོན་རེ་ཞིག་མཇུག་སྒྲིལ་ཡོད་པ་བཅས།།