༄༅། །ཕྱི་ལོ་ ༢༠༢༣ ཟླ་བ་ ༠༧ ཚེས་ ༣༠ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཝཱ་རཱ་ཎ་སཱིར་འཚམས་གཟིགས་སུ་ཕེབས་འབྱོར་སྐབས་གནམ་ཐང་དུ་ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་གི་ཉེ་བའི་རིགས་བདག་དབང་ཕྱུག་རྡོ་རྗེ་ནེ་གི་ལགས་དང་། གསོ་བ་རིག་པའི་རིགས་སྡེ་འགན་འཛིན། སློབ་གཉེར་བའི་རིགས་སྡེ་འགན་འཛིན། ས་གནས་རང་བདེན་ཚོགས་ཆུང་གི་ཚོགས་མི་སོགས་ནས་ཕེབས་བསུ་ཞུས་ཡོད།
གོང་ཚེས་ཉིན་གྱི་ཕྱི་དྲོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་གི་ཨ་ཏི་ཤ་ཚོགས་ཁང་དུ་གཙུག་ལག་སློབ་གཉེར་ཁང་གི་དགེ་ལས་སློབ་གཉེར་བ་རྣམས་ལ་བཀའ་ཤག་སྐབས་བཅུ་དྲུག་པའི་འཆར་གཞི་དམིགས་ཡུལ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་གཞིར་བཟུར་ཤར་སྐྱོད་གནང་བཞིན་པའི་སྐོར་གསུང་བཤད་གནང་ཡོད།
སྐབས་དེར་དཔལ་ལྡན་སྲིད་སྐྱོང་མཆོག་གིས་ད་ལྟའི་ཆར་རྒྱ་ནག་གཞུང་གིས་བོད་ཀྱི་ལོ་རྒྱུས་ལ་འཁྱོག་བཤད་ལོག་འགྲེལ་བྱས་ཏེ་འཛམ་བུ་གླིང་གི་མི་མང་མགོ་སྐོར་གཏོང་བཞིན་ཡོད་སྟབས། བོད་མི་ཚོས་བོད་ཀྱི་དངོས་བྱུང་ལོ་རྒྱུས་ལ་སློབ་གཉེར་བྱས་ཏེ་རྒྱལ་སྤྱིའི་སྤྱི་ཚོགས་ལ་འགྲེལ་བརྗོད་བྱ་རྒྱུ་གལ་གནད་ཆེན་པོ་ཡིན་སྐོར་གསུངས། དེ་དང་འབྲེལ་ཏེ་སྲིད་སྐྱོང་མཆོག་ནས་རྒྱལ་སྤྱིའི་མི་མང་གིས་ལོ་རྒྱུས་ཐོག་བོད་དེ་རང་བཙན་རྒྱལ་ཁབ་ཅིག་ཏུ་ངོས་འཛིན་མ་བྱས་བར་དུ་རྒྱ་ནག་གཞུང་གིས་བོད་ཐོག་ཁྲིམས་འགལ་བཙན་བཟུང་བྱས་པ་དེ་རྒྱལ་སྤྱིའི་སྤྱི་ཚོགས་བརྒྱུད་ཁྲིམས་མཐུན་བཟོ་ཐབས་ལ་འབད་རྩོལ་ལྷོད་མེད་བྱ་ངེས་ཡིན་པ་དང་། དེ་བཞིན་བོད་མིའི་སྒྲིག་འཛུགས་ཀྱི་གཞུང་འབྲེལ་དབུ་མའི་ལམ་གྱི་སྲིད་བྱུས་ལའང་བོད་དེ་ལོ་རྒྱུས་ཐོག་རང་བཙན་རྒྱལ་ཁབ་ཅིག་ཡིན་པ་ངོས་འཛིན་བྱ་རྒྱུ་དེ་གལ་གནད་ཆེན་པོ་ཆགས་ཡོད་སྐོར་གསུངས་པའི་ཁར། ཇི་སྲིད་རྒྱལ་སྤྱིའི་མི་མང་ནས་བོད་རྒྱ་ནག་གི་མངའ་ཁོངས་ཡིན་ཚུལ་བཤད་པ་དེ་སྲིད་དུ་རྒྱལ་སྤྱིའི་མི་མང་ནས་བོད་རྒྱའི་དཀའ་རྙོག་ཞི་འགྲིག་ཡོང་བར་རྒྱབ་སྐྱོར་བྱ་ཐབས་མེད་ཅེས་གསུངས།
གཞན་ཡང་དཔལ་ལྡན་སྲིད་སྐྱོང་མཆོག་ནས་བོད་རིགས་གཞོན་སྐྱེས་རྣམས་ནས་རང་འགན་རང་ཁུར་གྱིས་བོད་དོན་ཞུ་གཏུག་བྱ་རྒྱུ་གལ་གནད་ཆེན་པོ་ཡིན་པ་ངོས་འཛིན་གྱིས་བཀའ་ཤག་སྐབས་བཅུ་དྲུག་པས་བོད་དོན་ཞུ་གཏུག་ལས་འགུལ་ཞེས་པ་དབུ་འཛུགས་གནང་ཡོད་པ་དང་། ལས་འགུལ་དེ་དང་འབྲེལ་ཏེ་ཉེ་ལམ་བཞུགས་སྒར་རྡ་རམ་ས་ལར་རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་བསྐོང་ཚོགས་ཀྱིས་བོད་དོན་ཞུ་གཏུག་ཐབས་བྱུས་དང་འབྲེལ་བའི་ལས་དོན་འཆར་འགོད་དང་བགྲོ་གླེང་ལྷུག་པོ་བྱུང་ཡོད་སྐོར་འགྲེལ་བརྗོད་གནང་ཡོད།
དྲི་བ་དྲིས་ལན་གྱི་ལས་རིམ་སྐབས་བོད་རྒྱ་འབྲེལ་མོལ་དང་འབྲེལ་བའི་བཀའ་དྲི་ཞུ་སྐབས་དཔལ་ལྡན་སྲིད་སྐྱོང་མཆོག་གིས་བོད་རྒྱ་འབྲེལ་མོལ་ཡོང་བར་རེ་བ་རྒྱག་གི་ཡོད་ལ། དེ་དོན་རྒྱབ་ཕྱོགས་ནས་འབྲེལ་བ་གནང་བཞིན་ཡོད་སྐོར་འགྲེལ་བརྗོད་གནང་ཡོད་པ་བཅས།།
