༄༅། །ཕྱི་ལོ་ ༢༠༢༣ ཟླ་བ་ ༧ ཚེས་ ༣ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བོད་རྒྱལ་ཡོངས་རྐང་རྩེད་སྤོ་ལོ་རུ་ཁག་གི་རྩེད་འགྲན་པ་དང་ཐུག་འཕྲད་གནང་སྟེ་བོད་དོན་སྐོར་གསུང་བཤད་གནང་ཡོད།སྐབས་དེར་དཔལ་ལྡན་སྲིད་སྐྱོང་མཆོག་གིས།  གངས་རི་ར་བས་བསྐོར་བའི་ཞིང་ཁམས་སུ་ཞེས་པའི་གོ་དོན་འགྲེལ་བརྗོད་དང་འབྲེལ་ནས་བོད་ཀྱི་ས་བབ་ཆགས་ཚུལ་དང་། བོད་ཀྱི་དཀའ་རྙོག་སེལ་ཐུབ་ན་ལྷོ་ཨེ་ཤེ་ཡའི་ནང་བདེ་འཇགས་ཤུགས་ཆེ་ཡོང་ཐུབ་ཀྱི་ཡོད་པའི་སྐོར། བོད་ཀྱི་ཁོར་ཡུག་གི་གལ་གནད། བོད་ཀྱི་གཙང་པོ་ཆེ་ཁག་ཁྱིམ་མཚེས་རྒྱལ་ཁབ་ཁག་ལ་གལ་ཆེན་པོ་ཆགས་ཀྱི་ཡོད་པ།   བོད་ཀྱི་མཐོ་སྒང་ནི་ཨེ་ཤི་ཡའི་ཆུ་བོ་ཆེ་ཁག་མང་པོའི་འབྱུང་ཁུངས་ཡིན་པ། བོད་ཀྱི་འཁྱགས་རོམ་ནི་ལྷོ་བྱང་གི་སྣེ་གཉིས་ཕུད་པའི་འཛམ་གླིང་གི་འཁྱགས་རོམ་མང་ཤོས་དེ་ཆགས་ཀྱི་ཡོད་པ། ཁོར་ཡུག་སྲུང་སྐྱོབ་པ་ཁག་ཅིག་གིས་བོད་ལ་འཛམ་གླིང་གི་སྣེ་གསུམ་པ་ཞེས་ཀྱང་བརྗོད་ཀྱི་ཡོད་པ། རྒྱ་གར་ནས་བོད་དུ་ནང་ཆོས་དར་ཚུལ་སོགས་ཀྱི་སྐོར་གསུང་བཤད་གནང་ཡོད་པ་བཅས། །