༄༅། །ཕྱི་ལོ་ ༢༠༢༣ ཟླ་བ་ ༠༧ ཚེས་ ༢༨ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཁེ་ན་ཊ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཨ་རིབ་ཝི་ར་ནི་མཆོག་ཁེ་ན་ཊའི་ཁྲིམས་དོན་བློན་ཆེན་དང་ཁྲིམས་དོན་སྤྱི་ཁྱབ་ཏུ་བསྐོ་གཞག་གནང་བར་འཚམས་འདྲི་གནང་ཡོད།
དེ་ཡང་འཚམས་འཕྲིན་ནང་སྲིད་སྐྱོང་སྤེན་པ་ཚེ་རིང་མཆོག་གིས། སྐུ་ཉིད་ཁེ་ན་ཊའི་ཁྲིམས་དོན་བློན་ཆེན་དང་ཁྲིམས་དོན་སྤྱི་ཁྱབ་ཏུ་བསྐོ་གཞག་བྱུང་བར་ངས་འཚམས་འདྲི་ཞུ་རྒྱུ་ཡིན་ལ། སྐུ་ཉིད་ཀྱི་ལྷག་བསམ་ཧུར་བརྩོན་ལ་ཆེ་བསྟོད་ངོས་འཛིན་འདི་ལྟ་བུ་ཐོབ་པ་ནི་དངོས་གནས་འོས་ཤིང་འཚམས་པ་ཞིག་ཡིན།
སྐུ་ཉིད་ལ་མཚོན་ན་ཁྲིམས་དོན་རིག་པར་སྦྱངས་པ་དང་ཉམས་མྱོང་ཚད་མཐོ་ཞིང་། བློ་རིག་རྣམ་དཔྱོད་བཀྲ་བས་ཁེ་ན་ཊའི་ནང་དྲང་བདེན་དང་། རང་དབང་། མང་གཙོ་སྲ་བརྟན་གོང་འཕེལ་གཏོང་བར་ཞབས་འདེགས་རླབས་པོ་ཆེ་ཞུ་ཐུབ་ངེས་རེད།
ངས་གོ་སྐབས་འདི་བརྒྱུད་སྐུ་ཉིད་ནས་བོད་དང་བོད་མིར་རྒྱབ་སྐྱོར་གཡོ་བ་མེད་པ་གནང་དང་གནང་མུས་ལ་བཀའ་དྲིན་རྗེས་དྲན་ཞུ་རྒྱུ་མ་ཟད། སྐུ་ཉིད་ནས་རྒྱུན་མཐུད་དེ་བོད་དོན་ལ་རྒྱབ་སྐྱོར་དང་བོད་དོན་ཞུ་གཏུག་གནང་བ་དེ་བོད་དོན་འཐབ་རྩོད་རྒྱུན་འཁྱོངས་སྲ་བརྟན་གཏོང་བར་ཕན་ཐོགས་ཆེན་པོ་བྱུང་ཡོད། ང་ཚོར་སྐུ་ཉིད་ལྟ་བུའི་གྲོགས་པོ་ཡོད་པར་བསོད་ནམས་ཆེན་པོ་ཡིན། ཁེ་ན་ཊའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པས་མུ་མཐུད་ལས་དོན་ཚགས་ཚུད་སྤེལ་བ་སྐུ་ཉིད་ནས་ཚོགས་གཙོའི་ལས་གནས་དེ་འཇོན་ཐང་ལྡན་པའི་འགོ་ཁྲིད་ཀྱི་ལག་ཏུ་རྩིས་སྤྲོད་གནང་བའི་ཡིད་ཆེས་གཙང་མ་ཡོད། ཅེས་གསུངས་ཡོད་པ་བཅས།།
